NA’OJ 20

Ütz tabʼanaʼ che rä kiksaxik ri rukʼisbʼäl taq tzij

Eclesiastés 12:13, 14

RI NTEL CHË TZIJ: Naksaj ri rukʼisbʼäl taq tzij rchë yeʼatoʼ ri winäq rchë ma nkimestaj ta ri xakʼüt chkiwäch chqä rchë nkismajij pa kikʼaslemal.

Ri rukʼisbʼäl taq tzij xkeʼaksaj kʼo chë nukʼwaj riʼ rkʼë ri najin natzjoj. Takamluj rubʼixik ri achoq chrij najin yatzjon wä chqä ri naʼoj más kejqalen; o taksaj chik jun rubʼanik rchë yeʼatzjoj apü.
Keʼatoʼ ri winäq rchë nkismajij ri nakʼüt. Takʼutuʼ chkiwäch ri winäq ri kʼo chë nkiʼän y achkë rma kan kʼo rejqalen nkismajij riʼ. Takʼutuʼ rkʼë rubʼanik yatzjon chë pa awan ntel pä ri naʼij.
Xa xuʼ jun kayoxiʼ tzij keʼaksaj rchë nakʼïs atzijonem. Ma keʼatzjoj ta chik nkʼaj naʼoj taq xa najin nakʼïs atzijonem. Chqä xa xuʼ chik jun kayoxiʼ tzij keʼaksaj apü y tabʼanaʼ chë ri winäq naläx pa kan nkismajij ri xakʼüt chkiwäch.

Ma chanin ta takʼsaʼ atzijonem chqä ma taqasaj ta qa ruchqʼaʼ ri achʼaʼäl. Takʼutuʼ chë najin nakʼïs atzijonem rma ri rubʼanik yeʼaʼij apü ri rukʼisbʼäl taq tzij.