TJONÏK 55
Katoʼon chpan a-congregación
Chkipan kʼïy congregaciones chwäch jontir le Ruwachʼulew, kan pa millón winäq kiʼ kikʼuʼx nkiyaʼ ruqʼij Jehová. Re winäq reʼ kan nkiloqʼoqʼej jontir ri nkʼut chkiwäch chqä kan rkʼë ronojel kan y jalajöj rubʼanik yetoʼon chpan ki-congregación. ¿Ke riʼ chqä anaʼon rït chpan a-congregación?
1. ¿Achkë rubʼanik ütz naksaj a-tiempo chqä awchqʼaʼ rchë yatoʼon chpan ri congregación?
Jontir nqkowin nqtoʼon chpan ri congregación. Jojun tzʼetbʼäl, ¿ye kʼo qachʼalal chpan a-congregación ri ya kʼo chik kijunaʼ o kʼo jun kiyabʼil? ¿Ütz komä nuʼän chawäch rït yeʼakʼwaj pa qamoloj, yeʼatoʼ rkʼë ri kiloqʼoj o rkʼë ri kisamaj pa kachoch? (Taskʼij ruwäch Santiago 1:27). Chqä, ütz nqatzüj qiʼ rchë nqajosqʼij o nqaʼän rubʼanik ri Salón del Reino. Majun ta jun nbʼin chqë chë kʼo chë nqaʼän riʼ; röj kan rkʼë ronojel qan nqaʼän ri samaj riʼ rma nqajoʼ Dios chqä yeqajoʼ ri qachʼalal (Salmo 110:3).
Ri Testigos ri yeqasan chik pa yaʼ kʼo jalajöj rubʼanik ri yekowin yetoʼon chpan ri congregación. Ri qachʼalal ri nkismajij ri nuʼij le Biblia chkij ri yekʼwan bʼey chpan ri congregación ütz yeʼok toʼonelaʼ, y chrij riʼ ukʼwäy taq bʼey. Y jontir röj, achiʼaʼ chqä ixoqiʼ, ütz nq-ok precursores rchë nqaʼän más chpan rusamaj Jehová. Chqä, ye kʼo jojun Testigos yetoʼon chkiyakik jay rchë nyaʼöx ruqʼij Dios chkipan. Y ye kʼo nkʼaj chik yebʼä jukʼan chik tinamït rchë yebʼetoʼon chpan jun chik congregación.
2. ¿Achkë rubʼanik ütz nqaksaj ri qarajil chqä ri achkë kʼo qkʼë rchë nqtoʼon chpan ri congregación?
Le Biblia nuʼij: «Tayaʼ ruqʼij Jehová rkʼë abʼeyomal» (Proverbios 3:9). Chqawäch röj, kan jun nüm spanïk ri nqkowin nqaksaj qarajil chqä ri achkë kʼo qkʼë rchë nqtoʼon chpan qa-congregación chqä rchë nqatoʼ ri samaj najin nbʼan chrij rutzjoxik le Biblia (taskʼij ruwäch 2 Corintios 9:7). Chqä, rkʼë ri qakchaj yeqatoʼ ri qachʼalal ri nkiqʼaxaj jun nüm kʼayewal. Ye kʼïy qachʼalal rukʼulun chkë nkikʼöl qa jbʼaʼ kirajil rchë nkiyaʼ kikchaj (taskʼij ruwäch 1 Corintios 16:2). Ri kchaj riʼ ütz yeqayaʼ qa chkipan ri kax ri ye kʼo pa qa-Salón o nqatäq äl pa Internet chpan donate.jw.org. Jehová ruyaʼon qʼij chqë rchë nqaksaj ri achkë kʼo qkʼë rchë nqakʼüt chwäch chë nqajoʼ.
TQATAMAJ MÁS CHRIJ RE NAʼOJ REʼ
Tqatzʼetaʼ achkë jojun rubʼanik ütz yatoʼon chpan ri congregación.
3. Ütz naksaj ri achkë kʼo awkʼë
Jehová yerajoʼ ri winäq ri kan kiʼ kikʼuʼx nkiyaʼ ri kʼo kikʼë, y Jesús chqä kan ke riʼ nunaʼ chkij. Jun tzʼetbʼäl, Jesús xtzʼët taq jun malkaʼn ixöq xyaʼ rukchaj tapeʼ ma kan ta achkë wä kʼo rkʼë. Tiskʼij ruwäch Lucas 21:1-4 y kixtzjon chrij reʼ:
¿Nkʼatzin komä nqayaʼ kʼïy qakchaj rchë Jehová kiʼ rukʼuʼx nuʼän qkʼë?
¿Achkë nunaʼ Jehová chqä Jesús taq nkitzʼët chë kan pa qan naläx wä pä nqayaʼ ri kʼo qkʼë?
Rchë nitzʼët achkë rubʼanik yeksäx ri qakchaj, titzʼetaʼ ri VIDEO. Chrij riʼ kixtzjon chrij reʼ:
¿Achkë utzil nkïl ri congregaciones chwäch jontir le Ruwachʼulew rma ri qakchaj nqayaʼ?
4. Ütz natzüj awiʼ rchë yatoʼon
Ri rusamajelaʼ Jehová ojer kan kiʼ kikʼuʼx xetoʼon chkijosqʼixik ri jay ri xekiksaj rchë xkiyaʼ ruqʼij Dios chkipan, y ma xa xuʼ ta xetoʼon rkʼë ri kikchaj. Tiskʼij ruwäch 2 Crónicas 34:9-11 y kixtzjon chrij reʼ:
¿Achkë xkiʼän jontir ri israelitas rchë xkiʼän rubʼanik «rachoch Jehová», ntel chë tzij, ri jay ri xkiksaj rchë xkiyaʼ ruqʼij?
Rchë nitzʼët achkë rubʼanik nkikʼän kinaʼoj ri testigos de Jehová chkij ryeʼ, titzʼetaʼ ri VIDEO. Chrij riʼ kixtzjon chrij reʼ:
¿Achkë rma kan kʼo ruqʼij nqachʼajchʼobʼej ri qa-Salón del Reino chqä nqaʼän rubʼanik?
¿Achkë rubʼanik ütz yatoʼon rït?
5. Ri qachʼalal achiʼaʼ ütz nkitäj kiqʼij rchë nyaʼöx más samaj pa kiqʼaʼ
Le Biblia nuʼij chkë ri qachʼalal achiʼaʼ chë tkitjaʼ kiqʼij rchë nkʼuqeʼ más kikʼuʼx chpan ruchʼaʼäl Dios, rchë ke riʼ xkekowin xketoʼon más chpan ri congregación. Rchë nitamaj ruwäch jun qachʼalal ri xuʼän riʼ, titzʼetaʼ ri VIDEO. Chrij riʼ kixtzjon chrij reʼ:
¿Achkë xuʼän Ryan rchë xkʼuqeʼ más rukʼuʼx chpan ruchʼaʼäl Dios chqä rchë xtoʼon más chpan ri congregación?
Le Biblia nuʼij achkë kʼo chë nkiʼän ri qachʼalal ri nkajoʼ yeʼok toʼonelaʼ chqä ukʼwäy taq bʼey. Tiskʼij ruwäch 1 Timoteo 3:1-13 y kixtzjon chrij reʼ:
¿Achkë nkʼatzin nkiʼän ri qachʼalal ri nkajoʼ yeʼok toʼonelaʼ chqä ukʼwäy taq bʼey?
¿Achkë kʼo chë nkiʼän ri ki-familias? (Titzʼetaʼ ri versículos 4 chqä 11).
We ri qachʼalal nkiʼän jontir ri kʼo pa kiqʼaʼ rchë nkismajij re naʼoj reʼ, ¿achkë utzil nukʼäm pä riʼ pa ruwiʼ ri congregación?
JOJUN WINÄQ RKʼË JBʼAʼ XTKIKʼUTUJ REʼ CHAWÄ: «¿Akuchï nkikʼän wä päq ri testigos de Jehová rchë nkiʼän kisamaj?».
¿Achkë xtaʼij rït chkë?
RI XQATAMAJ QA
Jehová kowan nuloqʼoqʼej chë röj nqaksaj ri qa-tiempo, ri qachqʼaʼ chqä ri achkë kʼo qkʼë rchë nqtoʼon chpan ri congregación.
Tqakamluj ri xqatzʼët qa
¿Achkë rubʼanik ütz nqaksaj ri qa-tiempo chqä ri qachqʼaʼ rchë nqtoʼon chpan ri congregación?
¿Achkë rubʼanik ütz nqaksaj ri achkë kʼo qkʼë rchë nqtoʼon chpan ri congregación?
¿Achkë rubʼanik nawajoʼ yatoʼon rït chpan ri congregación?
RCHË NATAMAJ MÁS
Tatzʼetaʼ achkë rma Dios ma nuyoʼej ta chik chë ri rusamajelaʼ nkiyaʼ ki-diezmo.
«¿Achkë nuʼij le Biblia chrij ri diezmo?» (Reʼ xtawïl pa jw.org)
Le Biblia nuʼij chë kʼo jojun samaj xuʼ qachʼalal achiʼaʼ ütz yebʼanö rchë. ¿Ye kʼa achkë nkʼatzin nuʼän jun qachʼalal ixöq we nkʼatzin nuʼän jun chkë ri samaj riʼ?
«Ri uchqʼaʼ yaʼon qa pa kiqʼaʼ ri ukʼwäy taq bʼey pa congregación» Ri Chajinel, febrero, 2021
Tatzʼetaʼ achkë nkiʼän jojun Testigos rchë nkibʼejachaʼ ki-publicaciones ri kichʼalal.
Ri Testigos ma junan ta rubʼanik nkïl ri päq ri nkiksaj rchë nkiʼän kisamaj chwäch ri nkiʼän ri nkʼaj chik religiones. Tatzʼetaʼ achkë rubʼanik nkïl ri päq riʼ.
«¿Akuchï nkikʼän wä päq ri testigos de Jehová rchë nkiʼän kisamaj?» (Reʼ xtawïl pa jw.org)