TJONÏK 43
¿Achkë rubʼanik nkitzʼët ri cristianos ri rutjik yaʼ?
Chwäch jontir le Ruwachʼulew, ri winäq jalajöj rubʼanik nkitzʼët ri rutjik yaʼ. Ye kʼo jojun kʼa jantäq na nkitäj jbʼaʼ yaʼ kikʼë ri kichiʼil. Nkʼaj chik kiyaʼon chkiwäch ma nkitäj ta. Y ye kʼo ri kan yeqʼabʼär. ¿Achkë nuʼij le Biblia chrij ri rutjik yaʼ?
1. ¿Kan xajan komä natäj yaʼ?
Le Biblia ma nuʼij ta chë xajan natäj yaʼ. Pa rukʼexel riʼ, ri Ruchʼaʼäl Dios nuʼij chë ri «vino ri nuʼän chë kiʼ rukʼuʼx nuʼän jun winäq» ya riʼ jun chkë ri spanïk ri ruyaʼon pä Jehová chqë (Salmo 104:14, 15). Chqä, le Biblia yerutzjoj jojun achiʼaʼ chqä ixoqiʼ ri xkitäj yaʼ (1 Timoteo 5:23).
2. ¿Achkë naʼoj nuyaʼ le Biblia chkë ri nkajoʼ nkitäj yaʼ?
Jehová kan itzel nutzʼët ri qʼabʼarïk chqä taq jun winäq kan nqʼax ruwiʼ yaʼ nutäj (Gálatas 5:21). Le Biblia nuʼij: «Ma kajeʼ ta chkikojöl ri kan nqʼax ruwiʼ vino nkiqüm» (Proverbios 23:20). Rma riʼ, we nqajoʼ nqatäj yaʼ, pa qayonïl o kikʼë qachiʼil, majun bʼëy kʼo ta chë nqqʼax rkʼë rutjik, rma xa xtuʼän chqë chë ma xtqanaʼ ta chik achkë xtqaʼän, achkë xtqaʼij o xtuʼän chë ma pa rubʼeyal ta chik xtqchʼobʼon. Chqä ma ütz ta chë xa rma kowan nqatäj yaʼ npë qayabʼil. We röj ma nqkowin ta nqaqʼät qiʼ rkʼë rutjik yaʼ, ri más ütz ya riʼ nqayaʼ chqawäch ma nqatäj ta chik.
3. ¿Achkë rubʼanik nqakʼüt chë kan kʼo ruqʼij chqawäch röj ri nkichaʼ nkiʼän ri nkʼaj chik?
Chqajujnal röj nqchaʼö we xtqatäj yaʼ o manä. Rma riʼ ma nqtzjon ta itzel chkij ri ma kan ta kʼïy yaʼ nkitäj. Chqä, ma nqaʼij ta che rä jun winäq chë ttjaʼ yaʼ we ya rubʼin chik chë ma xttäj ta (Romanos 14:10). Y, ma nqatäj ta yaʼ taq nqatzʼët chë ri nkʼaj chik ma ütz ta nkinaʼ taq yojkitzʼët nqaʼän riʼ (taskʼij ruwäch Romanos 14:21). Rkʼë jontir reʼ nqakʼüt chë ma xa xuʼ ta röj nqaquʼ qa qiʼ, xa kan nqaquʼ kij ri nkʼaj chik chqä (taskʼij ruwäch 1 Corintios 10:23, 24).
TQATAMAJ MÁS CHRIJ RE NAʼOJ REʼ
Tqatzʼetaʼ jojun naʼoj chpan le Biblia ri xkatkitoʼ rchë xtatzʼët we xtatäj yaʼ o manä chqä jaruʼ xtatäj. Tqatzʼetaʼ chqä achkë ütz naʼän we najin natäj aqʼij rchë nayaʼ qa rutjik yaʼ.
4. Tachʼobʼoʼ na we xtatäj yaʼ o manä
¿Achkë rubʼanik xtzʼët Jesús ri rutjik yaʼ? Rchë nqatamaj riʼ, tqanukʼuj rij ri naʼäy milagro ri xuʼän. Tiskʼij ruwäch Juan 2:1-11 y kixtzjon chrij reʼ:
Rkʼë ri xqaskʼij qa, ¿achkë nqatamaj qa chrij ri rubʼanik xtzʼët Jesús ri rutjik yaʼ chqä ri yetjö rchë?
Jesús ma xuʼij ta chë xajan natäj yaʼ. Rma riʼ, ¿achkë kʼo chë nuquʼ jun cristiano chrij jun chik ri nuchaʼ nutäj yaʼ?
Ye kʼa, we jun cristiano nuchaʼ nutäj yaʼ, reʼ ma ntel ta chë tzij chë kan ronojel mul ütz nuʼän riʼ. Tiskʼij ruwäch Proverbios 22:3 y titzʼetaʼ we ütz natäj yaʼ taq...
... xa xtakʼwaj chʼichʼ.
... rït jun ixöq ri kʼo pa yabʼil.
... ri doctor rubʼin chik chawä chë ma tatäj ta.
... xa kʼayewal nuʼän chawäch naqʼät rutjik.
... ri pixaʼ chpan atinamit ma nkiyaʼ ta qʼij chë jun winäq nutäj yaʼ.
... yït kʼo rkʼë jun winäq ri ma nrajoʼ ta nutäj yaʼ rma ojer kan kʼayewal xuʼän chwäch xqʼät rutjik.
¿Ütz komä nayaʼ yaʼ chkë ri winäq chpan jun kʼlanen o taq naʼän xa bʼa achkë chik jun nmaqʼij? Rchë natamaj achkë ütz naʼän, titzʼetaʼ ri VIDEO.
Tiskʼij ruwäch Romanos 13:13 chqä 1 Corintios 10:31, 32. Taq nikʼïs ruskʼixik jun texto, kixtzjon chrij reʼ:
¿Achkë rubʼanik yaturtoʼ re texto reʼ rchë xtachaʼ xtaʼän ri nqä chwäch Jehová?
Chkijujnal ri cristianos yechaʼö we xtkitäj yaʼ o manä. Kʼo mul jun cristiano xtchaʼ xttäj yaʼ, ye kʼa nkʼaj chik mul manä.
5. Tachʼobʼoʼ na jaruʼ yaʼ xtatäj
We nachʼöbʼ natäj yaʼ, ma tamestaj ta chë, tapeʼ Jehová ma itzel ta nutzʼët chë röj nqatäj yaʼ, ryä kan itzel nutzʼët chë jun winäq kan nqʼax ruwiʼ nuʼän che rä rutjik. ¿Achkë rma? Tiskʼij ruwäch Oseas 4:11, 18 y kixtzjon chrij reʼ:
¿Achkë xtbʼanatäj rkʼë jun winäq ri kan nqʼax ruwiʼ yaʼ nutäj?
¿Achkë xtqtoʼö rchë ma xtqʼax ta ruwiʼ yaʼ xtqatäj? Ri xtqtoʼö ya riʼ nqatamaj nqaqʼät qiʼ. Tiskʼij ruwäch Proverbios 11:2 y kixtzjon chrij reʼ:
¿Achkë rma rït ütz nayaʼ chawäch naqʼät awiʼ taq xtatäj yaʼ?
6. Ri xkatoʼö rchë ma xkaqä ta chik chpan rutjik yaʼ
Tatzʼetaʼ achkë xtoʼö jun achï rchë xyaʼ qa rutjik yaʼ. Titzʼetaʼ ri VIDEO y kixtzjon chrij reʼ:
¿Achkë wä runaʼoj nuʼän Dimitri taq nutäj yaʼ?
Ri naʼäy mul ri xrajoʼ xyaʼ qa rutjik yaʼ, ¿xkowin xyaʼ qa?
¿Achkë xtoʼö ryä rchë xyaʼ qa rutjik yaʼ?
Tiskʼij ruwäch 1 Corintios 6:10, 11 y kixtzjon chrij reʼ:
¿Kan xajan komä yaqʼabʼär? ¿Achkë rma?
Tapeʼ jun winäq kʼayewal nuʼän chwäch nuqʼät riʼ rkʼë rutjik yaʼ, ¿achkë rma qataman chë xtkowin xtjäl runaʼoj?
Tiskʼij ruwäch Mateo 5:30 y kixtzjon chrij reʼ:
Rkʼë ri tzʼetbʼäl xksaj Jesús chrij ri naqpij jun aqʼaʼ, ryä xrajoʼ xkʼüt chë kʼo nkʼatzin yeqayaʼ qa rchë Dios kiʼ rukʼuʼx nuʼän qkʼë. We rït najin natäj aqʼij rchë nayaʼ qa rutjik yaʼ, ¿achkë ütz naʼän?a
Tiskʼij ruwäch 1 Corintios 15:33 y kixtzjon chrij reʼ:
¿Achkë xtbʼanatäj awkʼë we nakʼwaj awiʼ kikʼë winäq ri kan nqʼax ruwiʼ yaʼ nkitäj?
JOJUN WINÄQ RKʼË JBʼAʼ XTKIKʼUTUJ REʼ CHAWÄ: «¿Xajan komä natäj yaʼ?».
¿Achkë xtaʼij rït chkë?
RI XQATAMAJ QA
Jehová nrajoʼ chë röj kiʼ qakʼuʼx nqaʼän rkʼë ri yaʼ nqatäj, ye kʼa ryä kan itzel nutzʼët ri qʼabʼarïk chqä chë kan nqʼax ruwiʼ nqaʼän che rä ri rutjik.
Tqakamluj ri xqatzʼët qa
¿Achkë nuʼij le Biblia chrij ri rutjik yaʼ?
¿Achkë kʼayewal xtqïl we kan nqʼax ruwiʼ yaʼ nqatäj?
¿Achkë rubʼanik nqakʼüt chë kan kʼo ruqʼij chqawäch röj ri nkichaʼ nkiʼän ri nkʼaj chik chrij rutjik yaʼ?
RCHË NATAMAJ MÁS
¿Achkë ütz nkiʼän ri qʼopojiʼ kʼojolaʼ rchë kan xtkichaʼ xtkiʼän ri ütz rkʼë rutjik yaʼ?
We rït kʼayewal nuʼän chawäch naqʼät awiʼ rkʼë rutjik yaʼ, tatzʼetaʼ achkë ütz naʼän.
«¿Achkë xtqtoʼö rchë ma xtqʼax ta ruwiʼ yaʼ xtqatäj?» (Ri Chajinel, 1 de enero, 2010)
¿Ütz komä chë ri cristianos nkiʼän ri brindis?
«Kikʼutunik ri yeskʼin ruwäch qawuj» (Ri Chajinel, 15 de febrero, 2007)
Tatzʼetaʼ achkë xtoʼö jun achï rchë xyaʼ qa rutjik yaʼ chpan ri peraj «Kan kowan wä yitjö yaʼ».
a Ri winäq ri kʼo ki-vicio rchë nkitäj yaʼ, rkʼë jbʼaʼ nkʼatzin yetoʼöx kimä winäq ri kisamaj ya riʼ yekitoʼ ri kʼo ri vicio riʼ chkë. Ye kʼïy doctores nkiʼij chë ri winäq ri ma xekowin ta xkiqʼät kiʼ rkʼë rutjik yaʼ ojer, más ütz chë kan ma tkitäj ta chik.