¿Yenatäj reʼ chawä?

¿Yeʼaskʼin ri wuj Ri Chajinel ri ye lenäq chpan re jnaʼ reʼ? Tatzʼetaʼ we yakowin yeʼaqʼalajsaj re kʼutunïk reʼ:

¿Achkë nukʼüt qa Jehová chqawäch chrij ri qanaʼoj nkʼatzin nqaʼän kikʼë ri ixoqiʼ?

Chwäch ryä, ri ixoqiʼ kan jnan kiqʼij kikʼë ri achiʼaʼ. Ryä nuyaʼ rxkïn chkë, kan kowan rqʼij chwäch ri nkinaʼ chqä ri nkiqʼaxaj, y rkʼuqbʼan rkʼuʼx chë ryeʼ xkekowin xtkiʼän ri samaj ryaʼon qa pa kiqʼaʼ (w24.01, rxaq 15 chqä 16).

¿Achkë rbʼanik nqasmajij Efesios 5:7, ri nuʼij: «Ma tiʼän ta ri nkiʼän ri winäq riʼ»?

Ri apóstol Pablo xuʼij chë ma ütz ta nqakʼwaj qiʼ kikʼë winäq ri nkiʼän chqë chë ma nqanmaj ta chik rtzij Jehová. Re naʼoj reʼ nkʼatzin chqä nqasmajij yajün kikʼë winäq ri ye kʼo pa taq redes sociales (w24.03, rxaq 22 chqä 23).

¿Achkë ütz nqaʼän we kʼo jun ntzjöx chqë ri ma tzij ta?

Nkʼatzin nqachajij qiʼ taq jun qamigo kʼo jun nutzjoj chqë ri ma rtzʼeton ta na we kantzij o manä, taq yeʼok pä correos qkʼë ri yetaq pä chqë kimä winäq ri ma qataman ta kiwäch chqä nkʼatzin nqachajij qiʼ rkʼë ri nkiʼij ri apóstatas ri nkikʼüt chë achiʼel ta nkajoʼ nkitamaj más chrij le Biblia (w24.04, rxaq 12).

¿Achkë qataman y achkë ma qataman ta chrij rbʼanik xtqʼät tzij Jehová pa rwiʼ Salomón, pa kiwiʼ ri winäq ri xekäm Sodoma y Gomorra chqä pa rqʼij qa Noé?

Ma qataman ta we Jehová xkerkʼasoj na pä, ye kʼa qataman chë ryä xtzʼët achkë kʼo pa kan chqä chë ryä jun Dios ri kan nupoqonaj qawäch (w24.05, rxaq 3 chqä 4).

¿Achkë nqatamaj qa taq le Biblia nuʼij chë Jehová ya riʼ «ri Abʼäj»? (Deut. 32:4).

Chë ütz nqatoʼ qiʼ rkʼë Jehová rma ryä nqrtoʼ chqä nqrchajij, kan ütz nqakʼuqbʼaʼ qakʼuʼx chrij rma kan nuʼän ri nutzüj chqä ma nujäl ta rnaʼoj chqä ri nuquʼ nuʼän (w24.06, rxaq 26 kʼa 28).

¿Achkë ütz nqaʼän rchë nkʼuluj chqë nqjeʼ chpan jun chik congregación?

Nqakʼuqbʼaʼ qakʼuʼx chë Jehová xtqrtoʼ pä achiʼel xertoʼ ri winäq ri xkiyaʼ rqʼij ojer, ma yeqajnamaj ta ri congregaciones, nqatäj qaqʼij rchë nqjeʼ rkʼë qacongregación chqä yeqakanuj nkʼaj chik qamigos (w24.07, rxaq 26 kʼa 28).

¿Achkë nqatamaj qa chkij ri oxiʼ kʼambʼäl taq tzij nqïl chpan ri capítulo 25 rchë Mateo?

Ri kʼambʼäl tzij chkij ri karneʼl chqä ri kʼsïkʼ nukʼüt chë nkʼatzin nqanmaj rtzij Jehová. Ri kʼambʼäl tzij chkij ri 10 qʼopojiʼ nukʼüt chë nkʼatzin nqayoʼej ri qʼij taq xtchup rwäch ri itzelal. Y ri kʼambʼäl tzij chrij ri päq xyaʼ qa jun achï pa kiqʼaʼ oxiʼ rsamajelaʼ, nukʼüt chë nkʼatzin nq·ok aj samajel taq winäq (w24.09, rxaq 20 kʼa 24).

¿Jaruʼ wä rjtolen ri pórtico ri kʼo wä chuchiʼ ri templo ri xuʼän Salomón?

Chkiwäch jojun wuj ri xebʼan ojer, 2 Crónicas 3:4 nuʼij chë «120 codos» rjtolen, ntel chë tzij 53 metros. Ye kʼa chkiwäch jojun chik wuj ri kan ye kʼïy kikʼuqbʼan kikʼuʼx chkij nuʼij «20 codos», ntel chë tzij 9 metros. Achiʼel ta más ütz yeqanmaj ri wuj ri nkiʼij 20 codos, rma rparedes ri templo ma kan ta kowan wä yepin (w24.10, rxaq 31).

¿Achkë ntel chë tzij chë ri siervos ministeriales ri ye kʼlan «kʼo chë xa xuʼ rkʼë jun ixöq ye kʼlan wä»? (1 Tim. 3:12).

Ntel chë tzij chë kʼo chë xa xuʼ jun rxjayil njeʼ chqä ma nukanuj ta rkʼexel rkʼlaj. Chqä kʼo chë ma yernäq ta nkʼaj chik ixoqiʼ (w24.11, rxaq 19).

¿Achkë rma qataman chë Juan 6:53 ma rkʼwan ta riʼ rkʼë ri xuʼij Jesús chpan ri rkʼisbʼäl waʼin?

Chpan Juan 6:53, Jesús xuʼij chkë jojun winäq ri ye kʼo wä Galilea chë nkʼatzin nkitäj rchʼakul chqä rkikʼel. Ryä xuʼij ya reʼ pa jnaʼ 32 chkë judíos ri majanä wä nkikʼuqbʼaʼ kikʼuʼx chrij ryä. Ye kʼa jun jnaʼ chrij riʼ, taq xuʼän ri rkʼisbʼäl waʼin, ryä kan kikʼë rtzeqelbʼëy xtzjon wä, ntel chë tzij, kikʼë ri yechaʼon rchë xtkiqʼät tzij rkʼë ryä chlaʼ chkaj (w24.12, rxaq 10 chqä 11).