«Xküy kimak» ri winäq ri xejeʼ ojer

Ri nbʼanö chë röj nkuy qamak ya riʼ rukʼaslemal xyaʼ Jesús pa kamïk (Efes. 1:7). Tapeʼ ke riʼ, le Biblia nuʼij chë «Dios ma xikʼo ta rukʼuʼx kikʼë ri winäq ri xejeʼ ojer chqä xküy kimak» (Rom. 3:25, nota). Reʼ ntel chë tzij chë Jehová xküy kimak jojun winäq tapeʼ Jesús majanä wä tyaʼ rukʼaslemal pa kamïk. ¿Achkë rma ryä xkowin xuʼän riʼ?

Taq Jehová xuʼij chë «rujatzul ri ixöq» xkeruköl ri winäq ri xtkikʼuqbʼaʼ kikʼuʼx chrij ryä, chwäch Jehová achiʼel ta xeruköl yän ri winäq riʼ (Gén. 3:15; 22:18). Ryä retaman wä chë, taq xtbʼeqä ri qʼij riʼ, Jesús ma xtkʼewaj ta xtyaʼ rukʼaslemal pa kamïk rchë xkeruköl ri winäq (Gál. 4:4; Heb. 10:7-10). Taq Jesús xtaq pä chwäch le Ruwachʼlew rma Dios, ryä xjeʼ uchqʼaʼ pa ruqʼaʼ rchë xeruküy ri winäq ri xjeʼ kikʼuqbʼäl kʼuʼx. Tapeʼ ryä majanä wä tyaʼ rukʼaslemal pa kamïk, retaman wä chë rukamik xttöj chqä kimak ri winäq riʼ (Mat. 9:2-6).