Jesús taq kʼajol na

Taq Jesús najin wä nkʼïy qʼanäj, José y María xejeʼ chik nkʼaj kalkʼwal, y Nazaret ye kʼo wä. José carpintero, y ke riʼ wä rbʼanik nutzüq rfamilia. Ryä chqä nukʼüt wä chkiwäch chrij Jehová chqä chrij rLey. Ryeʼ rkʼulun wä chkë yebʼä pa sinagoga rchë nkiyaʼ rqʼij Dios chqä ronojel jnaʼ yebʼä Jerusalén rchë nkiʼän ri Pascua.

Taq Jesús 12 wä rjnaʼ, ryä chqä rfamilia xebʼä Jerusalén. Kan ye kʼïy winäq xeʼapon rma ri Pascua. Taq xkʼis ri nmaqʼij, José y María xetzolin äl chkachoch. Ryeʼ kiquʼun wä chë Jesús bʼenäq äl chkikojöl kifamiliares. Pero, taq xkichäp rkanuxik, ma xkïl ta.

Rma riʼ xetzolin Jerusalén. Oxiʼ qʼij xkikanuj kʼa taq xkibʼewilaʼ pa templo. Jesús tzʼyül wä chkikojöl ri nkikʼüt ri rLey Moisés. Ryä najin wä nuyaʼ rxkïn chkë chqä kʼo wä nukʼutuj chkë. Ri achiʼaʼ riʼ kan ütz xkikʼoxaj ri xuʼij Jesús, rma riʼ xa yë chik ryeʼ kʼo xkikʼutuj che rä. Kan xel kikʼuʼx rma ri xuʼij Jesús chkë. Ryeʼ xkitzʼët chë kan nqʼax wä pa rjolon ri rLey Jehová.

José y María kan xkitäj kiqʼij chukanuxik. Rma riʼ María xuʼij: «Taʼ, kowan yatqakanun. ¿Akuchï xakanaj wä qa?». Jesús xuʼij: «Rïx kʼo ta chë itaman chë nkʼatzin yijeʼ pa rachoch Ntataʼ».

Jesús xtzolin Nazaret kikʼë rteʼ rtataʼ. Chriʼ, José xkʼüt carpintería chwäch Jesús. ¿Achkë naquʼ rït? ¿Achkë komä rnaʼoj Jesús taq kʼajol na? Taq Jesús xkʼïy qʼanäj, xjeʼ chqä más rnaʼoj. Rma riʼ, Dios chqä ri winäq más xkajoʼ.