¿Achkë ütz nkiʼän ri kʼlan taq winäq rchë kiʼ kikʼuʼx nkiʼän?

Ri kʼlan taq winäq ri kʼa xekʼleʼ qa nkajoʼ chë ronojel mul kiʼ kikʼuʼx nkiʼän pa kikʼlajil kan achiʼel xkinaʼ ri qʼij taq xekʼleʼ. Ri cristianos ri kʼïy chik junaʼ ye kʼlan chqä kitjon pä kiqʼij rchë nkismajij ri naʼoj ye kʼo chpan le Biblia kitaman chë jun kʼlaj winäq yekowin kiʼ kikʼuʼx nkiʼän pa kikʼlajil.

1. ¿Achkë naʼoj nuyaʼ le Biblia che rä ri achï?

Jehová ruyaʼon qa pa ruqʼaʼ ri achï rchë nukʼwaj bʼey pa rachoch (taskʼij ruwäch Efesios 5:23). Chqä nrajoʼ chë jontir ri xtchaʼ xtuʼän xtkʼäm pä utzil pa ruwiʼ ru-familia. Le Biblia nuyaʼ re naʼoj reʼ chkë ri achiʼaʼ: «Ronojel mul tiwajoʼ ri iwixjayil» (Efesios 5:25). Ri achï ri nrajoʼ ri rixjayil kan ütz runaʼoj nuʼän rkʼë, chkiwäch ri winäq o taq kiyonïl ye kʼo. Ryä nuchajij chqä nutäj ruqʼij rchë nuyaʼ jontir ri nkʼatzin che rä (1 Timoteo 5:8). Y, ri kʼo más ruqʼij, ya riʼ nutoʼ rchë kuw nuʼän rachbʼilanïk rkʼë Jehová (Mateo 4:4). Jun tzʼetbʼäl, ryä ütz nchʼö rkʼë Dios taq kʼo rkʼë rixjayil o junan nkiskʼij ruwäch ki-Biblia. Ri achï ri nrajoʼ rixjayil chqä nuchajij, kan kuw xtuʼän ri rachbʼilanïk rkʼë Jehová (taskʼij ruwäch 1 Pedro 3:7).

2. ¿Achkë naʼoj nuyaʼ le Biblia che rä ri ixöq?

Ri Ruchʼaʼäl Dios nuʼij chë ri ixöq kan rkʼë ronojel ran kʼo chë nuyaʼ ruqʼij rachjil (Efesios 5:33). ¿Achkë rubʼanik xtuʼän ri? Ryä ütz nchʼobʼon chkij ri utziläj taq naʼoj ye kʼo rkʼë rachjil chqä chrij jontir ri nuʼän rchë nuchajij ryä chqä ri kalkʼwal. Chqä, xtkʼüt chë nuyaʼ ruqʼij ri rachjil taq nutoʼ rkʼë ri nuchaʼ nuʼän, taq kan rkʼë ajowabʼäl ntzjon rkʼë chqä taq ma ntzjon ta itzel chrij chkiwäch ri nkʼaj chik, yajün taq ri rachjil ma nuyaʼ ta ruqʼij Jehová.

3. ¿Achkë ütz nkiʼän jun kʼlaj winäq rchë kan ütz xtkikʼwaj kiʼ pa kikʼlajil?

Le Biblia nuʼij reʼ chkij ri kʼlan taq winäq: «Chkaʼiʼ xkeʼok jun chʼakulaj» (Mateo 19:5). Reʼ ntel chë tzij chë kʼo chë nkichajij kiʼ chwäch xa bʼa achkë jun ri xa xtuʼän chë ma xtkajoʼ ta chik kiʼ. Rma riʼ nkijäm kiwäch rchë yejeʼ junan y kan rkʼë ajowabʼäl nkiʼij ri nkiquʼ chqä ri nkinaʼ. Chqä, ma nkiyaʼ ta qʼij chë kʼo jun —ri ma yë ta Jehová— njeʼ más ruqʼij chkiwäch chwäch ri kikʼlaj. Y, che kaʼiʼ nkichajij kiʼ rchë ma nbʼä ta kan chrij chik jun winäq.

TQATAMAJ MÁS CHRIJ RE NAʼOJ REʼ

4. Achiʼaʼ, tiwajoʼ chqä tichajij iwixjayil

VIDEO: Achiʼaʼ, tiwajoʼ iwixjayil achiʼel niwajoʼ qa iwiʼ rïx (9:53)

• ¿Achkë rubʼanik nukʼüt jun achï chwäch rixjayil chë nrajoʼ chqä chë nuquʼ rij?

Tiskʼij ruwäch Colosenses 3:12 y kixtzjon chrij reʼ:

• ¿Achkë rubʼanik nukʼüt jun achï re utziläj taq naʼoj reʼ chpan rukʼlajil?

5. Ixoqiʼ, tiwajoʼ chqä tiyaʼ ruqʼij iwachjil

Le Biblia nuʼij che rä ri ixöq chë tyaʼ ruqʼij ri rachjil, yajün taq ryä ma nuyaʼ ta ruqʼij Jehová. Tiskʼij ruwäch 1 Pedro 3:1, 2 y kixtzjon chrij reʼ:

• We ri awachjil ma nuyaʼ ta ruqʼij Jehová, kantzij na wä chë rït nawajoʼ chë ryä nuʼän riʼ. ¿Achkë naʼij rït chë xttoʼö rchë: ri ronojel mul natzjoj le Biblia che rä, o ri jaʼäl anaʼoj naʼän rkʼë chqä ma naqasaj ta ruqʼij? ¿Achkë rma naʼij riʼ?

Kan janina ütz taq jun achï chqä jun ixöq kan junan nkiquʼ chrij ri nkajoʼ nkiʼän. Ye kʼa kʼo mul ri ixöq ma junan ta xtquʼ rkʼë ri rachjil. Taq ya riʼ nbʼanatäj, ryä ütz nuʼij che rä rachjil ri nuquʼ. Ye kʼa ma rkʼë ta oyowal kʼo chë nuʼän wä riʼ y kʼo chë ma nuqasaj ta ruqʼij. Chqä, kʼo chë ma numestaj ta chë Jehová pa ruqʼaʼ ri achï ruyaʼon wä qa rchë nuchaʼ ri más ütz che rä ru-familia. Rma riʼ ri ixöq kʼo chë nuʼän jontir ri kʼo pa ruqʼaʼ rchë nutoʼ ri rachjil rkʼë ri xtchaʼ xtuʼän. Ke riʼ xttoʼon rchë jontir ri ye kʼo chpan ru-familia kiʼ kikʼuʼx xtkiʼän. Tiskʼij ruwäch 1 Pedro 3:3-5 y kixtzjon chrij reʼ:

• ¿Achkë nunaʼ Jehová taq nutzʼët chë ri ixöq kan nukʼüt chë nuyaʼ ruqʼij ri rachjil?

6. Ri kʼlan taq winäq yekowin yeqʼax chkiwäch ri kʼayewal nkïl pa kikʼlajil

VIDEO: Tikanuj rubʼanik rchë ütz nikʼwaj iwiʼ pan ikʼlajil (5:44)

• ¿Achkë xkʼutü chë ri kʼlaj winäq ri xeʼel pa video ma junan ta wä chik rubʼanon kiwäch?

• ¿Achkë xkiʼän ryeʼ rchë más ütz xkikʼwaj kiʼ pa kikʼlajil?

Tiskʼij ruwäch 1 Corintios 10:24 chqä Colosenses 3:13. Taq nikʼïs ruskʼixik jun texto, kixtzjon chrij reʼ:

• ¿Achkë rma jun kʼlaj winäq más ütz xtkikʼwaj kiʼ pa kikʼlajil we nkismajij re naʼoj reʼ?

Le Biblia nuʼij chë ri kʼlan taq winäq kʼo chë nkiyaʼ kiqʼij chkiwäch. Reʼ ntel chë tzij chë jaʼäl kinaʼoj kʼo chë nkiʼän rkʼë ri kikʼlaj chqä ma nkiqasaj ta ruqʼij. Tiskʼij ruwäch Romanos 12:10 y kixtzjon chrij reʼ:

• ¿Kʼo chë nkiyoʼej na ri kʼlan taq winäq chë yë ri kikʼlaj naʼäy kʼo chë nyaʼö kiqʼij, kʼa riʼ yë chik ryeʼ yebʼanö riʼ? ¿Achkë rma naʼij riʼ?

RI XQATAMAJ QA

Ri kʼlan taq winäq kan kiʼ kikʼuʼx xtkiʼän we nkajoʼ kiʼ, ma nkiqasaj ta kiqʼij chkiwäch chqä nkismajij ri naʼoj ye kʼo chpan le Biblia.

Tqakamluj ri xqatzʼët qa

• ¿Achkë rubʼanik ntoʼon jun achï rchë ryä chqä rixjayil kan kiʼ kikʼuʼx xtkiʼän pa kikʼlajil?

• ¿Achkë rubʼanik ntoʼon jun ixöq rchë ryä chqä rachjil kan kiʼ kikʼuʼx xtkiʼän pa kikʼlajil?

• We rït yït kʼlan chik, ¿achkë naʼoj chpan le Biblia naʼij rït chë yaturtoʼ rchë más ütz xtakʼwaj awiʼ rkʼë ri akʼlaj?

RCHË NATAMAJ MÁS

Tatzʼetaʼ achkë jojun naʼoj yatkitoʼ rchë kiʼ akʼuʼx xtaʼän chpan a-familia.

Rït chqä afamilia yixkowin kiʼ ikʼuʼx niʼän (Folleto)

Tatzʼetaʼ jun video ri nukʼüt achkë utzil nkïl ri kʼlan taq winäq taq nkismajij ri naʼoj yeruyaʼon Dios chkë.

Kowan yatinwajoʼ (4:26)

Tatzʼetaʼ achkë kʼo chë nuʼän jun ixöq rchë nunmaj rutzij rachjil.

«¿Achkë rma jun ixöq kʼo chë nunmaj rutzij ri rachjil?» (Ri Chajinel, 15 de mayo, 2010)

Tatzʼetaʼ achkëxtoʼö kichë jun kʼlaj qachʼalal taq jbʼaʼ ma xkichüp rwäch kikʼlanen.

Rkʼë rtoʼik Jehová, ütz chik jmul xqakʼwaj qiʼ pa qakʼlajil (5:14)