I minë-eny Heprāi
12 Lökten yēḵ hī havīlöng tö ngam tökiröng taṙul yip ameū-a ngaich ta-a töi kavalngö nup taṙòkhöre lumnganre hēk ngam tökööl inrē ngam tö lööṙen inlahen nö ha-ūötö hī ngaich holtö manööyöre öi fal im finālö, 2 hēk haköpmatre öi hatīönken Yēsū ngam tö mötlö yöngkūö ngam ṙinatö-ellōn hī hēk ma-ahetlen e inrē. Chö-öinytö ngam ṙanamlōn anga-aṅ ngam tö ṙāḵtu nö ikūö ò, nöng hökngenre nö fëli nö irōi ngam chōn inkihten* hēk öt fēkö ngam sinrōngkūö inrē anga-aṅ ngaich an töngamuh nö ūichhak nö lāhāmö ngam kantēra ngam Tēv. 3 Heūṅ, chumkūöṙen takô tö ò ngam töng hamökngenre nöng ötlēḵka elnang tö yip tököölö fālen ngam lökten cha nöng kahngenre nö kaheūköre nö tököölö fālen, hòṅ yīö öt chëingöre ngaich heūlngöre.
4 Öl töngamuh nö hěngtak in yīö tö ngatī kanihngen nö la-al ngam tökööl, töp inlahen yīö öre öi hëmnyi mahām. 5 Ngaich pöri yī-ö vaichngö takô tö ngih inlēnö, chūök yīö öi Kūön invëka: “Kūön chu, uh man höhölōn tö ngam inköphöti lamöktö in Yāvē,* ngaich um heūlngöre yēḵ ò nö halēnö meh, 6 pò yip hanangenlōn Yāvē* ngaich halēnö cha anga-aṅ, rö-ö inrē anga-aṅ pön foh* yip nyīö yip töhō-ovö nö kūön ò.”
7 Ngatī inrē yī-ö öi höng hökngenre öi sā tö halēnö,* pò ngam Tēv nö kūönre lōn tö yīö, lökten nö ngatī inlahen nö in yīö. Achīö öp in yīö öp töt halēnö tö yöngre? 8 Ngaich yēḵ yīö öi öt ngatī inlēnö öi ṙòkhöre ngaich rö-ö yī-ö öi tökô-en öi kūön, pöi höng kūön yip töng asěhka. 9 Rö-ö nöng angū-ö, pön ngatī inlahen inrē misī yik yöng ih nö halēnö ih ngaich milēḵṙen īhö tö cha. Ngaich hö-ö hòng ayī-ö öi hòṅ mötlö inlahen öi tumṙeūtöre tö ngam Yöng ngam kamëtö ngam nômö hī nö löktö im töhet kumlēḵ, hòṅ hī öi höng örheūheu aṅ? 10 Nup tölöök nö imat yip yöng ih ngaich ngatī inlahen cha-a nö halēnö ih, ngaich rö-ö anū-ö pön töng rahëichtaṙen, chö-öinytö yanöölen hī pöri ngam Tēv nö halēnö hī hòṅ hī öi sā ò öi köp im hanëtö. 11 Kô-en yěn ōt tö halēnö ngaich öt ṙamlōn anga-aṅ, haṙivlōn pöri, yip tö harūnö pöri tö u ngaich teūngen cha-a tö ṙòng ngam lanāmö hēk lanöökö.
12 Lökten yin hangönken minë tölachëyi këlre hēk minë tötkalē-en kui kinmônö yīö, 13 hēk iṙūöhen öi hachip el talöököre öi vāngngöre, hòṅ minë tötkalē-en kalröön nö öt teuklöre ngam linkölngökūö e, lööken pöri. 14 Köptī tö ngam lanāmö i taṙòkhöre tarik hēk iṙūöhen pītnyöre köptī tö ngam hanëtö, hòn öt ōt tarik mameuk ngam Mā yěn öt īnu tö e. 15 Chumkūöṙen hòn öt tarīku in yīö tö löhlö tī tö ngam tökiröng miṙēḵlōn ngam Tēv, hòn öt ōtre tö kapahavkūö tī ṙěh nö sīöplö nö elhôi yīö nup kamëtö kanihngen hēk lökten in e yip tarik nö chōichngöre. 16 Hēk chumkūöṙen inrē tö ngih nö un hěngtak in yīö chamô-òṅkānö,* un rēhěn nö sā inlahen Isô ngam töt milēḵṙen tö minë töhet chehen hēk katölngen ngam aminre nö lanòh nö chö-öinyten tö ngam töng hěngheuh nyā-aṅkūö. 17 Akahalōn yī-ö tö ò nö unôichngöre nö hòṅ lōnu nö amīnu tö ngam inkôlò ngaich sō-ov ngaich anga-aṅ, holtö makmatre anga-aṅ nö kalē-ě ṙô nö peuiny nö hòṅ haṙīngö ngam fësla ò* lang, sön pöri anga-aṅ nö ötkô nö haṙīngö ngam fësla ò.
18 Pò yīö öt kô-en öi chuh in ngam rôngö ngam tö mihôiṅ nö lūölka hēk ngam tö hūkūö tameūiyö hēk ötrēhěn yī-ö yihtöre in ngam tösah taṙul tökalē-ě sinngūlö hēk kuföt inrē. 19 Ötrēhěn yī-ö öi hang kumlēḵ ṙô ngam fanöö hēk ötrēhěn öi hang ṙô yip tö ṙënuṙô ngam tö hāngö tö yip tarik nö hòṅ aṙētu ṙô nö un hēk nö vë-ekūö cha. 20 Pò cha nö pa-ekūö takô tö ngih chööngö: “Yěn pòrô min töṙeūla chamuh kui ngih rôngö, sön min anga-aṅ nö kulëhe nö kumpaha tö ihong.” 21 Hěnghöre yöng pinhë-eṅkūö ngih tö meūkö töp lökten Môsös nö ngö ṙô: “Kichëyöre takô chin tökūö pinhë-eṅkūöre.” 22 Yihtöre pöri yī-ö im Rôngö Siyôn öi el panam ngam tö aṅ Tēv, in ngam Yērūsalem el halīöngö, im manūlö yip tö lāku ṙôken ma-ahānga, 23 hēk yihtöre el ngam māṅ in yip lanòh ngam Tēv më tökūichi minë-eny nö el halīöngö hēk yihtöre in ngam Tēv kamhôkken yip taṙòkhöre hēk yihtöre inrē in yip tölöök tarik yip töfötnyu tö ngam töhet kumlēḵ, yip tö teungten nö im hanëtö, 24 hēk yihtöre öi in Yēsū ngam mahayööken hī öi kēken ngam tufömngöre kinlēḵngô hēk in ngam mahām ngam tö kichënytu tö ò nö in hī, ngam tö mötlö ṙô nö ṙò-òv tö ngam mahām Apēl.
25 Haṙēmngenre, ui sōḵ* öi hang ṙô ngam tö ṙò-òv nö in yīö. Pön kò-òngvah ngaich yik tarik yik tö sōḵ nö hangṙô ò ngam kamëtö inlēnö cha nö ing panam nö löktö in ngam Tēv, ngaich afē-a sitih inlahen öi min havööngökūöre tö ò ngam tö ṙò-òv nö löktö el halīöngö nö vë-ekūö hī. 26 Ngaich an misī ngih panam nö kayinlöng tökūö ṙô ò ngaich pöri anga-aṅ töngamuh nö kilēḵngôre nö ngö ṙô: “Rö-ö chin min hēk öich höng kiyin ngih panam öich yih, pöich kiyin ngam halīöngö inrē.” 27 Löktö in ngam ṙô in akahakūö ngam “töhěngtöre heuh” nö ahetiyö min nup tö kiyinö chehen, ngam tö ngö manah ahetiyö min nup chehen nup töt vī-i tö ngam Tēv, hòṅ nup chehen nöng örheūheu nö köp nup tötkô nö kinyinken. 28 Sā mikahlōn hī ngaich tö hī hòṅ teūngen tö ngam Pūlngö töt kanyinken, ta-a töi iṙūöhen öi teūngen tö ngam tökiröng miṙēḵlōn ngam Tēv ngam lökten hī öi pa-ekūö tö ngam Tēv ngaich holtö pinhë-eṅkūöre öi iṙūöhen öi la-evṙen tö nup töhet la-en ò nup tö hō-ov tö ò. 29 Pò ngam Tēv hī nö tameūiyö nö tö ṙāpngökūö tī.