TJONÏK 44
¿Yeqä komä chwäch Dios jontir ri nmaqʼij yebʼan?
Jehová nrajoʼ chë kiʼ qakʼuʼx nqaʼän pa qakʼaslemal chqä chë jantäq yeqaʼän jojun nmaqʼij. Ye kʼa, ¿yeqä komä chwäch Dios jontir ri nmaqʼij yebʼan? ¿Achkë rubʼanik nqakʼüt chë nqajoʼ ryä chqä nqajoʼ chë kiʼ rukʼuʼx nuʼän?
1. ¿Achkë rma Jehová ma jontir ta nmaqʼij yeqä chwäch?
Rkʼë jbʼaʼ rït ma ataman ta chë kʼïy chkë ri nmaqʼij yebʼan ma kikʼwan ta kiʼ kikʼë ri naʼoj ye kʼo chpan le Biblia. Rkʼë jbʼaʼ ri nmaqʼij riʼ xa yekikʼüt naʼoj ri nkikʼüt ri religiones ri ma pa rubʼeyal ta nkiyaʼ ruqʼij Dios, achiʼel ri itzinïk o ri naʼoj ri nuʼij chë jun winäq nkʼaseʼ na qa ran taq nkäm. Chqä, kʼo jojun nmaqʼij xa ki-costumbres ri winäq nbʼan chkipan o yekikʼüt naʼoj ri xa kikʼwan kiʼ rkʼë ri suerte (Isaías 65:11). Rma riʼ Jehová nuʼij reʼ chkë rusamajelaʼ: «Ma tiyüj ta chik iwiʼ kikʼë [...] y ma tichäp ta chik ri ma chʼajchʼöj ta» (2 Corintios 6:17).a
2. ¿Achkë nuquʼ Jehová chkij ri nmaqʼij ri xa nkiyaʼ kiqʼij ri winäq?
Jehová nuʼij chqë chë ma tqaʼän ta achiʼel ri winäq ri xa chkij winäq nkikʼuqbʼaʼ wä kikʼuʼx, rma ya riʼ xa xtkʼäm pä kʼayewal pa qawiʼ (taskʼij ruwäch Jeremías 17:5). Kʼo jojun nmaqʼij yebʼan xa xuʼ rchë nyaʼöx kiqʼij ri qʼatöy taq tzij o ri winäq ri xjeʼ kiqʼij chpan kitinamit. Nkʼaj chik rchë nyaʼöx ruqʼij ri bandera o xa bʼa achkë chik jun ri xa nuʼän chë nqayaʼ ruqʼij jun tinamït (1 Juan 5:21). Chqä kʼo nmaqʼij yebʼan ri kikʼwan kiʼ rkʼë ri política o rkʼë ri yekiʼän ri winäq ri nkajoʼ yekisöl ri kʼayewal. We kan kowan xtqayaʼ ruqʼij jun winäq o jun organización —y más we xa yekikʼüt naʼoj ri ma kikʼwan ta kiʼ rkʼë ri nrajoʼ Dios—, ¿achkë komä xtnaʼ ryä naʼij rït?
3. ¿Achkë nbʼanö chë jun nmaqʼij ma ütz ta nuʼän jun cristiano?
Le Biblia nuʼij chë Dios kan itzel nutzʼët chë ri winäq kan nqʼax ruwiʼ yaʼ nkitäj, ri nmaqʼij ri kan nqʼax ruwiʼ ri nkiʼän ri winäq chkipan chqä ri nmaqʼij ri yebʼan xa xuʼ rchë ntzʼet achkë más nkowin ntjä yaʼ (1 Pedro 4:3). Chkipan jojun nmaqʼij ri winäq ma yekowin ta chik nkiqʼät kiʼ chqä yekiʼän tzʼil taq bʼanobʼäl. We röj ma nqajoʼ ta chë nchaʼ chiʼ ri qachbʼilanïk rkʼë Jehová, kʼo chë ma nqaxöl ta qiʼ kikʼë ri winäq ri xa ruyon tzʼil taq bʼanobʼäl yekiʼän.
TQATAMAJ MÁS CHRIJ RE NAʼOJ REʼ
Tqatzʼetaʼ achkë ütz naʼän rït rchë kan xtachaʼ xtaʼän ri ütz kikʼë ri nmaqʼij yebʼan, rchë ke riʼ Jehová kan kiʼ rukʼuʼx xtuʼän awkʼë.
4. Ma kajeʼ ta chkipan nmaqʼij ri xa nkiqasaj ruqʼij Jehová
Tiskʼij ruwäch Efesios 5:10 y kixtzjon chrij reʼ:
¿Achkë nkʼatzin nqatzʼët na naʼäy taq nqajoʼ nqaʼän jun nmaqʼij?
¿Achkë nmaqʼij yebʼan chpan atinamit rït?
¿Naʼij rït chë ri nmaqʼij riʼ ma itzel ta yerutzʼët Jehová?
Jun tzʼetbʼäl. ¿Kʼo komä jmul achʼobʼon rït achkë nuquʼ Dios chrij ri nmaqʼij nbʼan taq ntel rujunaʼ jun winäq? Majun ta jun peraj chpan le Biblia nuʼij ta chë jun rusamajel Dios xuʼän ta jun chkë ri nmaqʼij riʼ, ye kʼa nutzjoj kaʼiʼ nmaqʼij ri xebʼan taq xel kijunaʼ kaʼiʼ winäq ri ma nkiyaʼ ta ruqʼij Jehová. Tiskʼij ruwäch Génesis 40:20-22 chqä Mateo 14:6-10. Chrij riʼ kixtzjon chrij reʼ:
¿Achkë junan jbʼaʼ xebʼanatäj chkipan re kaʼiʼ nmaqʼij reʼ?
Rkʼë ri xqaskʼij qa, ¿achkë komä nuquʼ Jehová chrij ri nmaqʼij nbʼan taq ntel rujunaʼ jun winäq? ¿Achkë naʼij rït?
Tapeʼ ke riʼ, rkʼë jbʼaʼ rït nakʼutuj qa reʼ chawäch: «¿Kan xajan komä najin nbʼän chwäch Jehová we nbʼän jun cumpleaños o yibʼä chik chpan jun nmaqʼij ri ma nuʼij ta chpan le Biblia?». Tiskʼij ruwäch Éxodo 32:1-8. Chrij riʼ titzʼetaʼ ri VIDEO y kixtzjon chrij reʼ:
¿Achkë rma kan nkʼatzin nqatamaj achkë yeqä chwäch Jehová y achkë ma yeqä ta chwäch?
¿Achkë rubʼanik nqatamaj riʼ?
¿Achkë rubʼanik nqatamaj we jun nmaqʼij ma itzel ta chwäch Dios?
¿Yerukʼüt naʼoj ri ma kikʼwan ta riʼ rkʼë ri nukʼüt le Biblia? Rchë natamaj riʼ takanuj más naʼoj chrij ri akuchï xtzʼuktäj wä pä ri nmaqʼij riʼ.
¿Nuyaʼ kiqʼij ri winäq, ri organizaciones, ri bandera o xa bʼa achkë jun ri xa nuʼän chë nqayaʼ ruqʼij jun tinamït? Röj kan yë Jehová nqayaʼ ruqʼij, chqä qakʼuqbʼan qakʼuʼx chë ryä xtsöl jontir ri kʼayewal ye kʼo komä.
¿Yeruqʼäj ri pixaʼ ye kʼo chpan le Biblia? Röj kʼo chë nqakʼwaj jun chʼajchʼöj kʼaslemal chwäch Dios.
5. Takanuj rubʼanik rchë ri nkʼaj chik ma yatkiyöqʼ ta rma ri nanmaj
Kʼo mul kʼayewal nuʼän chqawäch nqaʼij «manä» taq ri nkʼaj chik nkitäj kiqʼij chqij rchë nqaʼän jun nmaqʼij ri ma nqä ta chwäch Jehová. Ye kʼa, rït kan pa rubʼeyal taqʼalajsaj chkiwäch ri nkʼaj chik achkë rma ma xtaʼän ta ri nmaqʼij riʼ, chqä ma taqasaj ta kiqʼij. Rchë nitamaj achkë xuʼän jun winäq rchë xqʼax chwäch jun kʼayewal achiʼel riʼ, titzʼetaʼ ri VIDEO.
Tiskʼij ruwäch Mateo 7:12 y kixtzjon chrij reʼ:
Rkʼë ri xqaskʼij qa chpan ri texto, ¿ütz komä naʼij rït che rä jun awachʼalal chë ma tuʼän ta jun nmaqʼij we ryä ma nunmaj ta ri nanmaj rït?
¿Achkë ütz naʼän rchë nakʼüt chwäch a-familia chë yeʼawajoʼ chqä yeʼaloqʼoqʼej tapeʼ ma yajeʼ ta kikʼë chpan jun nmaqʼij?
6. Jehová nrajoʼ chë kiʼ qakʼuʼx nqaʼän pa qakʼaslemal
Jehová nrajoʼ chë röj kiʼ qakʼuʼx nqaʼän kikʼë ri qa-familia chqä ri qachiʼil. Tiskʼij ruwäch Eclesiastés 8:15 y kixtzjon chrij reʼ:
¿Achkë rubʼanik nukʼüt re texto reʼ chë Jehová nrajoʼ chë kiʼ qakʼuʼx nqaʼän pa qakʼaslemal?
Jehová nrajoʼ chë rusamajelaʼ yekʼastan chqä kiʼ kikʼuʼx nkiʼän taq yejeʼ junan. Titzʼetaʼ ri VIDEO rchë nitzʼët chë kan ya riʼ nbʼanatäj chkipan ri asambleas internacionales.
Tiskʼij ruwäch Gálatas 6:10 y kixtzjon chrij reʼ:
¿Kan nkʼatzin komä nqaʼän jun nmaqʼij rchë nqaʼij chë kʼo utzil najin nqaʼän pa kiwiʼ ri winäq?
¿Achkë chë spanïk nawajoʼ nayaʼ: ri nayaʼ xa rma jun nmaqʼij nbʼan, o ri nayaʼ rma kan pan awan naläx wä pä naʼän riʼ?
Ye kʼïy Testigos kʼo mul nkimöl kiʼ kikʼë kalkʼwal rchë yekʼastan jbʼaʼ chqä nkiyaʼ kispanik. We rït ye kʼo awalkʼwal, ¿kʼo komä jun npë pan ajolon ri ütz naʼän kimä ryeʼ?
JOJUN WINÄQ NKIʼIJ REʼ: «Majun nkʼatzin wä natamaj akuchï xtzʼuktäj wä pä jun nmaqʼij. Ri kʼo más ruqʼij ya riʼ yakʼastan kikʼë a-familia chqä awachiʼil».
¿Achkë naʼij rït?
RI XQATAMAJ QA
Jehová nrajoʼ chë nqkʼastan jbʼaʼ kikʼë ri qa familia chqä ri qachiʼil, ye kʼa ma nrajoʼ ta chë yeqaʼän nmaqʼij ri ma yeqä ta chwäch ryä.
Tqakamluj ri xqatzʼët qa
¿Achkë kʼutunïk ütz yeqaʼän qa chqawäch rchë nqatamaj achkë nmaqʼij ma itzel ta chwäch Jehová?
¿Achkë rubʼanik yeqatoʼ ri qa-familia chqä ri qachiʼil rchë nqʼax chkiwäch achkë rma ma yeqaʼän ta jojun nmaqʼij?
¿Achkë rma qataman chë Jehová nrajoʼ chë kiʼ qakʼuʼx nqaʼän pa qakʼaslemal chqä nqkʼastan?
RCHË NATAMAJ MÁS
Tatzʼetaʼ achkë jojun nmaqʼij ma nkiʼän ta ri cristianos.
«¿Achkë rma ri testigos de Jehová ma yekiʼän ta jojun nmaqʼij?» (Reʼ xtawïl pa jw.org)
Tanukʼuj kij kajiʼ naʼoj ri nkikʼüt chqawäch achkë rma Dios ma ütz ta nutzʼët ri cumpleaños.
«¿Achkë rma ri testigos de Jehová ma nkiʼän ta ri cumpleaños?» (Reʼ xtawïl pa jw.org)
Taq kʼo nmaqʼij yebʼan, ri akʼalaʼ yekowin nkiʼän chë Jehová kiʼ rkʼuʼx nuʼän. Tatzʼetaʼ achkë rbʼanik nkiʼän riʼ.
Jehová kan jaʼäl yaturtzʼët (11:35)
Kan pa millón chkë ri cristianos ma nkinmaqʼijuj ta ri Navidad. ¿Achkë nkinaʼ ryeʼ rma ma nkiʼän ta ri nmaqʼij riʼ?
«Kʼo jun más ütz xkïl chwäch ri Navidad» (Ri Chajinel, 1 de diciembre, 2012)