¿Ataman rït reʼ?

¿Achkë rma Esteban ma xuxiʼij ta riʼ xjeʼ chkiwäch ri qʼatöy taq tzij?

ESTEBAN kʼo wä chkiwäch ye 71 achiʼaʼ ri kan itzel nkinaʼ che rä. Ri achiʼaʼ riʼ ya riʼ ri yeqʼatö tzij chpan ri Sanedrín. Jujun chkë ri ye kʼo chpan ri molaj riʼ kan janina kiqʼij chkiwäch ri judíos. Caifás, ri sumo sacerdote, ya riʼ wä xmolö kichë ri achiʼaʼ riʼ. Chqä kan yë ri sacerdote riʼ, ri pa jun kayoxiʼ ikʼ qa, xukʼwan bʼey taq xqʼat tzij pa ruwiʼ Jesús rchë xkamsäx (Mateo 26:57, 59; Hechos 6:8-12). Ye kʼïy winäq xa xuʼ tzʼukün taq tzij nkiʼij wä chrij Esteban. Tapeʼ ke riʼ, ri ye kʼo pa Sanedrín kan xsach kikʼuʼx rma xkitzʼët chë rupaläj Esteban kan achiʼel rupaläj jun ángel (Hechos 6:13-15).

¿Achkë xtoʼö Esteban rchë ma xuxiʼij ta riʼ xpaʼeʼ chkiwäch ri qʼatöy taq tzij? Taq majanä wä tukʼwäx chkiwäch ri Sanedrín, kan ruyaʼon wä ran chrij rusamaj pa congregación rkʼë rutoʼik ri loqʼoläj espíritu (Hechos 6:3-7). Taq najin wä nqʼat tzij pa ruwiʼ, ri loqʼoläj espíritu xukʼuqbʼaʼ rukʼuʼx chqä xutoʼ rchë xernataj pä ri tzʼibʼatäl qa chpan ri Ruchʼaʼäl Dios (Juan 14:16, nota). Chpan ri capítulo 7 che rä ri wuj Hechos, nuʼij chë taq Esteban najin wä nutoʼ riʼ chkiwäch ri qʼatöy taq tzij, ri loqʼoläj espíritu xuʼän chë xernataj jun veinte peraj che rä ri Escrituras Hebreas (Juan 14:26). Ye kʼa ri rukʼuqbʼäl kʼuʼx más xkowïr taq xkʼutmär chwäch chë Jesús kʼo chuxkïn Dios chlaʼ chkaj (Hechos 7:54-56, 59, 60).

Rkʼë jubʼaʼ jun qʼij, röj chqä xtqyoqʼ o xkeyaʼöx kʼayewal pa qawiʼ xa rma nqayaʼ ruqʼij Dios (Juan 15:20). We rukʼulun chqä nqaskʼij le Biblia chqä nqatzjoj rkʼë ronojel qan, xtqayaʼ qʼij chë ri loqʼoläj espíritu xtsmajin qakʼaslemal. Riʼ xtuyaʼ chqä qachqʼaʼ rchë xkeqaköchʼ ri kʼayewal xkeyaʼöx pa qawiʼ chqä ma xtkʼis ta ri uxlanen pa qan (1 Pedro 4:12-14).