Jun sacerdote xyaʼ qa ri Iglesia

Tatzjoj akʼaslemal chqë taq kʼa yït koʼöl na.

Xinaläx Italia pa junaʼ 1943. Ri wachʼalal chqä rïn xqkʼïy pä chpan jun koʼöl tinamït. Ri ntat nuʼän wä tkoʼn chqä carpintero. Ryä chqä nteʼ ye católicos, rma riʼ xojkikʼiytisaj pä chpan ri religión católica.

¿Achkë rma xawajoʼ xatok sacerdote?

Taq kʼa yïn koʼöl na, kowan wä nqä chi nwäch yibʼä pa misa rchë nkʼoxaj achkë nuʼij ri sacerdote. Nqä wä chi nwäch ruchʼaʼäl chqä ri yerubʼanalaʼ. Ya riʼ xbʼanö chwä rchë xinwajoʼ xinok sacerdote. Taq 13 wä njunaʼ, nteʼ xirukʼwaj chpan jun internado akuchï yetjöx ri kʼojolaʼ rchë yeʼok sacerdotes.

¿Xanukʼuj ruwäch le Biblia taq najin natjoj awiʼ rchë yatok sacerdote?

Ma kan ta kowan. Taq 15 wä njunaʼ, jun profesor xyaʼ jun libro chwä ri ye kʼo ri Evangelios chpan —ntel chë tzij, ri libros ri yetzjon chrij rukʼaslemal Jesús—, y kan kʼïy mul xinskʼij ruwäch. Taq xuʼän 18 njunaʼ, rïn xibʼä Roma rchë xinok chkipan universidades ri ye kʼo pa ruqʼaʼ ri papa. Chriʼ xintjoj wiʼ chrij ri latín, griego, historia, filosofía, psicología chqä teología. Tapeʼ nqakamluj wä ri versículos rchë le Biblia chqä nqakʼoxaj wä taq nskʼïx chqawäch pa taq domingos, röj ma nqanukʼuj ta wä ruwäch.

Taq xakʼwaj bʼey chpan ri seminario, ¿xeʼatjoj chqä ri nkʼaj chik?

Tapeʼ ri nsamaj rïn ya riʼ ntzʼët chë ütz nuʼän jontir chpan ri seminario, kʼo mul xinyaʼ chqä clases.

¿Achkë rma xuʼän kaʼiʼ awan chrij ri Iglesia?

Kʼo oxiʼ rma: rïn xintzʼët chë ri iglesia kan nutïtzʼ riʼ pa política, chë majun ta achkë nkiʼij chkë ri sacerdotes chqä ri winäq tapeʼ yekiʼän itzel taq bʼanobʼäl, chqä chë jojun naʼoj ri nkikʼüt ma rukʼwan ta riʼ rkʼë le Biblia. Rïn nquʼ wä rij reʼ: ¿kantzij komä chë Dios, ri kowan najowan, nuyaʼ pa qʼaqʼ jun winäq taq nkäm? ¿nrajoʼ komä ryä chë xa xuʼ nqakamluj kʼïy mul jojun tzij taq nqchʼö rkʼë?a

Chrij riʼ, ¿achkë xaʼän?

Kan rkʼë oqʼej xinbʼij che rä Dios chë kirutoʼ. Chrij riʼ, xinlöqʼ jun Biblia de Jerusalén, ri majanäj ta tqʼaxäx qa pa chʼaʼäl italiano, y xinchäp ruskʼixik. Jun domingo nmaqʼaʼ, taq najin ntzeqebʼaʼ ri ntzyaq rchë sacerdote ri xinksaj rchë xinyaʼ ri misa, xeʼapon kaʼiʼ achiʼaʼ pa seminario. Ryeʼ xkiʼij chwä chë ye testigos de Jehová y xqachäp tzij. Más jun hora xqtzjon chrij le Biblia chqä ri nuʼij chrij ri religión ri nqä chwäch Dios.

¿Achkë xqä chawäch chkij ri testigos de Jehová?

Rïn kan xqä chi nwäch chë ryeʼ kan nkinmaj wä chrij le Biblia chqä chë ma kʼayewal ta xuʼän chkiwäch xkismajij jun Biblia kichë ri católicos. Chrij riʼ, jun Testigo ri Mario rubʼiʼ xirutjoj chrij le Biblia. Ryä kan ma xikʼo ta rukʼuʼx wkʼë, tapeʼ kʼo jöbʼ y qlojay, ronojel sábados las 9 nmaqʼaʼ kʼo apü chuchiʼ ri seminario.

¿Achkë xkiʼij ri nkʼaj chik sacerdotes rma ri Testigos yatkibʼechʼaʼej?

Rïn xinbʼij chkë chë ütz yejeʼ qkʼë, ye kʼa majun ta jun ri kan xyaʼ ruqʼij ri tjonïk chrij le Biblia. Ye kʼa rïn, kan nqä wä chi nwäch nbʼän ya riʼ. Xintamaj naʼoj ri ma ye qʼaxnäq ta wä chi nwäch, achiʼel chë achkë rma Dios nuyaʼ qʼij chë ri winäq nkitäj poqän.

¿Kʼo jmul ri yekʼwayon bʼey chawäch xkiʼij chawä chë ma tatjoj ta chik awiʼ chrij le Biblia?

Pa 1975 kïy mul xibʼä Roma rchë nbʼetzjoj ri najin ntamaj chrij le Biblia. Ri yekʼwayon bʼey chi nwäch xkiʼij chwä chë ri najin ntamaj xa tzʼukun taq naʼoj, ye kʼa majun ta jun xksan le Biblia. Rma riʼ, pa 9 de enero rchë 1976, xintzʼibʼaj jun carta akuchï xinbʼij chë nyaʼ qʼaʼ ri Iglesia Católica y xintäq äl Roma; kaʼiʼ qʼij chrij riʼ xinel äl pa seminario y xibʼä chpan jun chkë kinimamoloj ri testigos de Jehová. Ri qʼij riʼ kan kimolon wä kiʼ kïy congregaciones. ¡Kan jaʼäl xintzʼët che rä! Chkijujnal ryeʼ kʼo wä kiBiblia chqä nkikanuj wä ri textos ri nuʼij ri najin wä nqʼaxan jun tzijonem.

¿Achkë xkiʼij afamilia rma ri xaʼän?

Kʼïy chkë ryeʼ xkatäj kiyowal. Ye kʼa xintamaj chë jun nchaqʼ najin wä nutjoj riʼ chrij le Biblia kikʼë ri Testigos chlaʼ Lombardía, jun tinamït ri kʼo pa norte che rä Italia. Rma riʼ xibʼä chutzʼetik, y ri Testigos aj chriʼ xinkitoʼ rchë nwïl nsamaj chqä wachoch. Ri junaʼ riʼ xinok testigo de Jehová.

¿Natzolij awiʼ rma riʼ xaʼän?

¡Manä! Ma ntzolij ta wiʼ. Komä nnaʼ chë más junan rubʼanon nwäch rkʼë Dios rma xintamaj achkë riʼ ryä kan achiʼel nukʼüt le Biblia, y ma achiʼel ta nkikʼüt ri filosofías chqä ri Iglesia Católica. Komä, taq yitzjon kikʼë ri winäq, ntaman chë kan yë ri kantzij taq naʼoj nkʼüt chkiwäch.