Ri políticos nkiʼij chë ya npë ri Armagedón | ¿Achkë nuʼij le Biblia chrij riʼ?

Ri nmaqʼaʼ rchë ri qʼij lunes 10 de octubre rchë ri junaʼ 2022, ri rusos xkikʼäq kʼïy misiles pa kiwiʼ jojun tinamït ri ye kʼo Ucrania. Ryeʼ xkiʼän riʼ rma pa jun kaʼiʼ qʼij qa jojun winäq xkiʼän chë xpaqʼapoʼ jun bomba ri xtzʼlaʼ jun puente ri kan kʼo rejqalen chwäch Rusia, rma nutün wä rutinamit rkʼë Crimea. Jontir riʼ xbʼanatäj taq jbʼaʼ qʼaxnäq chë jojun políticos xkiʼij chë ya npë ri Armagedón.

• «Kan pa ruqʼij qa Kennedy [presidente rchë Estados Unidos] chqä ri misiles chlaʼ Cuba, majun bʼëy chik tzʼeton ta chë ri Armagedón ya nbʼanatäj. [...] Rïn nnaʼ chë si yeqaksaj armas nucleares rchë nqatoʼ qiʼ, xa xuʼ xtqaʼän chë xtpë ri Armagedón» (Joe Biden, presidente rchë Estados Unidos, 6 de octubre, 2022).

• «Rïn chqä nnaʼ chë yoj kʼo chik chwäch ri Armagedón; kan jontir ri winäq nxiʼin kij» (tzij xeruʼij Volodímir Zelenski —presidente rchë Ucrania— taq xkʼutüx che rä achkë kʼayewal nukʼäm pä ri kiksaxik armas nucleares; BBC News, 8 de octubre, 2022).

¿Yë komä kiksaxik ri armas nucleares xtbʼanö chë xtpë ri Armagedón? ¿Achkë nuʼij le Biblia chrij riʼ?

¿Yë komä ri armas nucleares xkebʼanö chë xtpë ri Armagedón?

Manä. Ri tzij «Armagedón» xa xuʼ jmul nilitäj chpan le Biblia, chpan Apocalipsis 16:16. Ye kʼa reʼ ma ntzjon ta chrij jun chʼaʼoj ri nbʼanatäj chkiwäch tinamït, xa kan ntzjon chrij jun chʼaʼoj ri nuʼän Dios kikʼë «ri qʼatöy taq tzij ri ye kʼo chwäch le Ruwachʼlew» (Apocalipsis 16:14). Chpan Armagedón, Dios xtchüp kiwäch jontir ri qʼatbʼäl taq tzij (Daniel 2:44).

Rchë natamaj más chrij ri achkë xtbʼanatäj rkʼë le Ruwachʼlew chpan Armagedón, tatzʼetaʼ ri peraj «¿Qué es el Armagedón?».

¿Xtchup komä ruwäch le Ruwachʼlew chqä ri winäq ye kʼo chpan rma jun mamaʼ chʼaʼoj?

Manä. Rkʼë jbʼaʼ ri qʼatöy taq tzij xkekiksaj armas nucleares chqawäch apü, ye kʼa Dios ma xtyaʼ ta qʼij chë xtchup ruwäch le Ruwachʼlew. Le Biblia nuʼij reʼ:

• «Le Ruwachʼlew majun bʼëy xtchup ta ruwäch» (Eclesiastés 1:4).

• «Ri chöj kikʼaslemal xtyaʼöx qa le Ruwachʼlew chkë chqä majun bʼëy xkesäx ta äl chwäch» (Salmo 37:29).

Ye kʼa ri profecías ye kʼo chpan le Biblia chqä ronojel ri najin yebʼanatäj komä nkikʼüt chë yoj kʼo chpan jun tiempo ri kan kʼo rejqalen (Mateo 24:3-7; 2 Timoteo 3:1-5). Tatamaj achkë nuʼij le Biblia chrij ri achkë xkebʼanatäj chqawäch apü rkʼë ri tjonïk chrij le Biblia ri ma tojon ta ri nqayaʼ chkë ri winäq.