¿Kan nkʼatzin komä nqbʼä chpan jun religión?

Ri nuʼij le Biblia

Jaʼ, nkʼatzin. Dios nrajoʼ chë nqamöl qiʼ kikʼë nkʼaj chik winäq rchë nqayaʼ ruqʼij. Le Biblia nuʼij: «Qchʼpü (qchʼobʼon) chkij ri nkʼaj chik rchë nqakʼüt ajowabʼäl chqawäch chqä rchë yeqaʼän utziläj taq bʼanobʼäl. Y ma tqayaʼ ta qa ri qamoloj» (Hebreos 10:24, 25).

Rkʼë ri xuʼij, Jesús xkʼüt chë rutzeqelbʼëy xkejeʼ chpan jun molaj winäq ri kan junan xtuʼän kiwäch. Ryä xuʼij: «Ke riʼ xtqʼalajin chkiwäch jontir chë rïx yïx nutzeqelbʼëy, we xtiwajowalaʼ iwiʼ chiwäch» (Juan 13:35). Jun rubʼanik rchë rutzeqelbʼëy Jesús xtkikʼüt chkiwäch ri kichiʼil chë yekajoʼ, ya riʼ taq yejeʼ junan. Rchë xtkiʼän riʼ, ryeʼ kʼo chë yejeʼ chkipan congregaciones chqä bʼanaqïl nkimöl kiʼ rchë nkiyaʼ ruqʼij Dios (1 Corintios 16:19). Jontir ryeʼ xkeʼok jun familia chwäch jontir le Ruwachʼlew (1 Pedro 2:17).

Kʼo chik jun ri nkʼatzin nqaʼän

Le Biblia nuʼij chë ri winäq kʼo chë nkimöl kiʼ rchë nkiyaʼ ruqʼij Dios. Ye kʼa, ma nuʼij ta chë jun winäq ütz ntzʼet rma Dios xa rma kʼo chik ru-religión. Ri winäq riʼ nkʼatzin nusmajij chpan rukʼaslemal ri nutamaj chpan ru-religión. Jun tzʼetbʼäl, le Biblia nuʼij: «Ri rubʼanik nyaʼöx ruqʼij ri Qatataʼ Dios [ri religión], ri kan chʼajchʼöj chwäch ryä, ya reʼ: yeqachajij ri mebʼaʼiʼ, ri malkaʼn taq ixoqiʼ taq najin nkiqʼaxaj kʼayewal chqä nqakʼwaj jun chʼajchʼöj kʼaslemal» (Santiago 1:27, nota).