Raneh Chitri Yik Aṅ Kòrin
13 Yēḵ Chu öre heuveū-euṙô tö tökeuheūttöre mihëṅṙö ëlô tarik hēk ma-ahānga, öt īnu pöri tö ngam hanangenlōn, ngaich höng sā öp töpōitô chū-ö takōngö hēk töparānga kungkurū. 2 Hēk yēḵ Chu öre īnu tö inlōntire öich eūkö nup yamih hēk īnu inrē tö mikahkūöre tö inlahen nup taṙòkhöre töhet töt mikahkūö sin hēk ṙòkhöre mikah elmat inrē hēk kirööngen ṙinatö-ellōn Chū-ö töre mihôiṅ öich kēngö ngam rôngö öich harīkngö chūök e, yēḵ Chu pöri öt aṅhavin tö ngam hanangenlōn, höng töng rö-övö Chū-ö. 3 Yēḵ Chu öre öich keuheūttö nup kanòlôre öich hanëlen yip tahëng hēk kētö ngam alahare nö tökētu hòṅ Chu öich tāilölōn, öt īnu pöri Chū-ö tö ngam hanangenlōn ngaich höng öt hēngö yanöölen Chū-ö.
4 Tömarô-òten manööyö an ngam hanangenlōn hēk tö aheūkölōn inrē. Öt aṅhavin an ngam hanangenlōn tö ranāinyngö, töt ameū-eure, töt tāilölōn, 5 hö-ö an nö tötlöngö inlahen nö i tahëng, öt fēkö nup yanöölenre, öt hūlökūö tanāinyö, öt ma-afēkö inyëḵngenre. 6 Öt ṙamlōn an nö i tötlöök, ṙamlōn pöri nö i tökô-en. 7 Ṙāpöre an nö i tökeuheūttöre, ṙatö-ellōnre nö inup tökeuheūttöre ṙô, meūka nö i tökeuheūttöre ṙô, möi inrē nö la-al nup tökeuheūttöre.
8 Töt chanuhuvṙen an* ngam hanangenlōn. Chuhngöre pöri min ngam inlōnti vamënyen nup yamih, chuhngöre inrē min ngam inlōnti heuneū-eu ṙô tö tahëng ëlô,* chuhngöre inrē min ngam mikah elmat. 9 Kūö ngam mikah elmat aṅ in hī nö töng ròngti, ròngti inrē ngam tö eūka tö hī, 10 yēḵ ò pöri min nö yih ngam tö hòṅ teungtakūö ngaich chuhngöre min ngam tö ròngti. 11 Hē Chu misī öich nyīö ngaich sā ṙô nyīö chū-ö öi ṙò-òvö, sā mufē yip nyīö hēk sā mikah yip nyīö inrē, ngaich pöri Chū-ö töngamuh öich kiröng lökten öich ṙāngö ngam nyinī-öre. 12 Höng paṙūöyamat in töngamuh öi ngëicha öi sā ṙēngen ngamëichkö ngam töpaṙūöyamat tinmël, hëtö mat pöri min ayī-ö öi ngëichkö kūö höö ip ṙētak hī yěi havööhenhö kūö. Ṙömöng ròngti aṅ in Chin töngamuh tö ngam mikah elmat, ip ṙētak pöri min chū-ö öich pōyen* aṅ in tö ngam mikah elmat, sā inlahen ngam Tēv nö keuheūtlöre mikahkūö tö Chu. 13 Minë tölūöi pöri min tö ōttit, tö sā ngam ṙinatö-ellōn, mineūka hēk hanangenlōn, mötlö ṙôkö pöri ngam hanangenlōn nö in minë tölūöi.