¿Achkë kʼo chë nbʼän rchë yinok testigo de Jehová?

Chpan Mateo 28:19, 20, Jesús xkʼüt achkë nkʼatzin nuʼän jun winäq rchë ntok testigo de Jehová. Re versículos reʼ nkiqʼalajsaj chë, rchë chë jun winäq ntok rutzeqelbʼëy Jesús, nkʼatzin nutzjoj o nuqʼalajsaj ri rubʼiʼ Jehová.

Naʼäy: Nkʼatzin natamaj achkë nukʼüt le Biblia. Jesús xerutäq ri rutzeqelbʼëy rchë yekitjoj ri winäq rchë nkitzeqelbʼej ryä chqä rchë nkikʼüt chkiwäch achkë rubʼanik nkismajij ri rukʼutun qa (Mateo 28:19 20). Ri Tzij tzeqelbʼëy ntel chë tzij «tijoxel» o «jun winäq ri najin nkʼut chwäch». Chpan le Biblia, más rkʼë ri xkʼüt qa Jesús, nawïl kʼïy naʼoj ri xtkʼatzin chawä rchë nanaʼ kiʼkʼuxlal pa akʼaslemal y nanaʼ chë kʼo rma yït kʼäs (2 Timoteo 3:16, 17). Röj kan kiʼ qakʼuʼx xtqakʼüt chawäch ri nukʼüt le Biblia rkʼë jun tjonïk ri ma tojon ta (Mateo 10:7, 8; 1 Tesalonicenses 2:13).

Rukaʼn: Nkʼatzin yeʼasmajij ri naʼoj najin natamaj. Jesús xuʼij chkë ri rutzeqelbʼëy chë ma xa xuʼ ta tjeʼ kitamabʼal, xa kan nkʼatzin nkismajij ri xkʼüt qa ryä chkiwäch (Mateo 28:20). Re ntel chë tzij chë ma xa xuʼ ta rchë nkʼiyär atamabʼal natjoj awiʼ chrij le Biblia, rkʼë jbʼaʼ xtatzʼët chë xtkʼatzin xtajäl ri achʼobʼonik o ri abʼanobʼal (Hechos 10:42; Efesios 4:22-29; Hebreos 10:24, 25). Ri winäq ri yenman rutzij Jesús kan nkirayij yeʼok rutzeqelbʼëy, y rma riʼ nkijäch kikʼaslemal pa ruqʼaʼ Jehová (Mateo 16:24).

Rox: Yaqasäx pa yaʼ (Mateo 28:19). Chpan le Biblia nujnamaj jun bautismo rkʼë jun muqik (tajnamaj rkʼë Romanos 6:2-4). Ri nqqasäx pa yaʼ nukʼambʼej tzij chë xqayaʼ qa ri rubʼanik kʼaslemal qakʼwan qa y nqachäp äl chik jun kʼakʼakʼ rubʼanik. Rma riʼ, taq yaqasäx pa yaʼ, rït najin nakʼüt chkiwäch jontir chë yeʼasmajin chik ri kaʼiʼ naʼoj xuʼij qa Jesús rchë yatok rutzeqelbʼëy chqä chë najin nakʼutuj che rä Jehová chë tchʼajchʼobʼej a-conciencia (Hebreos 9:14; 1 Pedro 3:21).

¿Achkë rubʼanik ntamaj rïn we ütz chik yiqasäx pa yaʼ?

Katzjon kikʼë ri ukʼwäy taq bʼey. Ryeʼ xketzjon awkʼë rchë xtkitzʼët we qʼaxnäq chawäch ri nukʼüt le Biblia, we najin nasmajij ri najin natamaj y we abʼin chik che rä Jehová chë nawajoʼ naʼän ruraybʼal chpan akʼaslemal (Hechos 20:28; 1 Pedro 5:1-3).

¿Nkʼatzin komä nkiʼän jontir riʼ ri kalkʼwal ri Testigos?

Jaʼ. Röj yeqakʼiytisaj ri qalkʼwal «rkʼë ri pixabʼanïk chqä ri naʼoj yeruyaʼ Jehová» chpan le Biblia (Efesios 6:4). Ye kʼa, taq yekʼïy qʼanäj, yë ryeʼ yechaʼö we nkajoʼ nkitamaj, nkinmaj chqä nkismajij ri nuʼij le Biblia rchë yeqasäx pa yaʼ (Romanos 12:2). Ye kʼa, yë jun winäq nchaʼö we nuyaʼ ruqʼij Jehová o manä (Romanos 14:12; Gálatas 6:5).