Kahūich Lūkös

1 Tö akaha Ti-òfilös, nuk tö ngaichngen tökô-en inlahen chūök hī ṙòkhöre ṙatö-ellōnre, pōyen yik tarik kamëtöre nö kūichö u. 2 Ngaich yik tö kôtamat nö löktökūö raneh nö meūkö u hēk yik tö tölö ṙô inrē nö ahangkö ngam ṙô ngam Tēv, ngatī inlahen kinëḵti anū-ö tö cha nö in hī. 3 Lökten chin chū-ö öich kūich në ṙô öich mikahtö elnang meh, tö minë tö lööngö chinöhnyi tö chu öich löktökūö raneh, 4 hòṅ meh akahalōn takô tö minë inköptö meh* nö anū-ö tökô-en.

5 Hē nuk sakāmö Heròt* nö hayöng nö i Yūta, hěngtak ök umuh kūönṙô tö Sakariā minë-eny, aṅ el krup Apiyā anga-aṅ. Ēlisöpet minë-eny ök pīhö ò nö aṅ in ngam michaplö Āròn. 6 Tölöök cha-a nö imat ngam Tēv,* kūö cha nö hamang nuk chööngö Yāvē* nö ṙòkhöre, tövai inrē nuk tinrīken cha. 7 Öt kūönu pöri cha-a, kūö Ēlisöpet nö töt mikūönlö, köiny inrē cha-a nö ngaich.

8 Ngö inlahen angū-ö hē Sakariā nö ṙònghöichṙen nö la-evṙen nö ikūö ngam Tēv tö ngam la-en kūönṙô, kūö e nö ṙētak ngam krup cha. 9 Hē ök ṙētak cha nö föng ök tötahūsa nö sā minë la-en më kūönṙô ngaich kuhēthötre anga-aṅ nö el ngam töhet chūök Yāvē.* 10 El kahôyö yik tömaṙôngö nö vë-ekūötēv, hē ṙētak ngam tö föngö tötahūsa nö fönglöng. 11 Yihtöre ngaich ök tö hěngtak ma-ahānga Yāvē* nö ikūö Sakariā, sökhak anga-aṅ nö lāhāmö ök tahāklö ök chūök finöngö nuk tötahūsa. 12 Kasë-aṙen ang Sakariā nö meūkö ò, hěnghöre pa-ekūö inrē. 13 Ngö ṙô pöri ngam ma-ahānga nö in ò: “Sakariā, uh man pa-ekūö, tön hāngö nup ṙô meh vë-ekūö ngam Tēv ngaich öp min pīhö meh Ēlisöpet nö pirūkö nyīö ngaich fötnyö nyīö kikōnyö min anga-aṅ. Kaheuk minë-eny ò min më-eṅ nö Yôhan. 14 Kirööngö ṙanamölōn min më-eṅ, maṙôngö inrē min yip tö ṙamölōn tö finötnyö ò, 15 pò ò nö kiröng nö imat Yāvē.* Ötkô pöri anga-aṅ nö òk vāin hēk ka-eūt inrē, pön höng löktö ellōn ngam yöngre* min anga-aṅ nö tööḵlö tö ngam töhet kumlēḵ ngam Tēv, 16 ngaich havanten më tö pōyen Israel min anga-aṅ nö in ngam Tēv cha Yāvē.* 17 Ngaich sā nganöötö* Ĕlaicha min anga-aṅ hēk holtö kumlēḵre inrē nö urēhěkūö ngam Tēv hòṅ ò nö havöötö ellōn yip yöng nö sā ellōn yip kūön. Ngaich kētö mikah yip töthamang chööngö inrē nö sā inlahen yip tölöök tarik. Ngatī inlahen anga-aṅ nö halēnlö yip tarik tö hō-ov min tö Yāvē.”*

18 Ngö ṙô ngaich Sakariā nö in ök ma-ahānga: “Sitih inlahen Öich min ṙatö-ellōnre tö ngam ṙô meh? Pò Chu ngaich öich höng köiny ngaich inrē öp pīhö chu nö ṙēḵtivö.” 19 Ngö ṙô ngaich ök ma-ahānga nö in ò: “Chū­-ö chin Kēprīĕl samökhak ikūö ngam Tēv. Tö tīntu Chin öich vë-ekūö meh hēk vamënyö ngih tölöök inhānga öich in meh. 20 Yěh meuk! ötkô man min ṙò-òv hanöng saha në kinlēḵngô nö öl nö teungtökūö, kūö meh öt ṙatö-ellōnre in në ṙô chu minë tö hòṅ teungtökūö ip tö lēnngen ṙētakre.” 21 Höng hökken Sakariā hē e më tarik nöng sökhak nö lātunyī. Pingangkūö cha-a tö rò-òten ò nö el ngam chūök vinë-ekūötēv pön öt akahakūö cha-a töp lāinyngen ò. 22 Hē ò ngaich nö kunyī-inyre, ngaich anga-aṅ nöng öt heuveū-eu ṙô nö ṙò-òvö nö vë-ekūö cha. Akahakūö ngaich cha-a lohten tö ò nö hameukhumat tö pinngangkūö nö el ngam chūök vinë-ekūötēv. Vë-ekūö cha anga-aṅ nöng aṅhtī tö këlre, pön öt heuveū-eu ṙô nö ṙò-òv. 23 Hē kinheūten nuk sakāmö ò ngaich nö la-evṙen tö nuk tölöök la-enre mineuklö kui tarik, havan ngaich anga-aṅ nö chuh patīre.

24 Puyōsö ngaich ök pīhö ò Ēlisöpet unôichrit u anū-ö sakāmö, taneui chumngëṅtö rò-òten anga-aṅ nöng öt kunyī-inyre tö patīre, ngö ṙô ngaich anga-aṅ: 25 “Kiröng ngam miṙēḵlōn Yāvē* nö ikui chu in në sakāmö, hameuktö chumkūöṙen re anga-aṅ tö chu, kēngen ngam sumrōngkūö chu inrē öich el ṙôngö më tarik.”

26 Hē Ēlisöpet ngaich nö tafūöl hang, tīnngen ök ma-ahānga Kēprīĕl ngaich ngam Tēv nö chuh Kelelī i Nāsaröt, 27 nö chuh in ök tö hěngtak rēlö ök tö mikahayö nö pīhö ök tö hěngtak tarik ök tö minënyu tö Yôsěf nö lamöknyö el ngam mikūönö Tāvit. Mariā ök minë-eny ök rēlö. 28 Hē ök ma-ahānga ngaich nö chuh in Mariā, ngö ṙô ngaich anga-aṅ nö in ò: “Salām, ikui meh nun yēḵ minë inkòlô aṅ im Tēv, holtöṙah meh an Yāvē.”* 29 Pa-ekūö pöri anga-aṅ hē ò nö hāngö e, ngaich ngö ṙô nö ellōnre, tö sitih manah öng ngih ṙô ò nö salāmö chu. 30 Ngö ṙô ngaich ngam ma-ahānga nö in ò: “Mariā, uh man pa-ekūö. Tön aṅ im Tēv nun minë tökiröng inkòlô taneūngen meh. 31 Yěh meuk! puyōsö man min ngaich hěngtak min öp nyīö kikōnyö töfötnyu tö meh, kaheuk minë-eny ò min më-eṅ nö Yēsū. 32 Tökirööngö minā-aṅ öp min, Kūön ngam Tēv Lamātulöng tö në taṙòkhöre min öp invëkö ò, ngaich kē-ěkūö ò min ngam Tēv Yāvē* tö ngam anūichö minā-aṅ ök yöng ò Tāvit. 33 Rācha min anga-aṅ nö hayöng nö ikui ngam mikūönö Yāköp nöng örheūheu, köp inrē min ngam Pūlngö ò nöng örheūheu.”

34 Ngö ṙô pöri ang Mariā nö in ök ma-ahānga: “Sitih inlahen Öich min kūönu, yěich höng ṙömöng rēlö?”* 35 Ngö ṙô ngaich ngam ma-ahānga: “Teungtöre an min ngam töhet kumlēḵ ngam Tēv nö ikui meh ngaich hanyattö kui meh min ngam kumlēḵ ngam Lamātulöng, lökten öp töfötnyu min nö töhet hēk Kūön ngam Tēv invëka. 36 Yěh meuk! Pirūkö nyīö öp Ēlisöpet öp hanöng kisānö meh öp töt mikūönlö tö ṙô ngaich pöri anga-aṅ nö pirūkö nyīö ing kanööinyö re, kayônyö nyīö kikōnyö öp min. Tinfūöl chumngëṅtö ò ön ngih; 37 pön nup ṙô lamöknyö elvāng ngam Tēv, öthō min anū-ö nö öt teung.”* 38 Ngö ṙô ngaich Mariā nö in ò: “Yěh meuk! ihih ön ngòh kikānö mahalanṙen Yāvē,* sā öp ṙô meh yēḵ, hökngen e yēḵ nö ngatī nö in chu.” Kiröönngöre ngaich ngam ma-ahānga nö ṙāngen ò.

39 Hē u anū-ö sakāmö, haveutṙen re ang Mariā nö halēnöre ngaich kiröönngöre nö chuh im tö runglö kūö panam Yūta. 40 Hē ò ngaich nö teung nö i patī Sakariā ngaich salāmö Ēlisöpet anga-aṅ. 41 Ik sā Ēlisöpet ngaich nö hang ṙô Mariā nö salāman ngaich ök nyīö më ellōn ò nö tisôköre, tööḵlö ngaich ang Ēlisöpet tö ngam töhet kumlēḵ. 42 Pōitô ngaich anga-aṅ nö ngö ṙô: “Tökôlò man më-eṅ i tumtak vē kikānö, tökôlò inrē öp tö pirūka nö ellōn meh! 43 Yöng ṙôkö ngam minlēḵken chu nö uroh ngam yöng ngam Mā chu nö yih nö in chu. 44 Ngaich yěh meuk! hē chu hang ṙô meh öm salāmö chu ngaich ilöö tisôköre ngam nyīö nö ellōn chu tö kūö ṙanamlōnre. 45 Lökten man inrē öm tökôlò, kūö meh öm ṙatö-ellōnre. Nup töng ṙô Yāvē* nö in meh, öthō min anū-ö nö öt teung.”

46 Ngö ṙô ngaich ang Mariā: “Ha-ööinyö Yāvē* ön ngih nômö chu, 47 ötkūöngu ngam ṙanamlōn chu ngam pòkūö tī ngam Tēv inyööken, 48 kūö ò nö chumkūöṙen tö ngòh yāich kikānö mahalanṙen ò. Ngaich löktökūö töngamuh min chū-ö öich tö ṙamölōn invëka tö vē taṙòkhöre tarik in në ṙētak hī töngamuh, 49 pò ngam tökalēḵ Tēv nö la-evṙen tö në tökiröng la-en töpòkūö chu hēk töhet inrē ngam minë-eny ò, 50 yip tö pa-ekūö min tö ò, köp min ngam miṙēḵlōn ò nö ikui cha nöng örheūheu. 51 Ngaich an nö hameuktö kumlēḵ ngam këlre ngaich pirātiyö tö ò yip tö tailö ellōn. 52 Ṙāḵtuvö yip tö minā-av tö ò nö ṙā-ang el nuk anūichö ngaich hapōilöng yik töng yāichö ellōn tö ò. 53 Hatööḵöiṙen tö ò yip tö ha-euk tö nup tölöök chehen, höng tīnngen yip tökòlô pöri nöng öt kumuṙen. 54 Yamih anga-aṅ nö hayööken Israel ngam tarik ò, sā ṙô ò nö kilēḵngôre nö in yik muvöhngö hī misī. 55 Köpölōn anga-aṅ nö hameuktö ngam neūkölōnre nö in Aprahām hēk yik michaplö* ò inrē.” 56 Lūöi chumngëṅtö lohten ang Mariā nö iyöng i patī Ēlisöpet, ngaich möl nö havan nö chuh patīre.

57 Teungtökūö ngaich nuk sakāmö Ēlisöpet nö hòṅ kayôḵ, fötnyö ök tö hěngtak ngaich anga-aṅ nyīö kikōnyö. 58 Hē yik hanöngkisānö ò tö yik hol ò inrē nö hāngö Yāvē* nö kirööngen miṙēḵlōn tö ò, hanôltö ṙanamlōnre ngaich cha-a nö in ò. 59 Yih ngaich cha-a im hinëvhöre sumkam ngaich tunyinyngen ngam nyīö. Hòṅ kaheuk minë-eny ngam nyīö lang cha-a nö Sakariā nö sā minënyö ök yöng ò. 60 Ngö ṙô pöri ök yöng ök nyīö kikānö: “Hö-ö! Yôhan öp min minënyö ò.” 61 Ngö ṙô pöri cha-a nö in ò: “Öt hěngtak pöri tö ngatī minë-eny nö in më hanöngkisānö meh.” 62 Höng aṅhtī tö këlre pöri ök yöng ò kikōnyö ngaich cha-a nö hatönan tö öp lōn ò minë-eny ngam nyīö. 63 Havëkö ök takta ngaich anga-aṅ chūöktī re ngaich ngö inlahen tī nö kūich mat e: “Yôhan öp min minënyö ò.” Ṙòkhöre ngaich cha-a nö pingangkūö nö meūkö e. 64 Löpnyöre kūö ngaich ök litāk Sakariā hē e, ngaich mihôiṅ hēk anga-aṅ nö ṙò-òv ngaich kaknyöre nö ha-öiny ngam Tēv. 65 Pa-ekūö ngaich nö ṙòkhöre yik tarik yik tö röhta nöng lā ranghö ò. Keuheūtngöre chūök hināngö ngaich në ṙô nö ikūö ngam tö runglöre panam Yūta. 66 Ngö ṙô ngaich yik tarik nöng ellōnre yik hamang ngam ṙô: “Asuh öp min la-en ngòh nyīö yěn ngaich nö kiröng?” Pön kô-en ngam kël ngam Tēv Yāvē* nö ikui ngam nyīö.

67 Tööḵlö ngaich ök yöng ò Sakariā tö ngam töhet kumlēḵ ngaich eūkö ngih ṙô ngam Tēv nö ngö ṙô: 68 “Ha-ööinyö Yāvē in ngam Tēv Israel, kūö ò nö chumkūöṙen tö më tarik re ngaich ṙānyen cha. 69 Löknyö el ngam mikūönö ngam tarik re anga-aṅ ang Tāvit, nö kayôḵnyö ngam tökalēḵ kūö tökalēḵ ṙamānyen hī, 70 sā ṙô ò misī nö löknyö elvāng yik pròfět ṙô nö vënyen u. 71 Ngö ṙô anga-aṅ nö vë-eny nang hī tö ò min nö ṙānyen hī öi ṙā-ang eltī cha nö ṙòkhöre yip tö kunyaha elmat tö hī hēk yip tö sumrīk tö hī. 72 Hameuktö ngam neūkölōnre anga-aṅ nö ikui yik muvöhngö hī nö köpölōn tö ngam töhet kinlēḵngôre, 73 ngam kinlēḵngô ò nö in ök muvöhngö hī ang Aprahām, 74 ngö ṙô inrē anga-aṅ tö ò min nö ṙānyen hī öi ṙā-ang eltī yip tö kunyaha elmat ngaich kētö minlēḵken hī min öi lök im töhet kuilōn ò öi holtö öt pinhë-eṅkūöre 75 irò-òtö nômö hī öi hòṅ chiplö ikūö ò hēk örheūheu öi lök in minë tölöök inchöngtenre tö ò. 76 Më-eṅ pöri kūön chu, kaheūkö min më-eṅ öm pròfět ngam Lamātulöng, kūö meh öm urēhěkūö Yāvē* öm halēnlö ngam talöökö. 77 Vë-eny nang yip tarik ò inrē tö ò min nö aṙē-ěl nup tökööl cha hēk hayööken cha. 78 Kūö ngam tölngö neūkölōn ngam Tēv hī angū-ö nö ngatī. Yēḵ ò min nö hameuktö ngam neūkölōn re, sā ṙēngen yanāngö mat öp peūheu min angū-ö, 79 hòṅ yip amūichhaka nö el sinngūlö ngam kinpaha nö teūngen tö ngam yanāngö ngaich hachōḵ röön hī öi lök el ngam talöökö lanāmö.”

80 Sīöpö ṙôkö ngaich ngam nyīö nö kiröng.* Iyöng el inchōn ngaich anga-aṅ, hanöng sā ngam ṙētak ò nö öl nö hameuknyu nö ikūö yip aṅ Israel.