¿Achkë nuʼij le Biblia chkij ri ye kʼlan y chkij ri ma ye kʼlan ta?

Chkipan jojun tinamït, ri winäq nkiʼij chë nkʼatzin yakʼleʼ rchë kiʼ akʼuʼx naʼän. Ye kʼa ma jontir ta ri kʼlan taq winäq kiʼ kikʼuʼx y ma jontir ta ri ma ye kʼlan ta yebʼison. Ye kʼa le Biblia nuʼij chë ri yakʼleʼ o ma yakʼleʼ ta kan jun spanïk.

1. ¿Achkë utzil nkïl ri ma ye kʼlan ta?

Le Biblia nuʼij: «Kan ütz nuʼän ri winäq ri nkʼleʼ, ye kʼa kan más na chik ütz nuʼän ri winäq ri ma nkʼleʼ ta» (taskʼij ruwäch 1 Corintios 7:32, 33, 38). ¿Achkë ntel chë tzij chë jun winäq «kan más na chik ütz nuʼän» we ma nkʼleʼ ta? Ri cristianos ri ma ye kʼlan ta majun ta jun kikʼlaj ri kʼo chë nkichajij. Rma riʼ kʼo más ri yekowin nkiʼän. Ye kʼo jojun yekowin nkiyaʼ más ruqʼij Jehová, achiʼel taq yebʼä jukʼan chik rchë nkibʼetzjoj le Biblia. Ye kʼa ri utzil más nüm nkïl, ya riʼ chë más jamäl kiwäch rchë nkikowirsaj kachbʼilanïk rkʼë Jehová.

2. ¿Achkë utzil nkïl ri winäq ri yekʼleʼ chwäch ri qʼatbʼäl tzij?

Ri kʼlan taq winäq kʼo chqä utzil nkïl. Le Biblia nuʼij chë «kʼo más utzil nkikʼül kaʼiʼ winäq [...] chwäch xa xuʼ jun» (Eclesiastés 4:9). Ya reʼ kan nbʼanatäj wä, y más kikʼë ri kʼlan taq winäq ri nkismajij ri naʼoj ye kʼo chpan le Biblia. Ri winäq ri ye kʼlan chwäch ri qʼatbʼäl tzij, kijkibʼan kitzij chkiwäch chë xtkajoʼ kiʼ, chë ma xtkiqasaj ta kiqʼij chkiwäch chqä chë kan xtkichajij kiʼ. Ya riʼ nbʼanö chë ma nxiʼin ta más rij kikʼlanen ke chkiwäch ri winäq ri xa xuʼ kikʼwan qa kiʼ. Chqä, kʼo utzil nukʼäm pä pa kiwiʼ ri kalkʼwal.

3. ¿Achkë nuquʼ Jehová chrij ri kʼlanen?

Taq Jehová xerukʼulbʼaʼ ri kaʼiʼ naʼäy taq winäq, ryä xuʼij: «Ri achï xtyaʼ qa ruteʼ chqä rutataʼ, y rkʼë rixjayil xtjeʼ wä» (Génesis 2:24). Jehová nrajoʼ chë ri achï chqä ri ixöq nkajoʼ kiʼ chqä ma nkijäch ta kiʼ. Y xa xuʼ nuyaʼ qʼij chë nkichüp ruwäch kikʼlanen we jun chkë ryeʼ nukanuj rukʼexel ri rukʼlaj. Taq ya riʼ nbʼanatäj, Dios, pa ruqʼaʼ ri xkanüx rukʼexel nuyaʼ wä qa we xtchüp ruwäch rukʼlanen o manä (Mateo 19:9).a Jehová ma ütz ta nutzʼët chë ri cristianos yejeʼ kaʼiʼ o más kikʼlaj (1 Timoteo 3:2).

TQATAMAJ MÁS CHRIJ RE NAʼOJ REʼ

4. We rït ma yït kʼlan ta, kan ütz rubʼanik taksaj ri spanïk riʼ

Chwäch Jesús, ri ma yït kʼlan ta kan jun spanïk (Mateo 19:11, 12). Tiskʼij ruwäch Mateo 4:23 y kixtzjon chrij reʼ:

• ¿Achkë rubʼanik xksaj rukʼaslemal Jesús, ri ma xkʼleʼ ta, rchë xyaʼ ruqʼij Rutataʼ chqä rchë xerutoʼ ri nkʼaj chik?

Ri cristianos ri ma ye kʼlan ta kan kiʼ kikʼuʼx xtkiʼän we xtkiksaj kikʼaslemal kan achiʼel xuʼän Jesús. Titzʼetaʼ ri VIDEO y kixtzjon chrij reʼ:

VIDEO: Qachʼalal ri ma ye kʼlan ta ri nkikʼän kinaʼoj chrij Cristo (3:16)

• ¿Achkë ütz nkiʼän ri cristianos ri ma ye kʼlan ta rchë kan ütz rubʼanik xtkiksaj kikʼaslemal?

¿Ataman rït reʼ?

Le Biblia ma nuʼij ta jaruʼ rujunaʼ kʼo chë njeʼ jun winäq rchë nkʼleʼ. Ye kʼa nuʼij chë más ütz chë jun winäq tyoʼej na kʼa taq xtqʼax chkipan ri junaʼ taq kʼo más ruchqʼaʼ ri nurayij ruchʼakul, rma rkʼë jbʼaʼ ya riʼ xtbʼanö chë ma xtchaʼ ta xtuʼän ri ütz (1 Corintios 7:36).

5. Kan ütz tachaʼ achoq rkʼë xkakʼleʼ wä

Jun chkë ri kʼo más ruqʼij chpan akʼaslemal, ya riʼ nachaʼ achoq rkʼë xkakʼleʼ wä. Tiskʼij ruwäch Mateo 19:4-6, 9 y kixtzjon chrij reʼ:

• ¿Achkë rma jun cristiano kʼo chë nuquʼ na naʼäy we xtkʼleʼ o manä?

Le Biblia xkaturtoʼ rchë xtatamaj achkë naʼoj kʼo chë njeʼ rkʼë ri winäq ri achoq rkʼë nawajoʼ yakʼleʼ wä. Ye kʼa ri kʼo más ruqʼij ya riʼ nakanuj jun winäq ri nrajoʼ Jehová.b Tiskʼij ruwäch 1 Corintios 7:39 chqä 2 Corintios 6:14. Chrij riʼ kixtzjon chrij reʼ:

• We jun cristiano nrajoʼ nkʼleʼ, ¿achkë rma kʼo chë nuchaʼ jun winäq ri nuyaʼ ruqʼij Jehová?

• We nkʼleʼ rkʼë jun winäq ri ma nuyaʼ ta ruqʼij Jehová, ¿achkë komä xtnaʼ Jehová naʼij rït?

6. Tatzʼetaʼ ri kʼlanen kan achiʼel nutzʼët Jehová

Pa kiqʼij qa ri israelitas, ye kʼo wä jojun achiʼaʼ nkichüp ruwäch kikʼlanen rma xa bʼa achkë jun ri ma kan ta kʼo ruqʼij. Tiskʼij ruwäch Malaquías 2:13, 14, 16 y kixtzjon chrij reʼ:

• ¿Achkë rma Jehová kan itzel nutzʼët chë jun winäq nuchüp ruwäch rukʼlanen rma xa bʼa achkë jun ri ma nuʼij ta chpan le Biblia?

Titzʼetaʼ ri VIDEO y kixtzjon chrij reʼ:

VIDEO: Ri kʼlanen majun bʼëy kʼo ta chë nchup ruwäch (4:30)

• We rït yït kʼlan rkʼë jun winäq ri ma nuyaʼ ta ruqʼij Jehová, ¿achkë ütz naʼän rchë kiʼ ikʼuʼx niʼän pan ikʼlajil?

7. Tasmajij ri naʼoj yeruyaʼon Jehová chrij ri kʼlanen

VIDEO: Jehová nqrtoʼ rchë nqasmajij ri naʼoj yeruyaʼon chrij ri kʼlanen (4:14)

Tiskʼij ruwäch Hebreos 13:4 y kixtzjon chrij reʼ:

• ¿Naʼij rït chë Jehová kan nqʼax ruwiʼ ri nukʼutuj chkë ri kʼlan taq winäq? ¿Achkë rma naʼij riʼ?

Taq jun cristiano nkʼleʼ o nuchüp ruwäch rukʼlanen, Jehová nrajoʼ chë tbʼanaʼ riʼ chwäch ri qʼatbʼäl tzij, rma jbʼaʼ ma jontir ri tinamït ya riʼ nkikʼutuj chkë ri kiwinaq. Tiskʼij ruwäch Tito 3:1 y kixtzjon chrij reʼ:

• We rït yït kʼlan chik, ¿kan ataman chë tzʼibʼatäl akʼlanen pa qʼatbʼäl tzij?

RI XQATAMAJ QA

Yït kʼlan o ma yït kʼlan ta, ya riʼ jun ruspanik Jehová. Ri kʼlan taq winäq chqä ri ma ye kʼlan ta kiʼ kikʼuʼx yekowin nkiʼän we nkiʼän ri nqä chwäch Dios.

Tqakamluj ri xqatzʼët qa

• ¿Achkë ütz nuʼän jun winäq ri ma kʼlan ta rchë kan ütz rubʼanik xtksaj rukʼaslemal?

• ¿Achkë rma le Biblia nuʼij chë ri cristianos xa xuʼ kʼo chë yekʼleʼ kikʼë winäq ri nkiyaʼ ruqʼij Dios?

• ¿Xa xuʼ achkë rma nuʼij le Biblia chë jun winäq nkowin nuchüp ruwäch rukʼlanen?

RCHË NATAMAJ MÁS

¿Achkë ntel chë tzij yakʼleʼ xa xuʼ «chpan ruchʼaʼäl Dios»?

«Kikʼutunik ri yeskʼin ruwäch qawuj» (Ri Chajinel, 1 de julio, 2004)

Tatzʼetaʼ kaʼiʼ tzʼetbʼäl chrij ri nachʼaʼej jun winäq chqä chrij ri kʼlanen. Reʼ xkatkitoʼ rchë xtachaʼ xtaʼän ri ütz.

Ri nkʼatzin naʼän we nawajoʼ yakʼleʼ (11:53)

Tatzʼetaʼ achkë rma jun qachʼalal kan ruyaʼon chwäch ran chë Jehová kʼo jun xyaʼ che rä ri kʼo más ruqʼij chwäch ri xyaʼ qa ryä chpan rukʼaslemal.

Nyoʼen wä rïn chë ryä xtrajoʼ xttamaj chrij Jehová (1:56)

¿Achkë kʼo chë nutzʼët na naʼäy jun cristiano ri nrajoʼ nuchüp ruwäch rukʼlanen o nrajoʼ nujäch riʼ rkʼë rukʼlaj?

«Tqayaʼ ruqʼij ri kʼulanen achiʼel nuʼän Dios» (Ri Chajinel, diciembre 2018)