Tabʼanaʼ apü ri najowatäj rchë xkakowin xtatoʼ awiʼ we kʼo jun natqelbʼej

¿Achkë rma nkʼatzin? Xa bʼa achkë chqë röj rkʼë jbʼaʼ kʼo jun nbʼanatäj rkʼë ri xtuʼän chë xtkʼatzin xtbʼä rkʼë doctor o pan hospital. Taq majanä tbʼanatäj riʼ, röj kʼo chë nqaksaj ri toʼïk yaʼon chqë we nqajoʼ chë kan ütz rubʼanik nqknäx (nqojqʼomäx). Ke riʼ xtqakʼüt chë qakʼaslemal chqä rupixaʼ Jehová chrij ri kïkʼ kan kʼo kiqʼij chqawäch röj (Hch 15:28, 29).

¿Achkë rubʼanik naʼän apü ri najowatäj?

• Taq xaquʼ yän rij achkë nuquʼ Jehová chrij ri kïkʼ chqä xachʼö yän rkʼë, tanujsaj ri wuj DPA, ri xtkʼüt chkiwäch ri doctores achkë nawajoʼ nbʼan awkʼë.a Ri yeqasan chik pa yaʼ ütz nkikʼutuj re wuj reʼ che rä ri qachʼalal ri ntzʼetö ri publicaciones, y ri teʼej tataʼaj ütz nkikʼutuj ri wuj Tarjeta de identidad (ic) rchë nkiyaʼ chkë kalkʼwal ri majanä tuʼän 18 kijunaʼ.

• We yït kʼo pa yabʼil, takʼutuj chkë ri ukʼwäy taq bʼey ri wuj Información para mujeres embarazadas (S-401), ri xkaturtoʼ rchë xkakowin xtaʼij che rä ri doctor achkë nawajoʼ nbʼan awkʼë taq yït kʼo pa yabʼil o taq najin yatalan.

• We nkʼatzin yabʼan operar o nbʼix chawä chë nkʼatzin yakanaj qa pan hospital, kan taʼij apü chkë ri ukʼwäy taq bʼey. Chqä taʼij chkë ri ye kʼo pan hospital chë nawajoʼ chë jun ri petenäq pa kibʼiʼ ri testigos de Jehová napon awkʼë.

¿Achkë rubʼanik xkatkitoʼ ri ukʼwäy taq bʼey? Ryeʼ ütz yatkitoʼ rchë nanujsaj ri wuj DPA, ye kʼa we kʼo nkʼatzin nbʼan awkʼë, ma yë ta ryeʼ xkebʼin achkë xtbʼan awkʼë chqä ma xtkiʼij ta chawä achkë nkinaʼ ryeʼ chë más ütz naʼän (Ro 14:12; Gál 6:5). Taq xtaʼij chkë ri ukʼwäy taq bʼey chë ri doctores nkiʼij chë xtkʼatzin kïkʼ chawä, ryeʼ chanin xketzjon äl pan abʼiʼ rkʼë ri Comité de Enlace con los Hospitales (CEH).

¿Achkë rubʼanik xkatkitoʼ ri CEH? Ri qachʼalal ri ye kʼo chpan re comité reʼ yetjon rchë yekitoʼ ri doctores chqä ri yesmajin ri leyes chë tqʼax chkiwäch achkë rma röj ma nqajoʼ ta nyaʼöx kïkʼ chqë. Ryeʼ yekowin nkiʼij chkë ri doctores ri najin yetzʼetö awchë achkë ütz nkiʼän rchë ma nkiksaj ta kïkʼ awkʼë. We kan nkʼatzin, ryeʼ chqä xkatkitoʼ rchë xtawïl jun doctor ri ma xtyaʼ ta kïkʼ chawä.

TAQ XATZʼËT YÄN RI VIDEO ¿ACHKË XKATOʼÖ RCHË XTACHAʼ XTAʼÄN RI ÜTZ RKʼË RUKSAXIK RI KÏKʼ?, TAQʼALAJSAJ RE KʼUTUNÏK REʼ:

• ¿Achkë ütz naʼän apü rchë taq kʼo xtatqelbʼej xkakowin xtatoʼ awiʼ taq xtbʼix chawä chë nkʼatzin kïkʼ chawä?

  Your answer