Raneh chitri Yôhan
2 Yī-ö hanangenlōn chu kūön chu, ṙën chin kūichten në ṙô in yīö, hòṅ yīö öt kēken tökööl, yěn ōt pöri kamëken tökööl ngaich lēn ngam mahayööken* hī ngam mi-im Yöng ang Yēsū Kristū ngam tölöök. 2 Anga-aṅ an tökētu nö chö-öinyten tö minë tökööl hī ngam mahalāmten hī ikūö ngam Tēv* ngaich rö-ö nöng chö-öinytö minë tökööl hī, pön chö-öinyten minë tökööl taṙòkhöre ikūö ngih panam. 3 Yěi höng iṙūöhen öi hang minë chööngö ò ngaich in e mikahngen ayī-ö töre öi tö akahakūö tö ò. 4 Ngòh tö ngö ṙô, “Akahakūö Chin tö ò,” sön pöri nö öt hang minë chööngö ò, tö minyôiny-aṅ anga-aṅ ngaich töt aṅhavin anga-aṅ tarik tö ngam kanô-en. 5 Yěn ōt pöri hamang chööngö ò ngaich kô-en nö meūkö ngam hanangenlōn ò anga-aṅ tarik tö ngam Tēv ngaich löktö in e ayī-ö öi akahakūö töre öi in ò öi im hinëngö. 6 Ngòh tö ngö ṙô, in ngam hinëngö ò chin ngaich la-en ò angū-ö tö ò nö hòṅ sā inlahen Yēsū.*
7 Kahōlö, minë kahūichtö chu öich in yīö, hö-ö nun nö tufömngöre nö chööngö, pön höng anū-ö në tö hötṙeh chööngö minë taneūngen yīö ik urěh, ngih tö hötṙeh chööngö angū-ö ön ṙô ahang yīö nö ngaich. 8 Sön pöri chū-ö öich kūichten ngih chööngö nö in yīö nö sā inlahen öp tö tufömngöre chööngö ngam tö hāngö tö Kristū hēk tö hāngö inrē tö yīö, pò ngam sinngūlö nö iṙūöhöngröön chanuhngöre ngaich löktökūö töngamuh ngam tökô-en hanātö nö yang.
9 Ngòh tö ngö ṙô, el ngam hanātö chin chū-ö ngaich höng kunyaha elmat tö öp holmaneukre ngaich ṙömöng köp anga-aṅ nö el ngam sinngūlö. 10 Ngòh tö hangenlōn pöri tö öp holmaneukre, köp anga-aṅ nö el ngam hanātö ngaich öt ōtren min öp lökngen fanukngö ò. 11 Ngòh tö kunyaha elmat pöri tö öp holmaneukre, më-el sinngūlö anga-aṅ hēk lamök el ngam sinngūlö nö kiröön ngaich öt akahakūö tö öp chahuhure, pò ngam sinngūlö nö tilupngö minë mat ò.
12 Yī-ö kūön chu, ṙën chin öich kūichten u in yīö, pò nup tökööl yīö nö aṙēlöng töpòkūö minë-eny ò. 13 Yī-ö inyööngö kikōnyö, ṙën chin öich kūichhöti in yīö, pò yīö ngaich öi akahakūö tö Yēsū* ngam lamöktökūö ik raneh. Yī-ö ṙālö, ṙën chin öich kūichhöti in yīö, pò yīö ngaich öi mihôiṅ tö ngam Satān.* Yī-ö nyīö, ṙën chin öich kūichhöti in yīö, pò yīö ngaich öi akahakūö tö ngam Yöng. 14 Yī-ö inyööngö kikōnyö, ṙën chin öich kūichhöti in yīö, pò yīö ngaich öi akahakūö tö Yēsū* ngam lamöktökūö ik raneh. Yī-ö ṙālö, ṙën chin öich kūichhöti öich in yīö, kūö ngam kumlēḵ yīö, köp inrē ngam ṙô ngam Tēv nö in yīö ngaich mihôiṅ yī-ö tö ngam Satān.*
15 Uh yin hangenlōn tö ngih panam, uh rēhěn tö minë chehen aṅkūö ngih panam. Yěn ōt tö hangenlōn tö ngih panam ngaich öt īnu anga-aṅ tö ngam hanangenlōnre tö ngam Yöng. 16 Pò në taṙòkhöre aṅkūö ngih panam, minë kuilōn ngam alaha, kuilōn minë mat hēk inmeuknyö* nup aṅ in re chehen, hö-ö anū-ö nö lamöktö im Yöng, lamöktö ing panam pöri. 17 Rö-ö nöng anū-ö, pön chuhngöre ngih panam hēk tö minë kuilōn e inrē, ngòh mahateungngö kuilōn ngam Tēv pöri, örheūheu min anga-aṅ nö köp.
18 Yī-ö kūön chu, manā-aṅ ön ngih nö ṙētak, sā ahang yīö ngaich tö më lama-al Kristū ngaich nö yih, rö-ö pön rīkre ngaich yip yamih nö la-al Kristū, in e mikahkūö ayī-ö tö ngih nö manā-aṅ nö ṙētak. 19 Lamöknyö elhôi hī cha-a nö kiröönngöre, hö-ö pöri nö tö sā hī.* Yēḵ cha öre nö tö sā hī ngaich in hī öre cha-a, kiröönngöre pöri cha-a nö ngaich, hòṅ cha nö lööknyi mineūkö tö cha nö ṙòkhöre nö öt sā hī. 20 Hachāmö elkui yī-ö tö ngam töhet Tēv, lökten öi ṙòkhöre aṅhavin tö ngam mikah elmat. 21 Rö-ö nö kūö yīö öt akahakūö tö ngam kanô-en lökten chū-ö öich kūichhöti in yīö, kūö yīö pöri akahakūö tö ngam kanô-en, ṙën inrē pön öthō ngam kanô-en nö löknyu aṅ in tö ngam minyôiny.
22 Achīö öp tö minyôiny? Röh ang nö anga-aṅ ngam ma-mahngen Yēsū tö ò nö Kristū? Anga-aṅ an lama-al Kristū ngam ma-mahngen ngam Yöng hēk tö ngam Kūön. 23 Yěn ōt ma-mahngen ngam Kūön ngaich öt īnu anga-aṅ tö ngam Yöng. Ngaich yěn ōt hamō-en ngam Kūön ngaich īnu anga-aṅ tö ngam Yöng. 24 Yěi ṙôtö inlahen yīö pöri, nuk ahang yīö ik urěh hökngen u nö köp nö ellōn yīö. Nuk ahang yīö ik urěh, yēḵ u nö köp nö ellōn yīö ngaich im hinëngö min yī-ö öi in ngam Kūön hēk in ngam Yöng inrē. 25 Ngih inrē, ngam kinlēḵngô ò nö in hī angū-ö ön ngih, nômö tö örheūheu-aṅ.
26 Ṙën chin öich kūichten në ṙô öich in yīö, pön ōt min yip tarik kamlahtenre nö halō-ongkūö yīö. 27 Yěi ṙôtö inlahen yīö pöri, ngam töhet kumlēḵ tī ngam Tēv nö hacham elkui yīö, köp an yēḵ nö in yīö. Öt uroh yin ngaich öi hòṅ haköptu tö tahëng, löktö in ngam incham elkuire pöri yī-ö tö ngam Tēv öi haköptu tö nup taṙòkhöre ṙô. Tökô-en an ngam incham elkui yīö, öt tö minyôiny ngaich sā ngam inköptö yīö nö löktö in ngih inchāmö elkui yīö, iṙūöhen yī-ö öi köp im hinëngö öi in ò ngam mahacham elkui yīö. 28 Lökten yī-ö kūön chu, iṙūöhen yin im hinëngö in ò, hòṅ ò min yěn hameuknyuvö ngaich īnu min ayī-ö tö ngam nganönöre öi öt piyū-uṙô ṙò-òvö hēk öthō min ayī-ö öi ṙūöhöngre tö ò tökūö miṙē-ěvre ip ṙētak yanīhi ò. 29 Yēḵ yīö akahalōn tö ò* nö tölöök ngaich akahakūö yī-ö inrē tö ngòh tölöökö la-en nö lamöktö in ngam Tēv nö fötnyu.