I minë-eny Rōma
3 Asuh öp yanöölen ngòh tö hěngtak tarik im inlahen ò nö Yahūti hēk asuh inrē öp yanöölen ò nö im tunnyinyngö? 2 Pōyen nun minë yanöölen. Ngam raneh, tö më Yahūti misī nö kē-ěvkūö tö minë ṙô ngam Tēv. 3 Sitih inlahen pöri yěn ōt in më Yahūti töt ṙamatö-ellōnre? Ngam inlahen cha nö öt ṙatö-ellōnre, löktö in e hòng ngam Tēv nö hameuktu nö töt kanô-envö? 4 Hö-ö nö ngatī. Pòrô öp tö sitih öthō ngam Tēv nö öt hameuktö ngam kanô-enre, pòrô nö ṙòkhöre yip tarik nö minyôiny-aṅ, sā kinūichngö e inrē nö ngö: “Hòṅ nup ṙô meh nö tökô-en ngaich mihôiṅ min më-eṅ töm kinṙòklökuire.” 5 Ōt yik tarik tö ngö ṙô hameuktö ṙôken lanöökö ngam Tēv in öi kēken minë tötlöök la-en. Yēḵ ngam ṙô cha nö tökô-en ngaich kētö sācha cha hòng min ngam Tēv nö hameuktöre nö tötlöngö tī nö kahôka? (Sā mufē tarik chin öich ṙò-òv.) 6 Hö-ö! Öthō an nö vāichö tī nö kahôka, yēḵ ò min nö ngatī inlahen ngaich sitih inlahen min anga-aṅ nö kahòkken ngih panam?
7 Yēḵ ngam Tēv nö hameuktu kanô-en hēk ha-öinyö nö löktö im inlahen chu öich minyôiny-aṅ, kūö yòh pöri ngam Tēv nö kaheūkö chu öich tököölö fālen? 8 Mihôiṅ in chěi öi ngö ṙô: “Ta-a töi chōichö la-en hòn meūkö minë tölöök la-en hī,” sā yip tarik nö sūöichlö fālen hī tö hī nyin öi ngatī haköpti. Cha-a yip min tarik tö kētu sācha nö asā ngam kinṙôka.
9 Sitih ṙô öi pökeh min? Mööḵlö öi ayī-ö Yahūti tö më tahëng? Hö-ö öt ngatī! Pò hī öi urěhngöre öi hameukhöti tö* më Yahūti hēk tö më tahëng mihëṅṙö nö ṙòkhöre nö elkatòh ngam tökööl. 10 Sā kinūichngö e nö ngö: “Öt ōtre tarik tölöök, öt hěngtak takô, 11 öt ōt tö īnu tö ngam tö aṙū-utī mikah elmat, öt ōt inrē chamöh ngam Tēv. 12 Ṙòkhöre pöri tarik nö kānngökū-öre tö ngam tölöng talöökö, ṙòkhöre cha-a nöng yanëngen, öt tölööku la-en nö in cha, öthöng hěngtak.” 13 “Sā tö luvë-akkūö anūlö ngam kilööp cha, höng chōichö ṙōi litāk cha-a, i minuh cha minë tö pōisönu kūö pēch.” 14 “Tööḵlö minë elvāng cha tö minë ṙô tötlinëkôre tö tahëng.” 15 “Veut minë kalröön cha nö chöh inlahenre nö kitaknyö mahām.” 16 “Höng la-en cha ngam inyëngen yip tahëng hēk kinëtö miṙivlōn holre inrē, 17 hēk öt akahakūö cha-a tö ngam talöökö lanāmö.” 18 “Öt aṅhavin cha-a tö pinhë-eṅkūöre tö ngam Tēv.”
19 Akahakūö in tö nup taṙòkhöre ṙô ngam Chööngö nö vënyu nö in cha, yip më-elkatòh ngam Chööngö, hòṅ cha nö öpngö elvāng yip tarik ngaich ṙòkhöre ngih panam nö teūngen tö sācha re nö löktö in ngam Tēv. 20 Pön nup la-en tö vënyu nö in ngam chööngö öt hěngtak tökô tarik nö kaheūkö nö löök nö ikūö ngam Tēv, rën angū-ö nö ngatī pò ngam chööngö nöng angū-ö kamëtö tölöng mikahkūö hī tö ngam tökööl.
21 Ngaich pöri töngamuh nö hameuknyu tö ngòh tarik nö mihôiṅ nö kaheūkö nö tölöök nö ikūö ngam Tēv, pòrô nö öt hang minë chööngö, sā vinënyö e nö im Chööngö hēk in nuk līpöre yik pròfět, 22 heūṅ, ngòh tö hěngtak tarik ṙamatö-ellōnre nö in Yēsū Kristū ngaich kaheūkö anga-aṅ nö löök nö ikūö ngam Tēv, mihôiṅ yin më ṙamatö-ellōnre taṙòkhöre tarik nö kaheūkö nö löök pön hö-öv ngam intölten nö in e. 23 Pöi ṙòkhöre köölö fālen ngaich öt teungten öi hameuknyen minë töt insā-av tinrīken* ngam Tēv, 24 kūö ngam tökiröng pöri miṙēḵlōn ngam Tēv nö kaheūkö hī öi tölöök ngaich töt ṙāyu ngih inlōnti aṅ in ò, kēnyen hī ang Kristū Yēsū nö löktö im ṙāi ṙinānyi ngaich lökten in e ayī-ö öi löök öi ikūö ngam Tēv. 25 Kēten Kristū ngam Tēv nö tökētu hòṅ hī öi teūngen tö inṙē-ěl tökööl re* yěi ṙatö-ellōnre in ngam mahām Kristū, rën anga-aṅ nö ngatī inlahen pön hameuktöre nö tölöök, pò ò misī nöng ṙapöre nö aṙēlö tökööl yip tarik ngaich höng iṙūöhen nö aṙēlen cha. 26 Rën inrē ngam Tēv nö ngatī inlahen hòṅ ò in në ṙētak hī töngamuh nö hameuktöre nö tölöök hòṅ yip tarik ṙamatö-ellōnre nö in Yēsū ngaich kaheūkö cha anga-aṅ nö tölöök nö hameuktöre inrē anga-aṅ nö tölöök.
27 Ōtre hòng chö-öiny hī öi tailölōn? Hö-ö, öt ōtre. Asuh öp chööngö lökten hī öi tailölōn? Ngam chööngö hòng ngam tö mööḵlö tī nö kēken minë la-en? Hö-ö nö angū-ö, pön ngam chööngö im ṙinatö-ellōn. 28 Löktö in e mikahkūö in ngaich tö ngòh tarik nö öt löktö in minë la-en tö vënyu nö imat ngam chööngö, pön löktö im ṙinatö-ellōn nö kaheūkö nö löök. 29 Höng Tēv më Yahūti hòng anga-aṅ? Öt Tēv më tarik hòng inrē anga-aṅ tahëng mihëṅṙö? Heūṅ, Tēv cha an inrē. 30 Töng hěng an ngam Tēv lökten nöng anga-aṅ tö löökuṙô tö yip tarik tö tunyinyi tökūö ngam ṙinatö-ellōnre ngaich yip tarik töt tunyinyi ngaich löktö im ṙinatö-ellōnre cha-a nö kaheūkö nö löök. 31 Kūö ngam ṙinatö-ellōnre hòng pökeh ayī-ö öi miyëḵ elmat tö ngam chööngö? Hö-ö öt ngatī! Pò hī ayī-ö öi kaheuk ngam chööngö nö tölöng.