I minë-eny Rōma
10 Kahōlö, ngih ön kuilōn chu öich holtö ellōnre hēk ngih inrē ṙô chu öi vë-ekūö ngam Tēv öich chö-öinyten më Israel, hòṅ cha nö teūngen tö inyöökenre. 2 Lökten chin öich vë-eny inlahen cha nöng īnu tö nganötöre nö löklōn ngam Tēv hö-ö pöri nö sā ngam tölöng mikah. 3 Pò cha sin nö öt akahakūö tö nup tötṙanāngen inlahen hī öi kaheūkö tölöök imat ngam Tēv, lökten cha-a nö löktö inup tinrīkenre nö iṙūöhen nö ma-ainyre nö kaheūkö nö löök ngaich öt lök in minë töhet inchöngtenre tö ngam Tēv. 4 Löktökūö im kinpaha Kristū an ngam manāngen ngam Chööngö, hòṅ yip taṙòkhöre ṙamatö-ellōnre nö in Kristū ngaich kaheūkö cha-a nö tölöök.
5 Löktö in ngam Chööngö ang Môsös nö kūich inlahen yip tö kaheūkö nö tölöök nö ngö ṙô: “Ngòh tarik tö la-evṙen tö në, aṅ min anga-aṅ.” 6 Ngö kinūichngö pöri ngam inlahen yip tö kaheūkö nö tölöök tökūö ngam ṙinatö-ellōnre: “Uh yin öi ngö ṙô öi ellōnre lōn ‘achīö öp min yamônlö nö chuh el halīöngö?’ Tö ngö manah achīö öp min chamuh el halīöngö nö lūkken Kristū nö chuh lātaṙeū, 7 hēk, ‘Achīö öp min yamônti nö el ngam tö aṙū-uti ṙeūvö?’ Tö ngö manah achīö öp min tö mihôiṅ nö yônti nö el ngam tö aṙū-uti ṙeūvö nö kēḵlen Kristū nö ṙā-ang in yik tökapah.” 8 Sitih ṙô pöri ngam töhet līpöre? Ngö ṙô ön: “In meh an ngih inhānga, i elvāng meh, i ellōn meh inrē,” tö ngö manah, “inhangkö” ngam ṙinatö-ellōn ngam tö ahangka tö hī. 9 Yēḵ meh öm löknyö elvāngre öm ikūö yip taṙòkhöre tarik öm vënyen Yēsū nö anga-aṅ Mā, hēk ngatī ngam ellōn meh nö ṙatö-ellōnre tö ngam Tēv nö hachohlen ò nö ṙā-ang in yik tökapah ngaich teūngen min më-eṅ töm inyööken. 10 Lökten ngòh tö hěngtak tarik nö holtö ellōnre nö ṙatö-ellōnre yěn hòṅ kaheūkö nö löök, löknyö elvāngre ṙô pöri anga-aṅ nö vënyö ngam ṙinatö-ellōnre nö ikūö yip taṙòkhöre tarik yěn hòṅ teūngen tö ngam inyööken.
11 Pön ngö ṙô ngam töhet līpöre: “Pò yip ṙamatö-ellōnre min nö in ò, öt haṙivlōn min cha-a.” 12 Lökten nö öt inrīkngörevö nö ihôi më Yahūti tö më Krīk pön höng hěngtak ngam Mā ikūö taṙòkhöre ngam kamëtö töpōyen inkôlò yip mahavëken ò.* 13 Lökten “ngòh mahavëkö minë-eny Yāvē* ngaich teūngen min anga-aṅ tö inyöökenre.” 14 Sitih inlahen pöri min cha-a nö havëkö minë-eny ò, yēḵ cha nöng öt ṙatö-ellōnre nö in ò? Hēk sitih inlahen min cha-a nö ṙatö-ellōnre nö in ò, yēḵ cha nöng öt hang inlahen ò? Hēk sitih inlahen min cha-a nö hang inlahen ò, yěn öt ōt ma-ahāngkö inlahen ò? 15 Hēk sitih inlahen min cha-a nö ahānga, yěn öt tīniyö? Sā kinūichngö e nö ngö: “Iṙôkö vanāyö röön aich vē ma-ahangkö minë tölöök ṙô!”
16 Sön pöri yip in cha nö öt ṙòkhöre nö lök in ngam tölöök inhānga. Ngö ṙô ang Isayā: “Yāvē,* achīö yip min ṙamatö-ellōnre nö in minë ṙô hī öi ahānga?” 17 Unôichrit nup tö ahangnyu ṙô an ngam ṙinatö-ellōn. Ngaich möl ngih inhānga nö hāngö yěn ōt ma-ahangkö inlahen Kristū. 18 Ngö ṙô pöri Chū-ö öich hatön, öt hang ngam ṙô hòng cha-a tö ahangnyu? Heūṅ, hang yin pön ngö kinūichngö angū-ö: “Keuheūtngöre chūök hināngö ṙô yin më ma-ahangkö ngam inhānga nö ikūö në taṙòkhöre panam ngaich söl in minë manā-angkūö ngih panam inrē nö teungta ngam ṙô cha.” 19 Ngö ṙô pöri Chū-ö öich hatön, öt akahalōn hòng yik aṅ Israel? Urěhangen ṙô ök Môsös nö ngö ṙô: “Löktö in yip tarik töt aṅ Israel tī Chin min öich vīlö ranāinyngö yīö, löktö in yip tökulō-ovö pumnāmö tarik tī Chin min öich vīlö tanāinyö yīö.” 20 Holtö öt pinhë-eṅkūöre hēk ang Isayā nö ngö ṙô: “Yip töt chamöhö chu, kôtökūö cha-a tö chu ngaich hameuktöre chū-ö öich in yip töt mahatönkö inlahen chu.” 21 Ngö ṙô pöri anga-aṅ tö inlahen yip Israel: “Sumkāmu Chū-ö öich hanyāknyö këlre öich ikūö vē tarik vē töt hamang chööngö Chu hēk töngëḵ-eṅ ellōn inrē.”