¿Achkë ütz naʼän rchë natoʼ awestudiante rchë nuchaʼ nuyaʼ rqʼij Jehová?

1, 2. a) ¿Achkë rma jojun estudiantes kwest nuʼän chkiwäch yeʼok testigos de Jehová? b) ¿Achkë xtqatzʼët chpan re tjonïk reʼ?

TAQ rït xaquʼ yatok testigo de Jehová, ¿kʼo komä xbʼanö chawä chë xa kaʼiʼ akʼuʼx xaʼän? Rkʼë jbʼaʼ xaxiʼij awiʼ chë ri awachiʼil pan asamaj, awamigos o afamilia xtpë kiyowal chawä. O rkʼë jbʼaʼ xaquʼ chë majun bʼëy xkakowin ta xtaʼän ri nrajoʼ Dios. We ke riʼ, kan xtqʼax chawäch achkë nkinaʼ ri estudiantes ri kan kwest nuʼän chkiwäch yeʼok testigos de Jehová.

² Jesús rtaman wä chë taq jun winäq kowan nuquʼ achkë xtbʼanatäj rkʼë we xtyaʼ rqʼij Jehová, rkʼë jbʼaʼ ya riʼ xtqʼatö rchë chë ma nuʼän ta riʼ (Mat. 13:20-22). Ye kʼa ryä xkʼuqbʼaʼ rkʼuʼx chkij ri winäq ri kowan xkiquʼ we yeʼok rtzeqelbʼëy ryä o manä. Si nqakʼän qanaʼoj chrij Jesús, xtqkowin xkeqatoʼ qestudiantes rchë 1) nkitzʼët achkë najin nqʼatö kichë rchë ma nkiyaʼ ta rqʼij Dios, 2) nkajoʼ más Jehová, 3) nkiyaʼ más rejqalen ri achkë kʼo más kiqʼij y 4) yeqʼax chwäch ri kʼayewal kilon. ¿Achkë rbʼanik nqakʼän qanaʼoj chrij Jesús y nqaksaj ri libro Nawajoʼ rït yakʼaseʼ rchë nqatoʼ jun qestudiante rchë ntok testigo de Jehová?

TATOʼ AWESTUDIANTE RCHË NUTZʼËT ACHKË NAJIN NQʼATÖ RCHË

3. ¿Achkë rkʼë jbʼaʼ xqʼatö rchë Nicodemo rchë ma xok ta rtzeqelbʼëy Jesús?

³ Nicodemo kan kowan wä rqʼij chqä xok jun kʼamöl bʼey chkiwäch ri judíos. Re achï reʼ kʼo jun xqʼatö rchë chë ma xok ta rtzeqelbʼëy Jesús. Taq Jesús xa kʼa riʼ jun 6 ikʼ rchapon rtzjoxik rchʼaʼäl Dios chkë ri winäq, Nicodemo ya rtaman chik chë Jesús ya riʼ ri Mesías (Juan 3:1, 2). Tapeʼ ke riʼ, ryä pan ewäl xtzjon rkʼë Jesús «rma nuxiʼij wä riʼ chkiwäch ri judíos» (Juan 7:13; 12:42). Rkʼë jbʼaʼ xquʼ rij jontir ri ma xtjeʼ ta chik rkʼë we xttok rtzeqelbʼëy Jesús.a

4. ¿Achkë rbʼanik xtoʼöx Nicodemo rma Jesús rchë xqʼax chwäch achkë nrajoʼ Dios rchë nuʼän?

⁴ Nicodemo rtaman wä achkë nuʼij Rpixaʼ Moisés, ye kʼa nkʼatzin wä rtoʼik rchë nqʼax chwäch achkë nrajoʼ Jehová rchë nuʼän. ¿Achkë rbʼanik xtoʼöx rma Jesús? Jesús xjäm rwäch rchë xtzjon rkʼë, y kʼo mul kan chaqʼaʼ xuʼän riʼ. Chqä kan chöj xuʼij che rä Nicodemo achkë nkʼatzin nuʼän rchë ntok rtzeqelbʼëy: nutzolij riʼ che rä rmak, nqasäx pa yaʼ y nukʼüt chë rkʼuqbʼan rkʼuʼx chrij Rkʼajol Dios (Juan 3:5, 14-21).

5. ¿Achkë ütz nqaʼän rchë nqatoʼ jun qestudiante rchë nutzʼët achkë najin nqʼatö rchë chë ma nuyaʼ ta rqʼij Jehová?

⁵ Rkʼë jbʼaʼ jun qestudiante rtaman achkë nuʼij le Biblia, ye kʼa nkʼatzin rtoʼik rchë nutzʼët achkë najin nqʼatö rchë chë nuyaʼ rqʼij Jehová. Rkʼë jbʼaʼ ryaʼon más ran chrij rsamaj, o rkʼë jbʼaʼ rfamilia ma nkajoʼ ta chë ryä ntok Testigo. ¿Achkë ütz naʼän rït rchë nakʼän anaʼoj chrij Jesús? Ri ütz naʼän ya riʼ najäm awäch rchë yatzjon rkʼë awestudiante. Rkʼë jbʼaʼ ütz naʼän invitar rchë nibʼetjaʼ jun icafé rkʼë o yixbʼebʼiyaj. We xtaʼän ya riʼ rkʼë, rkʼë jbʼaʼ ryä ma kwest ta más xtuʼän chwäch xttzjoj chawä achkë najin nuqʼaxaj. Y taq xttzjoj chawä, rït xkakowin xtatoʼ rchë nutzʼët achkë ütz nuʼän chqä nanataj che rä chë ryä nuʼän riʼ rma nrajoʼ Jehová, y ma xa xuʼ ta rma nrajoʼ nuʼän ri nqä chawäch rït.

6. ¿Achkë rbʼanik natoʼ awestudiante rchë nusmajij ri najin nutamaj? (1 Corintios 16:13).

⁶ Rchë jun qestudiante nusmajij ri najin nutamaj, ryä nkʼatzin nuyaʼ chwäch ran chë Jehová xttoʼ pä rchë xtsmajij rpixaʼ (taskʼij 1 Corintios 16:13). ¿Achkë ütz naʼän rït rchë nayaʼ rtoʼik? Taquʼ na peʼ taq rït xabʼä pan escuela. ¿Achkë chë maestro xqä más chawäch rït? Rkʼë jbʼaʼ ri maestro ri ma xikʼo ta rkʼuʼx awkʼë chqä xaturtoʼ rchë xatzʼët chë kʼo kʼïy yakowin naʼän. Tatjaʼ aqʼij rchë naʼän achiʼel xuʼän ri maestro riʼ. Ma xa xuʼ ta takʼutuʼ chwäch awestudiante achkë nrajoʼ Jehová rchë nuʼän, xa taʼij chqä che rä chë Jehová xttoʼ pä rchë xtjäl ri nkʼatzin pa rkʼaslemal. ¿Achkë más nkʼatzin naʼän rchë natoʼ awestudiante?

TATOʼ AWESTUDIANTE RCHË NRAJOʼ MÁS JEHOVÁ

7. ¿Achkë rbʼanik xertoʼ Jesús ri winäq ri xekʼoxan rchë chë xkajoʼ más Jehová?

⁷ Jesús rtaman wä chë, we rtzeqelbʼëy nkajoʼ Dios, ma kwest ta xtuʼän chkiwäch xtkismajij ri najin nkitamaj. Rma riʼ chaq taqïl xerkʼüt naʼoj chkiwäch ri xertoʼ rchë xkajoʼ más Jehová. Tqaquʼ rij ya reʼ, kʼo jmul Jesús xjnamaj Rtat rkʼë jun achï ri kowan yerajoʼ ralkʼwal chqä kan kʼïy achkë ütz nuyaʼ chkë (Mat. 7:9-11). Jojun chkë ri winäq ri xekʼoxan rchë Jesús rkʼë jbʼaʼ ma xejowäx ta rma kitat. Rma riʼ, taquʼ na peʼ achkë xkinaʼ taq Jesús xtzjon chrij jun ütz tataʼaj ri kan kiʼ rkʼuʼx xkʼül chik jmul rkʼajol taq xyaʼ yän qa ri ma ütz kʼaslemal xkʼwaj. Ya reʼ xertoʼ ri winäq riʼ rchë xqʼax chkiwäch chë Jehová kowan yerajoʼ ri winäq (Luc. 15:20-24).

8. ¿Achkë rbʼanik natoʼ jun awestudiante rchë nrajoʼ más Jehová?

⁸ Rït chqä yakowin natoʼ awestudiante rchë nrajoʼ más Jehová, y ütz naʼän riʼ taq nayaʼ rejqalen ri ütz taq naʼoj ri ye kʼo rkʼë Dios. Ronojel mul ri xtitjoj iwiʼ, takʼutuʼ chwäch achkë rbʼanik rkʼwan riʼ ri najin nutamaj rkʼë rbʼanik najowan Jehová. Y, taq xtitzʼët ri tjonïk ri ntzjon chrij rkʼaslemal xyaʼ Jesús pa kamïk, tatoʼ rchë nqʼax chwäch chë ya riʼ jun spanïk xyaʼ Dios che rä ryä (Rom. 5:8; 1 Juan 4:10). Si jun qestudiante nqʼax chwäch chë kowan najowäx rma Jehová, rkʼë jbʼaʼ ryä chqä xtrajoʼ más Jehová (Gál. 2:20).

9. ¿Achkë xtoʼö rchë Michael rchë xjäl rbʼanik rkʼaslemal?

⁹ Tqatzʼetaʼ ri xbʼanatäj rkʼë Michael, ri aj Indonesia. Ryä xtamaj rwäch Jehová taq kʼa koʼöl na, ye kʼa ma xqasäx ta pa yaʼ. Taq ryä kʼo wä 18 rjnaʼ, xbʼä jkʼan chik tinamït rchë xok chofer kichë camiones. Chrij riʼ, ryä xtzolin Indonesia, xkʼleʼ chqä xjeʼ jun rmiʼal. Ye kʼa, kʼa xsamäj na pa jun chik tinamït, näj che rä rfamilia. Taq xqʼax ri tiempo, rxjayil chqä rmiʼal xkichäp kitjonik chrij le Biblia chqä kʼo xkijäl pa kikʼaslemal. Taq rteʼ Michael xkäm, ryä xtzolin chrachoch rchë nuchajij rtat, chqä xrajoʼ xyaʼöx rtjonik chrij le Biblia. Taq xapon chpan ri tjonïk 27 rchë ri libro Nawajoʼ rït yakʼaseʼ, kan xapon pa ran ri xtamaj chpan ri peraj «Tqatamaj más chrij re naʼoj reʼ». Michael xchäp oqʼej taq xquʼ achkë xnaʼ Jehová taq xtzʼët chë Rkʼajol kowan najin nutäj poqän. Rma kowan xtyoxin chë Jehová xyaʼ Rkʼajol pa kamïk qmä röj, ryä xjäl rbʼanik rkʼaslemal chqä xqasäx pa yaʼ.

TATOʼ AWESTUDIANTE RCHË NUYAʼ REJQALEN RI ACHKË KʼO MÁS KIQʼIJ

10. ¿Achkë xuʼän Jesús rchë xertoʼ ri naʼäy taq rtzeqelbʼëy rchë xqʼax chkiwäch achkë riʼ ri kʼo más rqʼij? (Lucas 5:5-11; tatzʼetaʼ chqä ri achbʼäl).

¹⁰ Ri naʼäy taq rtzeqelbʼëy Jesús kan chanin xqʼax chkiwäch chë Jesús ya riʼ ri Mesías, ye kʼa xkʼatzin xqʼax chkiwäch chë rtzjoxik ri ütz taq rtzjol ya riʼ jun chkë ri nkʼatzin njeʼ más rqʼij pa kikʼaslemal. Pedro chqä Andrés, ye rtzeqelbʼëy wä chik Jesús taq ryä xuʼij chkë chë tkiyaʼ qa jontir rchë nkitzeqelbʼej ryä (Mat. 4:18, 19). Pedro, Andrés, Santiago chqä Juan, kʼo wä jun kinegocio rchë yekichäp kär chqä yekikʼayij, y kan ütz wä lenäq chkiwäch (Mar. 1:16-20). Taq Pedro chqä Andrés «xkiyaʼ qa kiyaʼl» rchë nkichäp kär, rkʼë jbʼaʼ xkikanuj rbʼanik rchë kifamilia njeʼ jontir ri nkʼatzin chkë taq ryeʼ xkebʼä rkʼë Jesús. ¿Achkë xtoʼö kichë rchë xqʼax chkiwäch achkë riʼ ri kʼo más kiqʼij? Lucas nuʼij chë Jesús xuʼän jun milagro ri xertoʼ rchë xkikʼuqbʼaʼ kikʼuʼx chë Jehová xtyaʼ jontir ri nkʼatzin chkë (taskʼij Lucas 5:5-11).

11. ¿Achkë rbʼanik nqatoʼ qestudiante rchë nukʼuqbʼaʼ más rkʼuʼx chrij Jehová?

¹¹ Röj ma nqkowin ta nqaʼän milagros achiʼel xuʼän Jesús, ye kʼa nqkowin nqaʼij che rä qestudiante chë Jehová yertoʼ ri winäq ri nkiyaʼ ryä naʼäy pa kikʼaslemal. Taquʼ rij ya reʼ. ¿Nnatäj chawä achkë rbʼanik xaturtoʼ pä Jehová taq rït xachäp xabʼä pa qamoloj? Rkʼë jbʼaʼ xkʼatzin xatzjon rkʼë apatrón, y xaʼij che rä chë ma xkakowin ta xkasamäj más horas we ya riʼ xkaturqʼät rchë ma xkabʼä ta pa qamoloj. Taʼij che rä awestudiante chë taq rït xaʼän riʼ, xatzʼët achkë rbʼanik xaturtoʼ pä Dios y achkë rbʼanik xakʼuqbʼaʼ más akʼuʼx chrij ryä.

12. a) ¿Achkë rma ütz yeqakʼwaj jalajöj qachʼalal qkʼë taq nqayaʼ rtjonik jun qestudiante? b) ¿Achkë más yakowin naʼän rchë natoʼ awestudiante rchë nuyaʼ Jehová naʼäy pa rkʼaslemal? Tayaʼ jun ejemplo.

¹² Ri qestudiante kan xttoʼ chqä xttamaj achkë xkiʼän nkʼaj chik qachʼalal rchë xkiyaʼ Jehová naʼäy pa kikʼaslemal. Ye kʼo ye kʼïy qachʼalal ri kan kʼïy kiqʼaxan pä pa kikʼaslemal. ¿Ütz nuʼän chawäch rït yeʼakʼwaj jojun chkë ri qachʼalal riʼ taq xtayaʼ rtjonik awestudiante? Taʼij chkë qachʼalal chë tkitzjoj che rä achkë rbʼanik xkitamaj rwäch Jehová y achkë xkʼatzin xkiʼän rchë xkiyaʼ naʼäy Jehová pa kikʼaslemal. Chqä, ütz nawesaj jbʼaʼ tiempo rchë natzʼët rkʼë awestudiante jojun videos, achiʼel ri ye kʼo chpan ri peraj «Tqatamaj más chrij re naʼoj reʼ» o «Rchë natamaj más» ri kʼo chpan ri libro Nawajoʼ rït yakʼaseʼ. Jun ejemplo. Taq xtitzʼët ri tjonïk 37, ütz nayaʼ kejqalen ri naʼoj nitamaj qa chpan ri video Jehová xtyaʼ pä ri nkʼatzin chqë.

TATOʼ AWESTUDIANTE RCHË NQʼAX CHWÄCH RI KʼAYEWAL NAJIN NUQʼAXAJ

13. ¿Achkë xuʼän Jesús rchë xertjoj apü rtzeqelbʼëy rchë nkiköchʼ ri kʼayewal xtyaʼöx pa kiwiʼ?

¹³ Jesús kan kʼïy mul xuʼij chkë rtzeqelbʼëy chë ye kʼo winäq xtkiyaʼ kʼayewal pa kiwiʼ, yajün ri kifamilia (Mat. 5:11; 10:22, 36). Taq xa jbʼaʼ wä chik nrajoʼ rchë nkamsäx, Jesús xuʼij chkë chë xtxiʼin rij kikʼaslemal (Mat. 24:9; Juan 15:20; 16:2). Y, rchë ma xtkiyaʼ ta qa rtzjoxik ri ütz taq rtzjol, ryä xuʼij chkë chë tkichajij kiʼ taq xtkiʼän ri samaj riʼ chqä chë ma tkipabʼaʼ ta kiʼ chkiwäch ri winäq ri itzel nkinaʼ chkë.

14. ¿Achkë rbʼanik nqatoʼ jun qestudiante rchë xtköchʼ ri kʼayewal xtyaʼöx pa rwiʼ? (2 Timoteo 3:12).

¹⁴ Achiʼel xuʼän Jesús, röj chqä nqkowin nqatoʼ qestudiante rchë nuköchʼ ri kʼayewal xtyaʼöx pa rwiʼ, y ütz nqaʼän riʼ taq nqaʼij che rä achkë rkʼë jbʼaʼ xtkiʼän o xtkiʼij rchiʼil pa rsamaj, ramigos o rfamilia (taskʼij 2 Timoteo 3:12). Jojun chkë rchiʼil pa rsamaj rkʼë jbʼaʼ xketzeʼen chrij rma xjäl rbʼanik rkʼaslemal. Nkʼaj chik, rkʼë jbʼaʼ kifamilia itzel xketzjon chrij ri naʼoj ri xkitamaj chpan le Biblia. Rma riʼ rït ütz yatzjon yän rkʼë awestudiante chrij ri kʼayewal ri rkʼë jbʼaʼ xtrïl, rchë ke riʼ taq xtrïl ri kʼayewal riʼ, ryä ya rtaman chik achkë xtuʼän o achkë xtuʼij.

15. We rfamilia jun qestudiante npë kiyowal che rä ¿achkë ütz nqaʼän rchë nqatoʼ?

¹⁵ Si rfamilia jun qestudiante xpë kiyowal che rä rma ryä najin nutjoj riʼ chrij le Biblia, taʼij che rä chë tquʼ achkë rma ke riʼ nkiʼän che rä. ¿Nkiquʼ rfamilia chë xa najin nqʼol? O ¿kan itzel yekitzʼët ri Testigos? Jesús chqä ke riʼ xbʼanatäj rkʼë. Jojun chkë rchʼalal pa rachoch xkiquʼ chë xa xuʼän itzel rjolon (Mar. 3:21; Juan 7:5). Kan kowan nkʼatzin chë qestudiante nutamaj nuqʼät ryowal chqä nuquʼ na ri nuʼij chkë nkʼaj chik, yajün taq ntzjon rkʼë rfamilia.

16. ¿Achkë rbʼanik nqatoʼ qestudiante rchë kan pa rbʼeyal nutzjoj ri achkë nunmaj?

¹⁶ ¿Achkë ütz nuʼän jun qestudiante si kʼo jun rchʼalal nrajoʼ nutamaj más chrij ri nqanmaj röj? Más ütz chë ryä ma nutzjoj ta jontir ri rtaman, rma we xtuʼän riʼ, rchʼalal xa xtikʼo rkʼuʼx xtkʼoxaj y rkʼë jbʼaʼ ma xtrajoʼ ta chik xttamaj. Rma riʼ taʼij che rä awestudiante chë ma yalöj ta ttzjon rkʼë chqä ma kʼïy ta ttzjoj che rä, rchë ke riʼ jun chik qʼij, rchʼalal xtrajoʼ xttzjöx chik jmul le Biblia che rä (Col. 4:6). Ri qestudiante ütz chqä nutzjoj chkë rchʼalal chrij qasitio pa internet jw.org, rchë ke riʼ, we ryeʼ nkajoʼ, xkekowin xkeʼok pa qasitio rchë nkitamaj más chkij ri testigos de Jehová.

17. ¿Achkë toʼïk ütz naksaj rchë natjoj awestudiante rchë yerqʼalajsaj kʼutunïk ri yebʼan chkij ri testigos de Jehová? (Tatzʼetaʼ chqä ri achbʼäl).

¹⁷ Ütz naksaj ri peraj «Ri kʼutunïk ri nbʼan chkij ri testigos de Jehová» ri kʼo pa jw.org, rchë nakʼüt chwäch awestudiante achkë rbʼanik nuqʼalajsaj chwäch rfamilia o chkiwäch rchiʼil pa rsamaj ri nkajoʼ nkitamaj ryeʼ (2 Tim. 2:24, 25). Tnatäj chawä chë pa rkʼisbʼäl chkë ri tjonïk rchë ri libro Nawajoʼ rït yakʼaseʼ, kʼo ri recuadro «Jojun winäq nkiʼij reʼ». Taʼij che rä awestudiante chë tbʼanaʼ ensayar achkë ütz nuʼij apü we kʼo jun winäq xtbʼin che rä ri kʼo chpan ri peraj riʼ. Ma tamestaj ta chë rït chqä yakowin natoʼ rchë más ütz xtqʼalajsaj ri xtkʼutüx che rä. We xtiʼän ensayar rkʼë, ryä ma xtxiʼij ta riʼ xttzjoj ri achkë nunmaj.

18. ¿Achkë ütz naʼän rchë naʼij che rä awestudiante chë tyaʼ chwäch ntel chutzjoxik le Biblia rkʼë ri congregación? (Mateo 10:27).

¹⁸ Jesús xuʼij chkë rtzeqelbʼëy chë tkitzjoj ri ütz taq rtzjol chrij Rqʼatbʼäl Tzij Dios chkë jontir winäq (taskʼij Mateo 10:27). Taq jun qestudiante nuchäp yän rtzjoxik chkë nkʼaj chik chrij ri najin nutamaj, más chanin xtkʼuqbʼaʼ rkʼuʼx chrij Jehová rma xttzʼët achkë rbʼanik xttoʼöx pä rma ryä. ¿Achkë ütz naʼän rchë naʼij che rä awestudiante chë tyaʼ chwäch ntel chutzjoxik le Biblia rkʼë ri congregación? Taq xtyaʼöx rtzjol pa congregación chrij jun campaña chrij rtzjoxik le Biblia, rït ütz yatzjon rkʼë awestudiante chrij ri achkë nkʼatzin nuʼän rchë ntok publicador. Taʼij che rä chë, kʼïy mul, más chaq bʼaʼ nachäp natzjoj le Biblia taq kʼo jun campaña. Jun chik ri xttoʼö rchë, ya riʼ yerqʼaxaj rasignaciones chpan qamoloj ri nqaʼän chukojöl qʼij. We ryä xtuʼän riʼ, ma xtxiʼij ta chik riʼ xttzjoj ri achkë nunmaj.

TAKʼUTUʼ CHWÄCH AWESTUDIANTE CHË AKʼUQBʼAN AKʼUʼX CHRIJ

19. ¿Achkë rbʼanik xkʼüt Jesús chë xkʼuqbʼaʼ rkʼuʼx chkij rtzeqelbʼëy, y achkë rbʼanik nqakʼän qanaʼoj chrij?

¹⁹ Taq xa jbʼaʼ wä chik nrajoʼ rchë nkamsäx Jesús chqä rchë nbʼä chkaj, ryä xuʼij chkë rtzeqelbʼëy chë xkejeʼ chik jmul rkʼë. Chpan ri qʼij riʼ, ryeʼ ma xqʼax ta chkiwäch chë Jesús najin nuʼij chkë chë xkebʼä chkaj. Ye kʼa Jesús rtaman wä chë ryeʼ nkajoʼ wä nkinmaj rtzij ryä, rma riʼ ma xa xuʼ ta xtzuʼ chë ryeʼ kʼo ma qʼaxnäq ta chkiwäch (Juan 14:1-5, 8). Ryä rtaman wä chë xtkʼatzin na tiempo chkë rchë xtqʼax chkiwäch ri xkʼüt ryä chkiwäch, achiʼel chrij ri kʼaslemal chlaʼ chkaj (Juan 16:12). Röj chqä nqkowin nqakʼüt chwäch qestudiante chë qakʼuqbʼan qakʼuʼx chrij chqä chë qataman chë ryä nrajoʼ nuyaʼ rqʼij Jehová.

20. ¿Achkë xuʼän jun qachʼalal ixöq aj Malaui rchë xkʼüt chwäch restudiante chë rkʼuqbʼan rkʼuʼx chrij?

²⁰ Kan kowan nkʼatzin chë röj ronojel mul nqakʼuqbʼaʼ qakʼuʼx chrij qestudiante chqä nqayaʼ chwäch qan chë ryä nrajoʼ nuʼän ri ütz. Jun qachʼalal ixöq aj Malaui ri Tiarab rbʼiʼ, xchäp xyaʼ rtjonik ya Alicia, jun qʼopoj ri católico rreligión. Taq xeʼapon rkʼë ri tjonïk 14 rchë ri libro Nawajoʼ rït yakʼaseʼ, ya Tiara xkʼutuj che rä restudiante achkë nuquʼ chrij kiksaxik tyox rchë nyaʼöx rqʼij Dios. Ya Alicia xpë ryowal y xuʼij che rä: «¡Chqajujnal nqchaʼö achkë rbʼanik nqayaʼ rqʼij Dios!». Taq xkʼoxaj riʼ, ya Tiara xquʼ chë rkʼë jbʼaʼ ma xtyaʼ ta chik rtjonik ya Alicia. Ye kʼa ma xikʼo ta rkʼuʼx rkʼë chqä xyaʼ na rtjonik, rma rtaman chë kʼo jun qʼij rkʼë jbʼaʼ ya Alicia xtqʼax chwäch chë ma ütz ta nqayaʼ kiqʼij tyox. Jojun ikʼ chrij riʼ, ya Tiara xuʼän re kʼutunïk reʼ che rä ri kʼo chpan ri tjonïk 34: «¿Achkë rbʼanik yaturtoʼon pä ri natjoj awiʼ chrij le Biblia chqä natamaj rwäch Jehová?». Ya Tiara nuʼij: «Ya Alicia kʼo kʼïy ütz xeruʼij, y jun chkë riʼ ya riʼ chë ri Testigos majun ta jun nkiʼän ri xa nuqʼäj ri pixaʼ ye kʼo chpan le Biblia». Jbʼaʼ chrij riʼ, ya Alicia xyaʼ qa kiksaxik tyox chqä xqasäx pa yaʼ.

21. ¿Achkë ütz nqaʼän rchë nqatoʼ qestudiante rchë nuyaʼ rqʼij Jehová?

²¹ Tapeʼ röj qataman chë yë Dios «nbʼanö chë nkʼïy qʼanäj», röj chqä ütz nqatoʼ qestudiante rchë nuyaʼ rqʼij Jehová (1 Cor. 3:7). Ma xa xuʼ ta nqakʼüt chwäch achkë nrajoʼ Jehová rchë nqaʼän, xa nqatoʼ chqä rchë más nrajoʼ Dios. Chqä nqaʼij che rä chë tjalaʼ ri nkʼatzin pa rkʼaslemal rchë nukʼüt chë nrajoʼ Dios. Chqä, nqakʼüt chwäch achkë rbʼanik nukʼuqbʼaʼ rkʼuʼx chrij Jehová taq yerqʼaxaj kʼayewal. Taq röj nqakʼüt chwäch qestudiante chë qakʼuqbʼan qakʼuʼx chrij, najin nqatoʼ rchë ryä nuyaʼ chwäch ran chë xtkowin xtyaʼ rqʼij Jehová.