TJONÏK 53
Tabʼanaʼ chë Jehová kiʼ rukʼuʼx nuʼän rkʼë ri achoq chrij yakʼastan wä
Jehová ya riʼ «ri Dios ri kʼo kiʼkʼuxlal rkʼë» (1 Timoteo 1:11). Ryä nrajoʼ chë kiʼ qakʼuʼx nqaʼän pa qakʼaslemal. Chqä kan jaʼäl nutzʼët taq röj nquxlan che rä qasamaj chqä nqajäm qawäch rchë nqkʼastan jbʼaʼ. Chpan re tjonïk reʼ xtqatzʼët achkë jojun rubʼanik ütz nqaksaj qa-tiempo rchë nqkʼastan jbʼaʼ, ke riʼ Jehová kan kiʼ rukʼuʼx xtuʼän qkʼë.
1. ¿Achkë kʼo chë ma nqamestaj ta taq nqachaʼ achoq chrij xtqkʼastan wä?
¿Achkë nqä chawäch naʼän taq yït uxlanäq jbʼaʼ che rä asamaj? Ye kʼo jojun nqä chkiwäch yejeʼ qa chkachoch rchë nkiskʼij ruwäch jun libro, nkikʼoxaj bʼix, nkitzʼët jun película o yeʼok jbʼaʼ pa Internet. Nkʼaj chik nqä chkiwäch yebʼekʼastan kikʼë kichiʼil, achiʼel ta yebʼemuxan o yebʼetzʼan pelota. Xa bʼa achkë na nqä chqawäch röj nqaʼän, kʼo chë nqatzʼët na we kan xtqä chwäch Dios ri xtqachaʼ xtqaʼän o manä (Efesios 5:10). Ya reʼ kan nkʼatzin nqʼax chqawäch. ¿Achkë rma? Rma kʼïy chkë ri achoq chrij yekʼastan wä ri winäq xa kikʼwan kiʼ kikʼë ri itzel yerutzʼët Jehová, achiʼel ri itzelal, ri tzʼil taq bʼanobʼäl chqä ri itzinïk (taskʼij ruwäch Salmo 11:5). ¿Achkë xtqtoʼö rchë xtqachaʼ xtqaʼän ri ütz?
We yeqachaʼ qachiʼil ri nkajoʼ Jehová, ryeʼ xkojkitoʼ rchë ütz qanaʼoj xtqaʼän chqä rchë ütz xtqachaʼ achoq chrij xtqkʼastan wä. Achiʼel xqatamaj qa chpan ri tjonïk 48, «ri yerachbʼilaj ajnaʼoj taq winäq xttok jun ajnaʼoj winäq». Ye kʼa ri winäq ri nukʼwaj riʼ kikʼë ri ma nkismajij ta rupixaʼ Jehová «majun ütz ta xtrïl pa rukʼaslemal» (Proverbios 13:20).
2. ¿Achkë rma nkʼatzin nqayaʼ chqawäch jaruʼ tiempo xtqaksaj chrij ri achoq chrij xtqkʼastan wä?
Tapeʼ ma itzel ta ri achoq chrij nqkʼastan wä, röj kʼo chë nqachajij qiʼ rchë ma chriʼ ta xtbʼä wä jontir qa-tiempo, rma, we xa ke riʼ xtbʼanatäj, ma xtqkowin ta chik xtqaʼän ri achkë kʼo más kiqʼij. Le Biblia nuʼij reʼ chqë: «Kan ütz ruksaxik ri i-tiempo tibʼanaʼ» (taskʼij ruwäch Efesios 5:15, 16).
TQATAMAJ MÁS CHRIJ RE NAʼOJ REʼ
Tqatzʼetaʼ achkë ütz naʼän rït rchë kan ütz xtachaʼ achoq chrij xkakʼastan wä.
3. Ma kakʼastan ta chrij ri ma ütz ta
¿Achkë rma kʼo chë nqachaʼ ri achoq chrij nqkʼastan wä? Titzʼetaʼ ri VIDEO y kixtzjon chrij reʼ:
¿Achkë junan jbʼaʼ yebʼan chkipan jojun atzʼanen ri ye kʼo komä kikʼë ri xebʼan ojer?
Rkʼë ri xqatzʼët qa chpan ri video, ¿achkë xtamaj Danny chrij ri achoq chrij ütz nkʼastan wä?
Tiskʼij ruwäch Romanos 12:9 y kixtzjon chrij reʼ:
¿Achkë rubʼanik nqrtoʼ re texto reʼ rchë nqachaʼ achoq chrij ütz nqkʼastan wä?
¿Achkë jojun bʼanobʼäl kan itzel yerutzʼët Jehová? Tiskʼij ruwäch Proverbios 6:16, 17 chqä Gálatas 5:19-21. Taq nikʼïs ruskʼixik jun texto, kixtzjon chrij reʼ:
Chkë jontir ri xqaskʼij chpan re texto reʼ, ¿achkë más atzʼeton rït chë yeʼel chkipan películas, atzʼanen o xa bʼa achkë chik jun ri achoq chrij yekʼastan wä ri winäq?
Ri ütz naʼän rchë kan ütz xtachaʼ achoq chrij xkakʼastan wä
Takʼutuj qa reʼ chawäch:
¿Kʼo bʼanobʼäl yeʼel o yebʼan chpan ri kan itzel yerutzʼët Jehová?
¿Nkesaj n-tiempo rchë nbʼän ri achkë kʼo más kiqʼij?
¿Xtinkʼwaj kowan wiʼ kikʼë winäq ri ma nkiyaʼ ta ruqʼij Jehová?
Rchë ma xtqïl ta kamïk, kʼo chë nqanmäj äl chwäch ri xa nuʼän chë nxiʼin rij qakʼaslemal. Rma riʼ kʼo chë ma nqkʼastan ta chrij xa bʼa achkë jun ri nqanaʼ röj chë xa xtkʼäm pä kʼayewal pa qawiʼ.
4. Kan pa rubʼeyal taksaj a-tiempo
Titzʼetaʼ ri VIDEO y kixtzjon chrij reʼ:
Tapeʼ ri qachʼalal ri xel pa video ma najin ta wä nuʼän jun ri ma ütz ta, ¿achkë kʼayewal xrïl rma ri rubʼanik najin wä nuksaj ru-tiempo?
Tiskʼij ruwäch Filipenses 1:10 y kixtzjon chrij reʼ:
¿Achkë rubʼanik nqrtoʼ re texto reʼ rchë nqachaʼ jaruʼ tiempo xtqaksaj chrij ri nqä chqawäch nqaʼän?
5. Kakʼastan chrij ri kʼo utzil nukʼäm pä pan awiʼ
Kantzij na wä chë Jehová ma nqä ta chwäch jojun rubʼanik yekʼastan ri winäq, ye kʼa kan kʼïy kʼastanen kʼo ri ma itzel ta yerutzʼët, y röj ütz nqkʼastan chrij riʼ. Tiskʼij ruwäch Eclesiastés 8:15 chqä Filipenses 4:8, y kixtzjon chrij reʼ:
¿Achoq chrij nqä chawäch rït yakʼastan wä?
Kʼo kʼïy ri achoq chrij ütz nqkʼastan wä.
JOJUN WINÄQ NKIʼIJ REʼ: «¿Kan itzel komä yakʼastan chrij ri yeʼel o yebʼan itzinïk chkipan o chʼaʼoj chqä sexo? ¡Ri ma ütz ta ya riʼ kan naʼän riʼ!».
¿Achkë naʼij rït?
RI XQATAMAJ QA
Jehová nrajoʼ chë röj nqkʼastan chrij ri ma ye itzel ta chqä chë kiʼ qakʼuʼx nqaʼän rkʼë riʼ.
Tqakamluj ri xqatzʼët qa
¿Achoq chrij ma ütz ta nqkʼastan wä röj ri cristianos?
¿Achkë rma kan nkʼatzin nqatzʼët jaruʼ tiempo najin nqaksaj rchë nqkʼastan?
¿Nawajoʼ rït yakʼastan chrij ri nqä chwäch Jehová? ¿Achkë rma?
RCHË NATAMAJ MÁS
Tatzʼetaʼ achkë kʼo chë nbʼin chqë achoq chrij ütz nqkʼastan wä.
Tatzʼetaʼ achkë ütz naʼän rchë kan ütz xtachaʼ achoq chrij xkakʼastan wä.
«¿Itzel komä ri achoq chrij najin nqkʼastan wä?» (Ri Chajinel, 15 de octubre, 2011)
Tatamaj chpan ri peraj «Ma itzel ta chik xinnaʼ chkë ri winäq» achkë rma jun achï xeruyaʼ qa jojun kʼastanen.
«Le Biblia xjäl kikʼaslemal» (Ri Chajinel, 1 de febrero, 2010)
Tatzʼetaʼ achkë xchaʼ xuʼän jun ixöq taq xrajoʼ xkʼastan chrij jun ri xa rukʼwan riʼ kikʼë ri itzel taq espíritus.