Ri chʼaʼoj chlaʼ Ucrania najin nuʼän chë njeʼ más wayjal

Pa 29 de Mayo, 2022 ri Consejo de Seguridad rchë ri ONU, xuʼän jun moloj ri akuchï xejeʼ más ye 75 oficiales ri kan kʼo kiqʼij. Chpan ri moloj riʼ xbʼix chë «ri wayjal chwäch jontir le Ruwachʼlew, ri xnmatäj rma ri COVID-19 chqä rma ri clima, rkʼë jbʼaʼ más na chik xtnmatäj rma ri chʼaʼoj ri najin nbʼanatäj chlaʼ Ucrania». Jbʼaʼ chrij riʼ, ri revista The Economist xuʼij chë ri chʼaʼoj xtuʼän chë xtjeʼ más wayjal chwäch jontir le Ruwachʼlew. Le Biblia kan ojer chik rubʼin qa chë xtjeʼ wayjal achiʼel ya reʼ pa qaqʼij röj, ye kʼa nuʼij chqä achkë kʼo chë nqaʼän rchë nqqʼax chwäch ri kʼayewal riʼ.

Le Biblia nuʼij chë xtjeʼ wayjal

•  Jesús xuʼij: «Xtjeʼ chʼaʼoj chkiwäch ri tinamït chqä chkiwäch ri qʼatbʼäl taq tzij. Y xa bʼa akuchï xtjeʼ wayjal» (Mateo 24:7).

•  Ri wuj Apocalipsis nutzjoj kij kajiʼ kej. Jun chkë ri kej riʼ nukʼambʼej tzij ri chʼaʼoj, y chrij ri kej riʼ bʼenäq chik jun ri nukʼambʼej tzij ri wayjal. Ri profecía nuʼij chë ri rukïl wäy xtjoteʼ kajäl rma ma kan ta xtqïl chik. Le Biblia nuʼij: «Xintzʼët jun kej ri qʼäq rij. Y ri chʼoköl chrij rukʼwan jun balanza pa ruqʼaʼ. Y [...] xinkʼoxaj jun chʼaʼäl ri nuʼij: ‹Xa xuʼ jun kilo trigo ntok chwäch rajäl ruqʼij jun winäq, y oxiʼ kilos cebada ntok chwäch rajäl ruqʼij jun winäq›» (Apocalipsis 6:5, 6, Dios Habla Hoy).

Re profecías reʼ najin yetzʼaqät pa qaqʼij komä. Le Biblia nuʼij chë yoj kʼo chpan ri tiempo ri nbʼix «rukʼisbʼäl taq qʼij» che rä (2 Timoteo 3:1). We nawajoʼ natamaj más chrij ri «rukʼisbʼäl taq qʼij» chqä chkij ri kajiʼ kej ri nutzjoj Apocalipsis, tatzʼetaʼ ri video Pa 1914 xjalatäj jontir chwäch le Ruwachʼlew chqä tatzʼetaʼ ri peraj «¿Achkë nkikʼambʼej tzij ri kajiʼ kej ri nutzjoj Apocalipsis?».

¿Achkë rubʼanik nqrtoʼ le Biblia?

•  Chpan le Biblia ye kʼo utziläj taq naʼoj ri yojkitoʼ rchë nqqʼax chkiwäch ri kʼayewal, kʼayewal achiʼel ri jotäl kajäl xa bʼa achkë jun, o ri ma kan ta nawïl chik achkë natäj. Jojun chkë ri naʼoj nuyaʼ le Biblia nawïl chpan ri peraj «¿Achkë ütz naʼän taq ma kan ta achkë kʼo awkʼë?».

•  Le Biblia chqä nukʼuqbʼaʼ qakʼuʼx taq nuʼij chë chqawäch apü más ütz xtuʼän qakʼaslemal. Chriʼ nuʼij chë xtapon ri qʼij taq «kan pa rukʼiyal kiwäch ri tkoʼn xkewachin chwäch le Ruwachʼulew» y majun ta chik jun ri xttäj ta nmïk (Salmo 72:16). Rchë natamaj más chrij reʼ y achkë rma ütz nanmaj chë kantzij xtbʼanatäj, tatzʼetaʼ ri peraj «Ri utziläj kʼaslemal qayoʼen chqawäch apü».