¿Ayoʼen chik rït nyaʼöx qa le Ruwachʼlew chawä?

TAKʼUTUʼ CHË NAWAJOʼ YATOʼON RCHË LE RUWACHʼLEW KOTZʼIJALÄJ NUʼÄN RUWÄCH

Taq Jehová xuʼij chkë ri winäq «tinujsaj le Ruwachʼlew, tismajij chqä tichajij», ryä xkʼüt chë jun qʼij jontir le Ruwachʼlew xtbʼeʼok na jun kotzʼijaläj ilew (Gén. 1:28). Ri winäq ri xtyaʼöx qa le Ruwachʼlew chkë kʼo chë xketoʼon rchë xtbʼetzʼaqät riʼ. Taq xtqʼax ri Armagedón, majun ta jun peraj rchë le Ruwachʼlew kotzʼijaläj rubʼanon ruwäch, rma ri jardín de Edén kan ojer riʼ xchaʼ chiʼ. Rma riʼ kan kʼïy xtkʼatzin xtqaʼän rchë xtqachojmij jontir ri xkitzʼlaʼ ri winäq ri ma xkiyaʼ ta ruqʼij Dios. ¡Kan jun mamaʼ samaj xtkʼatzin xtqaʼän!

Ri israelitas ri xeʼel äl Babilonia ya riʼ jbʼaʼ xkʼatzin xkiʼän taq xetzolin pa kitinamit, ri 70 junaʼ xtoleʼ qa. Ye kʼa rkʼë rutoʼik Jehová, ryeʼ xkekowin wä xtkiyäk chik jmul ri tinamït, kan achiʼel wä xuʼij qa Isaías. Ryä xuʼij: «Xtuʼän chë ri tzʼiran ilew xttok achiʼel ri Edén y ri juyuʼ ri majun kʼo chwäch kan achiʼel ru-jardín Jehová» (Is. 51:3). Ri israelitas xekowin xkiʼän chë kan jaʼäl xuʼän ri ilew ri akuchï xejeʼ wä. Ke riʼ chqä xtbʼanatäj kikʼë ri xtyaʼöx qa le Ruwachʼlew chkë. Rkʼë rutoʼik Jehová, ryeʼ xkekowin xtkiʼän chë jontir le Ruwachʼlew kotzʼijaläj xtuʼän ruwäch. Y kan komä, rït yakowin nakʼüt chë nawajoʼ yatoʼon rkʼë ri samaj riʼ.

Jojun ri ütz naʼän ya riʼ naʼän jontir ri kʼo pan aqʼaʼ rchë chʼajchʼöj naʼän che rä rupan awachoch chqä ri kʼo äl chrij. Rït ütz naʼän riʼ tapeʼ a-vecinos ma rukʼulun ta chkë nkiʼän riʼ. Rït chqä ütz yatoʼon taq nchʼajchʼobʼëx chqä nchojmïx ri Salón del Reino chqä ri akuchï nbʼan wä ri qanimamoloj. Y, we ütz nuʼän chawäch, ütz natzüj awiʼ rchë yatoʼon taq ri qachʼalal nkiqʼaxaj kʼayewal rma jun qʼeqäl jöbʼ, jun mamaʼ slonel o jun chik kʼayewal. Ke riʼ xtakʼüt chë kantzij nawajoʼ yeʼatoʼ ri winäq ri nkʼatzin kitoʼik. Takʼutuj qa reʼ chawäch: «¿Ütz nuʼän chi nwäch ntamaj jojun chik samaj ri xkekʼatzin we Jehová nuyaʼ qʼij chwä rchë yikanaj qa chwäch le Ruwachʼlew?».

TAKʼUTUʼ CHË NAWAJOʼ YEʼAKʼÜL APÜ RI WINÄQ RI XKEKʼASÖX PÄ

Taq Jesús xkʼasoj rumiʼal Jairo, ryä xuʼij chë tyaʼöx ruway ri akʼal riʼ (Mar. 5:42, 43). Rkʼë jbʼaʼ ma kʼayewal ta xyaʼöx ri nkʼatzin che rä ri akʼal riʼ ri 12 wä rujunaʼ. Ye kʼa kan xtkʼwaj samaj taq Jesús xtuʼän chë xtbʼetzʼaqät reʼ: «Konojel ri kamnaqiʼ ri ye kʼo pa taq jül xtkikʼoxaj nchʼaʼäl y xkebʼeʼel pä» (Juan 5:28, 29). Tapeʼ le Biblia ma kan ta nuʼij, ütz nqaʼij chë ri winäq ri xkekʼasöx pä xtkʼatzin kiway, kachoch chqä kitzyaq. ¿Yakowin nakʼüt rït komä chë nawajoʼ yatoʼon taq xtbʼanatäj riʼ? Taquʼ kij re kʼutunïk reʼ.

Taq pan a-congregación nbʼix chë xtapon ri ukʼwäy bʼey rchë circuito, ¿natzüj awiʼ rït rchë nayaʼ ruway? Taq jun betelita ntok precursor regular rma xjal rusamaj o taq jun ukʼwäy bʼey rchë circuito ma nuʼän ta chik ri samaj riʼ, ¿ütz nuʼän chawäch yeʼatoʼ rchë nkïl jun kachoch? We chpan atinamit nbʼan jun asamblea especial o ri nyalöj oxiʼ qʼij, ¿ütz nuʼän chawäch natzüj awiʼ rchë yatoʼon taq majanä tchapatäj ri nimamoloj o taq ya xkʼis?¿O ütz yeʼakʼül apü ri qachʼalal ri yeʼapon chkipan ri nimamoloj riʼ?

TAKʼUTUʼ CHË NAWAJOʼ YEʼATJOJ RI XKEKʼASÖX PÄ

Ri nuʼij Hechos 24:15 nukʼüt chë kan pa mil chë millón winäq xkekʼasöx pä. Ye kʼïy chkë ryeʼ ma xkitamaj ta ruwäch Jehová taq kʼa ye kʼäs na, ye kʼa chwäch ri kʼakʼakʼ Ruwachʼlew xtyaʼöx qʼij chkë rchë xtkiʼän riʼ.a Ri kan kʼïy junaʼ kiyaʼon pä ruqʼij Jehová xketoʼon chpan re nimaläj samaj reʼ (Is. 11:9). Ya Charlotte, jun qachʼalal ri rutzjon le Biblia Europa, Sudamérica chqä África, kan ruyoʼen chik ri qʼij riʼ. Ryä kan tzeʼël ntzuʼun taq nuʼij reʼ: «Kan nrayij yentjoj ri winäq ri xkekʼastäj pä. Taq nskʼij chrij jun winäq ri xjeʼ ojer, kʼïy mul nquʼ reʼ: ‹Xa ta le winäq laʼ xtamaj ta ruwäch Jehová, jun ta chik kʼaslemal xkʼwaj›. Rïn kʼo ta nwajoʼ chë najin ta chik ntzjoj chkë ri winäq riʼ chrij Jehová chqä nwajoʼ nbʼij chkë chë más ütz xkebʼä pa kikʼaslemal we nkiyaʼ ruqʼij».

Yajün ri rusamajelaʼ Jehová ri xejeʼ taq majanä tpë Jesús chwäch le Ruwachʼlew kʼa kʼïy na xtkʼatzin xtkitamaj. Röj kan jaʼäl xtqanaʼ chqä kan jun nimaläj utzil xtqatzʼët ri xtqaqʼalajsaj chwäch Daniel achkë rubʼanik xetzʼaqät ri profecías ri xerutzʼibʼaj qa ryä ye kʼa ma xqʼax ta pa rujolon (Dan. 12:8). ¿O xuʼ taquʼ achkë xtqanaʼ taq xtqatoʼ Rut chqä Noemí rchë xtkitzʼët chë ri Mesías pa kijatzul ryeʼ xel wä? Achiʼel nqatzʼët, röj kan jaʼäl xtqanaʼ xkeqatjoj winäq ri ye kʼo chwäch ronojel le Ruwachʼlew. Y rma ri itzel taq winäq ma xkejeʼ ta chik majun ta chik jun xtqqʼatö chubʼanik re samaj reʼ.

¿Achkë komä rubʼanik nakʼüt rït chë nawajoʼ yatoʼon chpan ri nimaläj samaj riʼ? Jun rubʼanik naʼän riʼ ya riʼ natäj aqʼij rchë yatok jun más ütz tijonel chqä rchë natzjoj le Biblia che rä xa bʼa achkë winäq (Mat. 24:14). Yajün we ri ajunaʼ o jun chik kʼayewal nuʼän chë ma yakowin ta naʼän jontir ri nawajoʼ chpan rutinamit Jehová. We xtatäj aqʼij chubʼanik re samaj reʼ, xtakʼüt chë nawajoʼ yeʼatjoj ri winäq ri xkekʼasöx pä.

Ye kʼa ütz chë rït naquʼ kij re kʼutunïk reʼ ri kan kʼo kejqalen: ¿kantzij nawajoʼ yakanaj qa chwäch le Ruwachʼlew?, ¿kan ntel akʼuʼx taq naquʼ chë xkakowin xkatoʼon rchë le Ruwachʼlew kotzʼijaläj nuʼän ruwäch, chë yeʼakʼül apü ri xkekʼasöx chqä rchë nakʼüt Ruchʼaʼäl Dios chkiwäch? Xtakʼüt chë rït nawajoʼ naʼän jontir riʼ we xtaʼän jontir ri kʼo pan aqʼaʼ chkibʼanik samaj ri junan jbʼaʼ rkʼë ri xtaʼän taq xtyaʼöx qa le Ruwachʼlew chawä.