TJONÏK 04
¿Achkë riʼ Dios?
Kan xa xuʼ xebʼan ri winäq chwäch le Ruwachʼulew, ryeʼ kan kʼïy dioses kiyaʼon pä kiqʼij. Ye kʼa le Biblia ntzjon chrij jun Dios ri «kʼo más ruqʼij chkiwäch jontir ri nkʼaj chik dioses» (2 Crónicas 2:5). ¿Achkë Dios riʼ? ¿Y achkë nbʼanö chë kʼo más ruqʼij chkiwäch ri nkʼaj chik dioses ri nyaʼöx kiqʼij kimä ri winäq? Chpan re tjonïk reʼ xtatamaj achkë nrajoʼ Dios chë natamaj chrij ryä.
1. ¿Achkë rubʼiʼ Dios, y achkë rma qataman chë ryä nrajoʼ chë nqatamaj rubʼiʼ?
Chpan le Biblia Dios nuʼij achkë riʼ ryä. Ryä nuʼij: «Rïn yïn Jehová. Ya riʼ nbʼiʼ» (taskʼij ruwäch Isaías 42:5, 8). Ri bʼiʼaj Jehová elesan pä chpan ri chʼaʼäl hebreo. Ye kʼïy etamanelaʼ nkiʼij chë ri bʼiʼaj riʼ ntel chë tzij «ryä nbʼanö chë nbʼanatäj». Jehová nrajoʼ chë röj nqatamaj rubʼiʼ (Éxodo 3:15). ¿Achkë rma nqaʼij riʼ? Rma ryä xbʼanö chë xtzʼibʼäx qa más bʼaʼ 7,000 mula rubʼiʼ chpan le Biblia. Jehová ya riʼ rubʼiʼ «ri kʼaslïk Dios ri kʼo chlaʼ chkaj chqä ri kʼo pa ruwiʼ le Ruwachʼulew» (Deuteronomio 4:39).
2. ¿Achkë nuʼij le Biblia chrij Jehová?
Le Biblia nuʼij chë chkikojöl jontir ri dioses ri nyaʼöx kiqʼij kimä ri winäq, xa xuʼ jun kʼaslïk Dios kʼo y ya riʼ Jehová. ¿Achkë rma? Kʼo kʼïy rma. Xa xuʼ Jehová nkowin nbʼin chqë achkë kʼo chë nqaʼän chqä xa xuʼ ryä ri nimaläj ruqʼij pa ruwiʼ ronojel Ruwachʼulew (taskʼij ruwäch Salmo 83:18). Yë ryä «ri kʼo ronojel uchqʼaʼ pa ruqʼaʼ», reʼ ntel chë tzij chë kʼo ruchqʼaʼ rchë nuʼän jontir ri nrajoʼ. Chqä yë ryä xbʼanö jontir ri kʼo: ri ye kʼo chkaj chqä jontir ri kʼo chwäch le Ruwachʼulew (Apocalipsis 4:8, 11). Jehová kan ojer chik kʼo pä y majun bʼëy xtkäm ta (Salmo 90:2).
TQATAMAJ MÁS CHRIJ RE NAʼOJ REʼ
Tqatzʼetaʼ achkë rma ma junan ta ri jalajöj rubʼiʼ Dios nbʼix, rkʼë ri kantzij rubʼiʼ, jun bʼiʼaj ri xa xuʼ che rä ryä nbʼix wä. Xtqatamaj chqä achkë rubʼanik nukʼüt rubʼiʼ chqawäch y achkë rma nrajoʼ chë nqatamaj ri bʼiʼaj riʼ.
3. Dios kan kʼïy rubʼiʼ nbʼix, ye kʼa xa xuʼ jun rubʼiʼ kʼo
Rchë nitzʼët achkë rma ma junan ta taq naʼij rubʼiʼ jun winäq rkʼë taq xa xuʼ naʼij tat o nan che rä, titzʼetaʼ ri VIDEO y kixtzjon chrij reʼ:
¿Achkë rma ma junan ta taq nqaʼij rubʼiʼ Dios rkʼë taq xa xuʼ nqaʼij Ajaw o Dios che rä?
Le Biblia nuʼij chë ri winäq kan kʼïy dioses nkiyaʼ kiqʼij. Tiskʼij ruwäch Salmo 136:1-3 y kixtzjon chrij reʼ:
¿Achkë riʼ «ri Dios ri kʼo pa kiwiʼ ri dioses»?
4. Jehová nrajoʼ chë rït natamaj chqä naksaj rubʼiʼ
¿Achkë rma qataman chë Jehová nrajoʼ chë rït natamaj rubʼiʼ? Titzʼetaʼ ri VIDEO y kixtzjon chrij reʼ:
¿Achkë rma naʼij rït chë Jehová nrajoʼ chë nqatamaj rubʼiʼ?
Jehová nrajoʼ chë jontir winäq nkiksaj rubʼiʼ. Tiskʼij ruwäch Romanos 10:13 y kixtzjon chrij reʼ:
¿Achkë rma kan kʼo ruqʼij nqaksaj rubʼiʼ Dios?
¿Achkë komä nanaʼ rït taq jun winäq kan nuksaj abʼiʼ taq yaturskʼij?
¿Achkë komä naʼij rït chë nunaʼ Jehová taq naksaj rubʼiʼ?
5. Jehová nrajoʼ chë rït yatok rachiʼil
Jun ixöq aj Camboya ri rubʼiniʼan Soten xuʼij chë ri natamaj rubʼiʼ Dios ya riʼ jun chkë ri nbʼanö chë más kiʼ akʼuʼx naʼän. Titzʼetaʼ ri VIDEO y kixtzjon chrij reʼ:
Achiʼel xqatzʼët qa chpan ri video, ¿achkë rubʼanik xtoʼ ya Soten ri xtamaj rubʼiʼ Dios?
Rchë nq-ok rachiʼil jun winäq, naʼäy nkʼatzin nqatamaj achkë rubʼiʼ. Tiskʼij ruwäch Santiago 4:8a y kixtzjon chrij reʼ:
¿Achkë nrajoʼ Jehová chë rït naʼän?
¿Naʼij rït chë taq natamaj chqä naksaj rubʼiʼ Dios yaturtoʼ rchë natamaj más ruwäch? ¿Achkë rma?
JOJUN WINÄQ NKIʼIJ REʼ: «Rma xa xuʼ jun Dios kʼo, majun ta nuʼän we ma nqaksaj ta rubʼiʼ».
¿Nanmaj rït chë rubʼiʼ Dios ya riʼ Jehová?
¿Achkë ta komä rubʼanik xtaʼij chkë nkʼaj chik chë Dios nrajoʼ chë nqaksaj rubʼiʼ?
RI XQATAMAJ QA
Jehová ya riʼ rubʼiʼ Dios. Ryä nrajoʼ chë nqatamaj chqä nqaksaj rubʼiʼ rchë nqkowin nq-ok rachiʼil.
Tqakamluj ri xqatzʼët qa
¿Achkë nbʼanö chë Jehová ma junan ta kikʼë ri nkʼaj chik dioses?
¿Achkë rma kʼo chë nqaksaj rubʼiʼ Dios?
¿Nrajoʼ komä Jehová ntok awachiʼil? ¿Achkë rma naʼij riʼ?
RCHË NATAMAJ MÁS
Tanukʼuj kij woʼoʼ naʼoj ri nkikʼüt chqawäch chë kʼo Dios.
Tatamaj achkë rma ütz nqanmaj chë Dios majun ta jun achkë xbʼanö rchë.
Tatzʼetaʼ achkë rma ütz nqaksaj rubʼiʼ Dios tapeʼ ma qataman ta achkë rubʼanik xskʼïx ojer.
¿Kʼo komä ruqʼij nqaksaj rubʼiʼ Dios? Tatzʼetaʼ achkë rma nqaʼij chë Dios xa xuʼ jun rubʼiʼ kʼo.
a Chpan ri apéndice A4 ri kʼo chpan La Biblia. Traducción del Nuevo Mundo, pa kaxlän, xtawïl más naʼoj chrij ri achkë ntel chë tzij rubʼiʼ Dios y achkë rma chkipan jojun Biblias elesan qa ri bʼiʼaj riʼ.