I minë-eny Yāköp
2 Kahōlö, ṙatö-ellōnre hòng yī-ö hěnghöre aṅhavin tö ngam intöltenre öi in ngam mākūö kanôlò ngam Mā hī Yēsū Kristū? 2 Yěn ōt tarik tökinlōngu tö sunna hēk vāyö chinhënen nö chuh el ngam chūök yīö öi vë-ekūötēv, yěn kuhēthötre pöri öp töng yāich tarik nöng takāchaṙen hēk mūmu chehen, 3 ngaich milēḵken ngam tövāyö chinhënen yī-ö öi ngö ṙô öi in ò, “Ūichngöre man in ngih tövai chūök” ngö ṙô pöri yī-ö töm töng yāicha tarik, “Sökhak man më-eṅ” hēk “Ūichngöre man öm el tumlat öm in ngam ranöönöröön chu.” 4 Yēḵ e nö ngatī röh öng ngam intölten hēk inrēvngö nö i tökiröng hēk tökūönö nö elhôi yīö hēk hö-ö hòng yī-ö öi vītöre öi sā inlahen öp kamhôkka öp töng öt lööngö ellōn nö kēḵ fësla?
5 Kahōlö, yī-ö hanangenlōn chu hangihtöre yin, röh ang ngam Tēv nö katöllen yip tarik yip töng yāich nö imat ngih panam hòṅ cha nö kôlò nö im ṙinatö-ellōn ngaich amīnu tö ngam Pūlngö ngam tökilē-ěyö tö ò nö in yip tarik yip tö hangenlōn tö ò? 6 Ngaich pöri yī-ö öi miṙēḵngen yip yāich. Hö-ö hòng yip tökôlò nöng ötlēken yīö hēk tūökten yīö öi chuh el chūök kamhôka? 7 Röh yip nöng ötlēken ngam tövai minë-eny yīö ngam invëkö yīö? 8 Yēḵ yīö öi asā ṙô ngih līpöre öi hang ngih tökiröng chööngö ngam rācha, “Hangenlōn man tö holre öm sā hanangenlōnre töre” ngaich tövāyö la-en yī-ö yěi ngatī inlahen. 9 Yēḵ yīö pöri öi öt ṙāngenre im intölten ngaich kamëken ngam tökööl yī-ö hēk kaheūkö yī-ö tö ngih chööngö öi tö fāluṙen.
10 Yěn ōt hamang minë taṙòkhöre Chööngö Môsös, falālötī pöri anga-aṅ töp töhěng ngaich kaheūkö anga-aṅ nö fumlal minë chööngö nö ṙòkhöre. 11 Pò ngam Tēv ngam tö ngö ṙô, “Uh yin asěha,”* ngö ṙô inrē anga-aṅ, “Uh yin fëlhānga.” Lökten yēḵ yīö öt asěha, fëlhang pöri ngaich tö fāluṙen yī-ö öi fumlal ngam chööngö. 12 Örheūheu yin sā ṙô yip tarik hēk sā inlahen yip tarik yip tö kahôkkaṙen nö asā ngam chööngö yip töthaköövö tarik.* 13 Pò ngòh töt īnu tö ngam neūkölōn ngaich öt hōlu min ngam kinhôkken ò töm neūkölōn, minhôiṅyu an ngam neūkölōn nö in ngam sācha.
14 Kahōlö, yěn ōt tö ngö ṙô, īnu chin tö ngam ṙinatö-ellōn, hö-ö pöri anga-aṅ nö la-evṙen nö asā ngam ṙinatö-ellōn ngaich asuh min öp yanöölen ò? Mihôiṅ öng min ngam tö ngatī inlahen ṙinatö-ellōn nö kētö inyööken ò? 15 Yěn ōt prötör hēk sistör töt aṅhavin tö chinhënen hēk hāṅten tö tö örheūheu nyā-aṅkūö, 16 ngaich ōt yip in yīö tö ngö ṙô nö in cha, “Lööken man, um hēngö hanāṅten yēḵ tö nyā-aṅkūö hēk chinhënen.” Ngaich yēḵ yīö pöri öi öt kē-ěkūö cha tö nyā-aṅkūö hēk chinhënen ngaich asuh min öp yanöölen cha? 17 Ngatī ṙēngen ötkô öi höng ṙatö-ellōnre, pò ngam ṙinatö-ellōn nöng kapah yěn öt la-evṙen.
18 Rīkre pöri lohten yip tö ngö ṙô: “Ṙinatu-ellōn man më-eṅ, la-evṙen pöri chū-ö. Hameuktö ngam ṙinatö-ellōnre më-eṅ öm höng öt la-evṙen ngaich hameuktö ngam ṙinatö-ellōnre min chū-ö öich löktö in minë la-enre.” 19 Ṙatö-ellōnre öm më-eṅ tö ngam Tēv nöng hěng? Vāyö inlahen takô man, ngatī ṙinatö-ellōn yip inrē tötlöök ma-ahānga hēk kichëiyöre. 20 Ō më-eṅ tarik töng nyatölōn, öt akahakūö öm tö ngam ṙinatö-ellōn nöng yanëḵngen yěn öt hōlu tö minë la-en? 21 Röh ök yöng hī Aprahām nö löktö in minë la-enre nö kaheūkö nö tölöök pò ò nö kēten ök kūönre Isāk nö el ök tahāklö nö tökētu? 22 Meuk ngam inlahen ò yī-ö nö holtö ngam ṙinatö-ellōnre hēk la-evṙen inrē ngaich minë la-en ò ma-ahetlen ngam ṙinatö-ellōn ò, 23 ngaich teungtökūö inrē ngam ṙô ngih līpöre: “Ṙatö-ellōnre ang Aprahām nö in Yāvē* lökten anga-aṅ nö kaheūkö nö tölöök,” hēk “hol Yāvē*” invëka inrē anga-aṅ.
24 Sā maheuk yīö ngaich tö ngòh tö hěngtak tarik nöng rö-ö nöng löktö im ṙinatö-ellōn nö kaheūkö nö löök pön löktö in minë la-enre inrē. 25 Öt kaheūkö hòng nö tölöök ök mi-inyihköre tö Rahap minënyi nö löktö in minë la-enre, kūö ò nö i patīre tī tö yik tö tīntu ngaich söömngen cha nö tahëngö talöökö? 26 Kô-en sā ngam alaha nöng kapah yěn hö-övö ngam nômö,* ngatī ngam ṙinatö-ellōn nöng kapah yěn hö-övö minë la-en.