I minë-eny Heprāi

10 Pò ngam Chööngö nöng nyat nup tölöök yamih, hö-ö pöri nö tökô-en, minë töng hěngren inlahen kinë-eti* tökētu nö kaheuk samyeūheu ngaich öthō anū-ö nö hetlöre tī tö yip maha-öiny ngam Tēv. 2 Yēḵ e öre nö ngatī inlahen ngaich öt ṙā-aiṙen hòng ngam kinëtö tökētu? Pön yěn höng hěngheuh ngòh kamumtö tökētu* nö hetlöre ngaich öthō hēk öre anga-aṅ nö akahaiṙen tö ngam tökööl. 3 Löktö in në tökētu pöri vē tarik nö kaheuk samyeūheu nö fēḵlöng töre nö tököölu, 4 pön öt kanô-òvö minë mahām pöököre hēk nuā nö ahetngen ngam tökööl.

5 Lökten hē Kristu nö yih nö ing panam ngaich ngö ṙô anga-aṅ: “Öt lōnu më-eṅ tö tökētu hēk inlōnti tökētu, halēnlö ngam alaha chu pöri më-eṅ. 6 Öt hō-en minë töfööngö tökētu më-eṅ hēk ötrēhěn minë töfööngö tökētu inṙē-ěl tökööl.” 7 Ngaich ngö ṙô Chū-ö: ‘Ō Tēv, yěh meuk! Yamih chin öich mahateungngö kuilōn meh (sā kinūichngö inlahen chu öich imat ngam tölöömö līpöre.)’ 8 Urěh sin anga-aṅ nö ngö ṙô tö inlahen minë tökētu nö asā ngam chööngö: “Öt lōnu më-eṅ tö tökētu, ötrēhěn nö nup töfööngö tökētu hēk ötrēhěn nö nup tökētu tökūö tökööl,” 9 ngö ṙô hēk anga-aṅ: “Yěh meuk! Yamih chin öich mahateungngö kuilōn meh.” Ngaich ahetngen ngam raneh anga-aṅ töhalēnlöng, hòṅ ò nö rěhlörit ngam innëtö töhalēnlöng. 10 Ngam “kuilōn” tö kakka inlahen tö ò, löktö in e ayī-ö öi het pò Yēsū Kristū nöng hěngheuh nö urāngen nö kēten ngam alahare nö tökētu.

11 Rö-ö nöng angū-ö pön kaheuk sakāmö vē kūönṙô nöng söktöhëich nö im chūökre nö la-evṙen tö minë töhet la-en* ngaich ṙōlheuh tī nö kētö minë töng hěngren tökētu ngam tötkô nö keuheūtngöre tī nö ahetngen minë tökööl. 12 Ngòh tarik pöri töng hěngheuh tī nö urāngen nö kētö tökētu töpòkūö minë tökööl ngaich lahāmö kël ngam Tēv nö ūichngöre. 13 Löktö kūö in e anga-aṅ nö hökken öp ṙētak hē yip tökunyaha elmat min tö ò nö vītu nö ranöönö röön ò. 14 Pò ò nöng hěngheuh nö kētö tökētu nö urāngen nö hateungten më tarik nö im hanëtö yip tö-ahetlöng. 15 Hēk vë-eny nang hī inrē ngam töhet kumlēḵ ngam Tēv tö kanô-en ngih ṙô, pön urěh angū-ö nö ngö ṙô: 16 “Ngö ṙô an Yāvē,* ‘Angū-ö ön ngih kinlēḵngô Chu öich in cha unôichrit u anū-ö sakāmö, chaphöt në chööngöre chin min nö ellōn cha hēk kūichhöt u nö elkui cha.”’ 17 Ngö ṙô hēk anga-aṅ: “Öthō chin min hēk fēken minë tökööl cha hēk minë tötlöng la-en cha.” 18 Nup tökööl tö ngaich nö aṙēlöng mihôiṅ hēk öi öt kētö tökētu öi chö-öinyten tö u.

19 Kahōlö, teūngen ayī-ö tö nganönöre* öi löktö in ngam mahām Yēsū öi lök el ngam talöökö ngam kamëhöt hī öi chuh el ngam töhet chūök, 20 löpnyökūö* ngih tufömngöre hēk talöökö nômö anga-aṅ ngam mahavāngngö ngam hilā ranangkūö ngaich ngih ranangkūö nö ngam alaha ò, 21 ngaich īnu ayī-ö tö ngam tökiröng kūönṙô ngam tö chööngu nö el patī ngam Tēv, 22 ta-a chěi töi holtö kanô-en ellōnre hēk keuheūttö ṙinatö-ellōnre öi chuh in ngam Tēv, pò ò nö kichënytö kui ngam ellōn hī nö ahetlen ngam tötlöök lamātuhēt elkuilōn ngaich vōklen ngam alaha hī nö aṅhtī tö ngam töhet mak. 23 Ta-a töi ui kintööngulōn öi eūken ngam maheūṅkköre öi ikūö yip taṙòkhöre tarik, pò ngam kumlēḵngôre nö tökô-en takô anga-aṅ. 24 Ta-a töi kö chumkūöṙen tö höö,* hòṅ hī öi kētö ṙinūöhlö alaha höö öi im hanangenlōn hēk in minë tölöök la-en. 25 Hēk ui ṙāngenre öi hamūlöre* öi sā inlahen yip tahëng tarik, kö hangönken höö pöri ngaich sā maheuk yīö tö ranöhta yanīhi ngam sakāmö ngaich ṙūöhöl alahare hēk yī-ö öi ngatī inlahen.

26 Yěḵ hī öi tölngenre öi in nup tökööl unôichrit inlahen hī öi teūngen tö ngam tölöng mikah elmatre tö inlahen ngam kanô-en ngaich öt ōtngöre min hēk tökētu inṙē-ěl minë tökööl hī, 27 höng ngam pinhë-eṅkūö sācha hēk tö ngam hanūṙökūö ngam tanāinyö pöri min tö ōt, ngam mahaṙāpngen yip lama-al min. 28 Ngòh tarik fumlal ngam chööngö höng löktö iṙô nap tönët tak hēk tölūöi anga-aṅ vamë-eny nö fëli ngaich öt aṙēlöng kūö anga-aṅ. 29 Ngaich fëkö ṙôkö öp sācha ngam tarik öp ramööntö kui ngam Kūön ngam Tēv nö iröönre hēk tö minūö elmat inrē tö ngam mahām kinlēḵngô, ngam lökten ò nö ahetlöng sin hēk töt lamëken ngam tökiröng miṙēḵlōn ngam lamöktö in ngam töhet kumlēḵ. 30 Pò hī öi akahakūö tö ngam Tēv ngam tö ngö ṙô: “La-en chu an ngam invahalvah, Chū-ö chin min mahavahalvah.” Ngö kinūichngö an inrē: “Kahòkken yip tarikre an min Yāvē.”* 31 Pinhë-eṅkūö an nö in ngòh töhěngtak yěn teūngen tö sāchare nö löktö in ngam tö aṅ Tēv.

32 Iṙūöhen pöri yī-ö fēkö nuk tö ngaichngen sakāmö hē yīö öi la-al minë tökiröng kanihngen unôichrit inlahen yīö öi teūngen tö ngam hanātö ngam mikah elmat hēk köp inrē öi im manööyö. 33 Hēṙu yī-ö öi ikūö tömaṙôngö öi miṙē-ěyö* hēk hayëḵ-e yī-ö inrē, hēṙu inrē yī-ö öi haṙongtö miṙivlōnre* öi in yip taṙòkhöre tö ngatī inlahen. 34 Hameuktö miṙēḵlōnre yī-ö öi in yip tarik tö haköövö ngaich hē nuk chehen yīö nö kē-ěyö ngaich höng holtö ṙanamölōnre yī-ö öi hökngenre, pò yīö öi akahakūö tö nup aṅ in yīö kanôlò nö tömötlö hēk töt chanuhuvṙen nö hōḵ.

35 Lökten yin hangönöre, ui ṙāngenre öi holtö öt pinyu-uvṙôre öi ṙô-òvö pò yīö min öi kē-ěvkūö tö öp tökiröng min raneusöre. 36 Töt ṙanāngen ön ngam inlahen yīö öi aṅhavin tö ngam manööyö, hòṅ yīö öi teūngen tö öp tökilē-ěyö tö ngam Tēv, unôichrit inlahenre öi hateungngö kuilōn ngam Tēv. 37 Ngaich ön “nöng ṙahëichtit ngam tö ōttit ṙētak” ngaich “öp tö hòṅ yih, yih min anga-aṅ, öthō min anga-aṅ nö ahāṅkenre.” 38 “Löktö i ṙinatö-ellōnre pöri min ngòh tölöök tarik chu nö aṅ” hēk “yēḵ ò nö heūlngöre ngaich öt ṙamlōn min chū-ö öich in ò.” 39 Hö-ö in ayī-ö hameūlngöre öi sā inlahen yip tö hòṅ ahetiyö, in cha pöri ayī-ö yip ṙamatö-ellōnre, hòṅ hī öi laklö ngam nômöre.