Raneh Chitri Yik Aṅ Kòrin
9 Töng haköövö öich chū-ö öich ötkô lök in minë kuilōnre? Hö-ö öich chū-ö öich tanīnöṙô? Hö-ö öich inrē öich mameuk ngam Mā hī Yēsū? Hö-ö öi yī-ö öi ṙòng kumlēḵ alaha chu öich in ngam Mā? 2 Pòrô chū-ö öich öt tanīnöṙô in yip tahëng, tanīnöṙô pöri Chū-ö öich in yīö! Lökten yī-ö öi tökūichtu öi minkahngö öi vamënyen ngam kamngö chu öich tanīnöṙô öich in ngam Mā.
3 Yip chamöhnyö minë inlahen chu, në nun ṙô chu öich laklöre öich ikūö cha: 4 Öt kanahnguṙen* öi īhö öi nyā-aṅvkūö hēk òk inrē? 5 Ötkô öi īhö öi pīhövö hēk hōluröön tö ngam pīhöre kikānö ngam ṙamatö-ellōnre* öi sā inlahen më tahëng tanīnöṙô kahëm ngam Mā hēk sā inlahen Kīfös* inrē? 6 Hēk höng āi Parnapas hòng tö chu töhòṅ la-evṙen ai ha-aṅhkö nômöre? Hö-ö hòng āyö ai kanahnguṙen ai höngngöhtöhëichṙen ai höng öt la-evṙen? 7 Achīö öp kumyung töng kamnahngenre nö meukṙenre? Achīö öp tameūich vāin nö töt nyamā ṙòng nup taneūichre? Achīö öp anga-aṅ yōm sīṅp öp amahten nup kiteūm, ngaich öt vātu pöri tö nup tūt u?
8 Höng sā mufē tarik öich Chū-ö öich ṙôten në ṙôre? Hö-ö öng ngam Chööngö inrē nö ngatī ṙô? 9 Pön sā kinūichngö e nö in ngam Chööngö Môsös: “Un hayūlö elvāng ap kōiny nuā yĕn röönnyö ṙòng sāiny.” Höng minë nuā hòng tö chumkūökaṙen tö ngam Tēv? 10 Öt kô-en hòng në ṙô ṙahônyö ò nö chö-öinyten tö hī? Kô-en nun në ṙô nö chö-öinyten hī nö kūichi, pò ngòh tarik kumköh tumlat nö öt tövaich yēḵ ò nö meūkkö taneūngenre tö ṙòng taneūichre, ngatī ngòh tarik pumṙōngngö ṙòng taneūichre nö öt tövaich ngam inlahen ò nö meūkkö inlahenre nö teūngen tö ṙòng taneūichre.
11 Teūichtö ngam ṙô ngam Tēv in īhö öi elhôi yīö, tövaich hòng min ngam inlahen ih, yěi meūkkenre öi teūngen tö nyā-aṅkūöre hēk chinhëṅnöre öi in yīö? 12 Yēḵ yip tahëng nö mihôiṅ nö kanahnguṙen nö in yīö ngaich hö-ö hòng īhö öi mööḵlö kanahngen öi in yīö? Sön īhö öi hameuktöre öt kanahnguṙen* öi in yīö, höng hökngenre pöri īhö inup taṙòkhöre hòṅ ngam tölöök inhānga inlahen Kristū nö öt sökngöreröön tö tī ih. 13 Öt akahalōn hòng yī-ö tö më tarik töla-evṙen nö el chūök vinë-ekūötēv tö minë töhet la-en nö nyā-aṅvkūö cha-a tö nup taneūngenre nö el chūök vinë-ekūötēv, ngaich yip töng örheūheu nö la-evṙen nö in ngam tahāklö, kintölu cha-a tö nup aṅ e tökētu? 14 Ngatī inlahen ngam Mā nö kētö chööngö nö in yip ma-ahangkö ngam tölöök inhānga nö ha-aṅh nômöre nö löktö im tölöök inhānga.
15 Öt kēḵ yanöölenre pöri Chū-ö öich in minë töhalēnlöng. Hö-ö Chin öich kūichten në ṙô nö chö-öinyten tö Chu nö ngatī, pön ěhten ngam inlahen chu öre yěich kapah, ngih lāinyngen chu öich teūngen tö ineū-eure öt halöngngen e chū-ö nö kē-ěyö tö yip töng tarik! 16 Yēḵ Chu öich ahangkö ngam tölöök inhānga ngaich öt lāinyngen chu angū-ö öich ineū-euvö pön la-en chu angū-ö yěich ngatī inlahen. Tötkòlô chin Chū-ö yēḵ chu öt ahangkö ngam tölöök inhānga! 17 Yēḵ Chu öich kahanglōnre öich la-evṙen tö ngih la-en, ngaich teūngen min chū-ö tö raneushöre, yēḵ Chu pöri öt lōnu ngaich höng la-evṙen Chū-ö tö ngih la-en, sön Chū-ö öich sā töng la-evṙen tö la-en yōm chehen ngam kahëtö ngam Mā nö in chu. 18 Asuh öng ngih raneushö taneūngen Chu min? Angū-ö ngam inlahen Chu öich ahangkö ngam tölöök inhānga öich höng öt ṙāyu, hòṅ Chu öich öt vāichö tī öich yūs ngam chööngöre* öich ahangkö ngam tölöök inhānga.
19 Hö-ö Chin öich mahalanṙen tarik ngaich pöri öich vītöre öich mahalanṙen taṙòkhöre, hòṅ Chu öich vīten yip töpōyen tarik nö lök el talöökö Kristū. 20 Vī-ingre Chin öich sā Yahūti öich in yip Yahūti, hòṅ Chu öich teūngen tö Yahūti, ngaich yip më-elkatòh ngam chööngö ngaich vītöre chū-ö öich sā më-elkatòh ngam chööngö öich in cha, hòṅ Chu öich teūngen tö yip më-elkatòh ngam chööngö, rö-ö pöri Chū-ö öich elkatòh ngam chööngö. 21 Yip töt aṅhavin tö ngam chööngö, vī-ingre Chū-ö öich sā inlahen cha, rö-ö Chū-ö pöich aṅhavin tö ngam chööngö öich ikūö ngam Tēv, elkatòh chööngö Kristū pöri, hòṅ Chu öich teūngen tö yip töt aṅhavin tö ngam chööngö. 22 Vī-ingre Chū-ö öich ötkalē-en öich in yip tötkalē-en, hòṅ Chu öich teūngen tö yip tötkalē-en, keuheūttöre mihëṅṙö Chin i taṙòkhöre tarik, hòṅ Chu öich löktö in nup taṙòkhöre öich hayööken yip rīkre tarik nö teūngen tö ngam inyööken. 23 Keuheūttöre Chin öich chö-öinytö ngam tölöök inhānga, hòṅ Chu öich vënyen ngih inhānga öich in yip tahëng.
24 Öt akahalōn öm tö yip famal nö im insōlö nö ṙòkhöre röön nö fal, höng hěngtak pöri öp tö teūngen tö ngam raneushö? Ngatī röön yī-ö öi fal hòṅ yīö teūngen tö ngam raneushö. 25 Ṙāpöre an nö i tökeuheūttöre ngòh kamëtöre nö im minnyāmö,* ṙën acha-a nö ngatī inlahen pön hòṅ teūngen tö öp sapīöv öp töng chuhngöre min, chö-öinyten öp sapīöv pöri ayī-ö öp töthō nö chuhngöre. 26 Lökten Chin rö-ö öich höng fal öich höng meuchngömatre öich höng lök kū-öre, hö-ö inrē öich kisōl öich sā inlahen töng kumsōl kuföt, 27 kisōl* ngam alahare pöri Chū-ö ngaich vīten e nö mahalanṙen nö haköövö, hòṅ Chu öich öt sō-ovö hē kinheūten Chu öich ahānga in yip tahëng.