TJONÏK 10
¿Achkë rma ütz yatapon pa kimoloj ri testigos de Jehová?
¿Kʼo komä jmul kibʼin chawä chë katapon pa kimoloj ri testigos de Jehová? We ma jmul yït bʼenäq ta chpan jun, rkʼë jbʼaʼ naxiʼij jbʼaʼ awiʼ yabʼä naʼäy mul. Rkʼë jbʼaʼ nakʼutuj qa chawäch: «¿Achkë nkiʼän ri Testigos pa kimoloj? ¿Achkë rma kan kowan ruqʼij chkiwäch ryeʼ nkimöl kiʼ? ¿Kʼo chë yibʼä rïn chqä?». Chpan re tjonïk reʼ xtatamaj chë ri moloj riʼ xkatkitoʼ pan akʼaslemal chqä rchë más junan xtuʼän awäch rkʼë Dios.
1. ¿Achkë rma nkimöl kiʼ ri testigos de Jehová?
Jun achï ri xtzʼibʼan le Biblia xuʼij achkë rma nqamöl qiʼ: «Chkikojöl ye kʼïy winäq ri kimolon kiʼ xtinyaʼ ruqʼij Jehová» (Salmo 26:12). Komä chqä, ri testigos de Jehová kan kiʼ kikʼuʼx nkiʼän taq nkimöl kiʼ. Chwäch jontir le Ruwachʼulew, ryeʼ ronojel semanas nkimöl kiʼ rchë nkiyaʼ ruqʼij Dios, rchë yebʼixan che rä chqä rchë yechʼö rkʼë. Y jojun mul pa jun junaʼ nkiʼän nmaʼq taq moloj.
2. ¿Achkë xtatamaj pa qamoloj?
Chkipan ri qamoloj nkʼut ri Ruchʼaʼäl Dios chqawäch chqä yeqʼalajsäx ri naʼoj ye kʼo chpan (taskʼij ruwäch Nehemías 8:8). We rït xkatapon pa qamoloj, xtatamaj más chrij Jehová chqä chkij ri jaʼäl taq naʼoj ye kʼo rkʼë. Taq más xtqʼalajin chawäch chë ryä yatrajoʼ, más xtarayij xkatok rachiʼil. Chqä xtatamaj achkë rubʼanik yaturtoʼ ryä rchë kiʼ akʼuʼx naʼän pan akʼaslemal (Isaías 48:17, 18).
3. ¿Achkë rubʼanik xkatkitoʼ ri winäq ri xtatamaj kiwäch pa qamoloj?
Jehová nuʼij chqë chë «qchʼpü (qchʼobʼon) chkij ri nkʼaj chik rchë nqakʼüt ajowabʼäl chqawäch chqä rchë yeqaʼän utziläj taq bʼanobʼäl. Y ma tqayaʼ ta qa ri qamoloj» (Hebreos 10:24, 25). Chkipan ri qamoloj xtatamaj kiwäch winäq ri kan nkajoʼ kiʼ y, achiʼel rït, nkajoʼ chqä nkitamaj más chrij Dios. Chriʼ xtakʼoxaj utziläj taq naʼoj ri elesan pä chpan le Biblia (taskʼij ruwäch Romanos 1:11, 12). Chqä xkakowin xkatzjon kikʼë winäq, ye kʼlan o ma ye kʼlan ta, ri kiqʼaxan jalajöj kiwäch kʼayewal pa kikʼaslemal. Ya reʼ xa xuʼ jojun rma ri nrajoʼ Jehová chë nqamöl qiʼ.
TQATAMAJ MÁS CHRIJ RE NAʼOJ REʼ
Tqatzʼetaʼ achkë yebʼan pa kimoloj ri testigos de Jehová y achkë rma kʼo utzil nukʼäm pä pan awiʼ ri yajeʼ chkipan ri moloj riʼ.
4. Ri kimoloj ri testigos de Jehová
Pa naʼäy siglo, ri cristianos rukʼulun wä chkë nkimöl kiʼ rchë nkiyaʼ ruqʼij Jehová (Romanos 16:3-5). Tiskʼij ruwäch Colosenses 3:16 y kixtzjon chrij reʼ:
¿Achkë rubʼanik xkiyaʼ ruqʼij Jehová ri naʼäy taq cristianos?
Komä chqä, ri Testigos chaq taqïl nkimöl kiʼ rchë nkiyaʼ ruqʼij Jehová. Rchë natamaj achkë yebʼan pa kimoloj, titzʼetaʼ ri VIDEO. Chrij riʼ titzʼetaʼ ri achbʼäl ri akuchï nqʼalajin jun moloj y kixtzjon chrij reʼ:
¿Achkë nuʼij Colosenses 3:16 ri ya riʼ chqä nbʼan chpan jun Salón del Reino?
Taq xatzʼët ri video o ri achbʼäl, ¿kʼo jun xqä chawäch chrij ri yebʼan pa qamoloj?
Tiskʼij ruwäch 2 Corintios 9:7 y kixtzjon chrij reʼ:
¿Achkë rma ma nkʼutüx ta päq pa kimoloj ri testigos de Jehová?
Junan titzʼetaʼ rkʼë ri najin nyaʼö atjonik achkë xttzʼet chpan jun chkë ri moloj rchë re semana reʼ.
¿Achkë peraj rchë ri moloj riʼ más xqä chawäch rït?
¿Ataman rït reʼ?
Pa jw.org xtawïl akuchï chqä achkë qʼij yebʼan qamoloj chkipan jalajöj tinamït.
Pa qamoloj yeyaʼöx tzijonem, nkʼut achkë rubʼanik ntzjöx le Biblia chqä yeyaʼöx videos. Taq nqachäp y nqakʼïs ri moloj, nqbʼixan y kʼo jun nchʼö rkʼë Dios pa qawiʼ jontir.
Chpan jojun peraj rchë ri qamoloj, jontir yekowin nkiyäk kiqʼaʼ rchë nkiʼij achkë xkitamaj qa chrij jun naʼoj.
Jontir ütz yeʼapon: achiʼaʼ, ixoqiʼ, winäq ri kʼo chik kijunaʼ, akʼalaʼ...
Ri kimoloj ri testigos de Jehová ma tojon ta chqä ma nkʼutüx ta päq chkë ri yeʼapon.
5. Nkʼatzin nqatäj qaqʼij rchë nqbʼä pa qamoloj
Qchʼobʼon chrij ru-familia Jesús. Ryeʼ xjeʼ kachoch pa Nazaret y, rchë yebʼä ronojel junaʼ pa templo ri kʼo wä Jerusalén, kʼo chë xebʼiyïn jun oxiʼ qʼij chpan jun bʼey ri ruyon rojyuʼ ruwäch. Tiskʼij ruwäch Lucas 2:39-42 y kixtzjon chrij reʼ:
¿Naʼij rït chë ryeʼ kʼo kʼayewal xuʼän chkiwäch rchë xebʼä Jerusalén?
Y rït, ¿achkë kʼayewal rubʼanon chawäch rchë yabʼä pa qamoloj?
¿Naʼij rït chë kʼo utzil nukʼäm pä pan awiʼ we natäj aqʼij rchë yabʼä pa qamoloj? ¿Achkë rma?
Le Biblia nukʼüt chë kan kowan ruqʼij nqamöl qiʼ rchë nqayaʼ ruqʼij Jehová. Tiskʼij ruwäch Hebreos 10:24, 25 y kixtzjon chrij reʼ:
¿Achkë rma ronojel mul kʼo chë nqbʼä pa qamoloj?
JOJUN WINÄQ NKIʼIJ REʼ: «Ma nkʼatzin ta namöl awiʼ kikʼë nkʼaj chik rchë nayaʼ ruqʼij Dios. Yë rït yachaʼö we nawajoʼ yabʼä pa jun religión o manä».
¿Achkë texto o tzʼetbʼäl chpan le Biblia nukʼüt chqawäch achkë nrajoʼ Jehová chë nqaʼän?
RI XQATAMAJ QA
Ri qamoloj xkatkitoʼ rchë xtatamaj más ruwäch Jehová, rchë más junan xtuʼän awäch rkʼë chqä rchë xtayaʼ ruqʼij kikʼë nkʼaj chik winäq.
Tqakamluj ri xqatzʼët qa
¿Achkë rma Jehová nrajoʼ chë nqamöl qiʼ?
¿Achkë xtatamaj pa kimoloj ri testigos de Jehová?
¿Achkë chik jun rubʼanik naʼij rït chë yaturtoʼ ri yabʼä pa qamoloj?
RCHË NATAMAJ MÁS
¿Naxiʼij jbʼaʼ awiʼ yatapon pa qamoloj? Tatzʼetaʼ achkë rma jun achï xqä chwäch ri qamoloj tapeʼ pa naʼäy ke riʼ chqä xnaʼ.
Tatamaj ruwäch jun kʼajol ri nqä wä chwäch nbʼä pa qamoloj y tatzʼetaʼ achkë kʼo chë xuʼän rchë ronojel mul xbʼä chkipan.
Tatzʼetaʼ achkë nkiʼij nkʼaj chik chkij ri qamoloj.
«¿Achkë rma ütz yibʼä chkipan ri moloj yebʼan pa Salón del Reino?» (Reʼ xtawïl pa jw.org)
Tatzʼetaʼ achkë rubʼanik ri kimoloj ri testigos de Jehová xjäl rukʼaslemal jun achï ri xok aleqʼon ojer.
«Ronojel mul nkʼwan wä n-arma wkʼë» (Ri Chajinel, 1 de julio, 2014)