NA’OJ 14

Keʼakʼutuʼ ri naʼoj más kejqalen

Hebreos 8:1

RI NTEL CHË TZIJ: Yeʼatoʼ ri winäq rchë nqʼax chkiwäch ri atzijonem. Chqä taqʼalajsaj chkiwäch achkë rubʼanik kikʼwan kiʼ ri naʼoj más kejqalen rkʼë ri najin natzjoj chkë y rkʼë ri nawajoʼ nakʼüt chkiwäch.

RI RUBʼANIK NASMAJIJ

Taquʼ achkë qäs nawajoʼ nakʼüt. Taq xtatjoj awiʼ, taquʼ na achkë qäs nawajoʼ nakʼüt rkʼë ri atzijonem. ¿Xa xuʼ nawajoʼ natzjoj jun naʼoj o nawajoʼ naʼän chë ri winäq nkismajij ri nakʼüt? Taquʼ rij riʼ taq xtatjoj awiʼ. Tatzʼetaʼ we ri naʼoj ri kʼo más kejqalen xkarutoʼ rchë xtaqʼalajsaj ri nawajoʼ nakʼüt.

Takʼutuj qa reʼ chawäch: «¿Achkë komä xtkanuj xtuʼij jun winäq rchë ma yirukʼoxaj ta? ¿Achkë komä kʼutunïk xtuʼän chwä chrij ri najin ntzjoj che rä? Y chkë ri kʼutunïk ri xkeruʼän pä, ¿achkë komä ri naʼäy xtkʼutuj pä?». Chrij riʼ, keʼanukʼuʼ pa rucholajen ri naʼoj ye kʼo chpan ri atzijonem achiʼel wä nachʼöbʼ rït chë xtkiʼän kʼutunïk ri winäq chawä. We xtaʼän riʼ, ri winäq xtkiyaʼ kixkïn chawä, xtqʼax chkiwäch ri xtatzjoj y kan xtkinmaj ri xtaʼij chkë.
Takamluj apü achoq chrij najin yatzjon wä. Chaq taqïl keʼakamluj ri tzij ri nkiyaʼ ruchqʼaʼ ri achoq chrij najin yatzjon wä o keʼaksaj tzij ri xa junan yeʼel chë tzij.
Ma keʼaksaj ta kʼayewaläj taq tzij rchë nakʼüt ri naʼoj más kejqalen. Keʼachaʼ ri naʼoj más kejqalen ri kikʼwan kiʼ rkʼë ri achoq chrij xkatzjon wä chqä chë ütz yeqʼalajsäx chpan ri tiempo yaʼon chawä. Tachaʼ jun kayoxiʼ naʼoj ri kʼo kejqalen, chrij riʼ, ütz ütz keʼaqʼalajsaj apü. Taq ya xakʼïs ruqʼalajsaxik jun naʼoj, kapaʼeʼ qa jbʼaʼ, kʼa riʼ tachapaʼ chik ruqʼalajsaxik jun naʼoj.

Ütz natzjoj apü ri naʼoj más kejqalen taq xtatkirsaj ri atzijonem, ke riʼ ma xtasüqʼ ta chkiwäch ri yekʼoxan awchë. Chqä taq ya nakʼïs atzijonem keʼakamluj chik ri naʼoj riʼ, ke riʼ ma xkemestäx ta.