I minë-eny Kalatī
4 Ngö ṙô pöri Chū-ö, hanöng sā ngòh amin nö ṙömöng nyīö, öt harīkngöre anga-aṅ tö ngam töhaköövö, pòrô anga-aṅ nö yöngkūö minë taṙòkhöre chehen. 2 Tumṙeūtöre anga-aṅ tö më yōmkūö chehen hēk më mameukṙen nö söl im töhalēniṙen sakāmö töm yöng ò. 3 Ngatī inlahen ayī-ö hē hī ṙömöng nyīö misī ngaich haköövö ayī-ö tö minë mufē hēk tinrīken ngih panam. 4 Hē taneungtökūö ngam ṙētak pöri ngaich tīnten ngam Kūönre ngam Tēv ngam tö kayônyu tö kikānö hēk më-elkatòh ngam chööngö. 5 Ṙën ngam Tēv nö ngatī inlahen, hòṅ yip më-elkatòh ngam chööngö nö havaha ngaich ṙānyu ngaich harukö hī öi sā ṙēngen yip kūön ò.
6 Yī-ö yin kūön, lökten ngam Tēv nö kēten e angū-ö töhet kumlēḵ ngam kahëtö ò nö in ngam Kūön ò, kēhöt e anga-aṅ nö ellōn hī ngaich havëken ò öi ngö ṙô: “Appa,* Kayööngö!” 7 Hö-ö yin ngaich töngamuh töhaköövö, kūön pöri, ngaich yēḵ yīö öi kūön ngaich vī-i yī-ö töm Tēv öi tö aminu.
8 Hē yīö misī öl akahakūö tö ngam Tēv ngaich el inköövö ngam töng ötkô-en nö tēv yī-ö. 9 Ngaich pöri yī-ö töngamuh öi akahakūö tö ngam Tēv hēk yěi ngö ṙô öre, ngaich an töngamuh ngam Tēv nö akahakūö tö yīö, ngaich kūö yòh yī-ö hēk havöötökūöre öi in minë töng höichngen ṙô ngih panam, minë töng yanëḵngen hēk töng öt yöölen tī ngaich kūö yòh hēk öi hòṅ havantöre haköövö tö u? 10 Chumkūöṙen yī-ö öi kēken minë tökiröng sakāmö, chingëṅt, ṙētak hēk samyeūheu. 11 Pa-ekūö Chin, un höng yanëḵngen ngam inlahen Chu öich kalēḵ alaha la-evṙen öich chö-öinyten yīö.
12 Kahōlö, tö ngatī inlahen chin Chū-ö sin misī, sā inlahen yīö töngamuh, hö-ö pöri ngaich Chū-ö töngamuh öich ngatī inlahen ngaich hòṅ aṙētu ṙô Chū-ö tö yīö öi asīnkö inlahen chu. Hö-ö yin öi vaichköre inlahen öi in chu. 13 Akahalōn pöri yī-ö tö Chu öich möl teūngen tö ṙētakre öich vë-eny nang yīö tö ngam tölöök inhānga tökūö ngam invahre. 14 Rö-ö pön höng sā kinlaha yīö ngam invah Chu, sön pöri yī-ö öt kūöṅn elmat tö chu, ötrēhěn yī-ö öi sò-òkkūö tö chu.* Hō-en Chu pöri yī-ö öich sā inlahen öp tö hěngtak ma-ahānga ngam Tēv, sā Kristū Yēsū. 15 Isuh öp ngaich ṙanamlōn yīö? Chū-ö chin vamënyen ngih ṙô, tö yīö kò-òren piôknyö minë matre ngaich kēten u öi in chu. 16 Vītöre hòng ngaich Chū-ö öich kumnyah elmat yīö pò chu öich kô-en ṙô? 17 Kalēḵ alaha cha-a nö in yīö, öt tölöök pöri ngam kuilōn cha, pò cha nö hòṅ ṙūöhngen yīö tö chu, hòṅ yīö öi kalēḵ alaha öi tömkörit cha. 18 Tövai ön yěn ōt yip tölöökö kuilōn nö tūökten yīö nö in re. Rö-ö nöng hē el nup ṙētak Chu öich ihôi yīö, pön höng örheūheu nö ngatī inlahen. 19 Yī-ö kūön chu, hanöng sā minë tinrīken Kristū nö öl nö sīöp nö in yīö ngaich höng köp min ngam chanöökö chu öich sā chanöökö yip kamyô. 20 Söö öre yěich in yīö töngamuh ngaich holtö hanangenlōnre öich vë-ekūö yīö, pò Chu öich kirööngen mufē töpòkūö yīö.
21 Yī-ö tö hòṅ tumṙeūtöre tö ngam chööngö, vë-eny nang chu yin, Öt hangṙô ngam Chööngö öi, sitih ṙô öng? 22 Sā ngam inchōḵ elmat nö ngö kinūichngö tö Aprahām nö nët maneuk kūön tö kikōnyö, hěngtak lamöktö in ök mahalanṙen ngaich ngam innëtö nö löktö in ngam töthaköövö kikānö, 23 tö sā finötnyö tarik pöri ngam kūön ök mahalanṙen kikānö ngaich asā ngam kinlēḵngô ök finötnyö ngam kūön ök töthaköövö kikānö. 24 Hěng öp töhayunngöre* manah në ṙô. Ngam manah minā tö nëttak kikānö nö tö nët nö kinlēḵngô. Hěngtak ök mi-i kui Rôngö Sīnai misī ngam famötnyö yik nyīö nö töhaköövö, anga-aṅ an Hakār. 25 Sā ṙēngen rôngö Sīnai i Arēpīa ang Hakār ngaich sā ṙēngen ngam Yērūsalem anga-aṅ töngamuh, pò Yērūsalem nö holten më kūönre nö el inköövö. 26 Ngam lamātulöng pöri töthaköövö Yērūsalem ngaich anga-aṅ yöng hī kikānö.
27 Pò e nö ngö kinūichngö: “Ṙamölōn man më-eṅ kikānö töt mikūönlu. Më-eṅ töt chök öm kayônyö nyīö, tikökṙôre man öm ṙamölōn. Pò më nyīö töṙā-ayö töm kikānö, nö mööḵlö tö më kūön ngam kikānö ngam tö īnu töm pīhöre kikōnyö.” 28 Kahōlö, sā Isāk yin yī-ö inrē öi nyīö öi töfötnyu öi asā ngam kinlēḵngô. 29 Sā inlahen ngam töfötnyu pöri tö tarik nö ötlēḵken ngam töfötnyu tö ngam töhet kumlēḵ, ngatī inlahen ṙēngen töngamuh. 30 Sitih ṙô pöri ngam līpöre? “Ahōnyen ngòh mahalanṙen kikānö hēk tö ngam kūön ò kikōnyö nö el ngih patī, pò ngam kūön ngam mahalanṙen kikānö nö ötkô nö aminu, nö hol ngam kūön ngam kikānö töthaköövö.” 31 Lökten kahōlö, hö-ö in ayī-ö kūön ngam mahalanṙen kikānö, pöi kūön ngam kikānö töthaköövö.