Inhānga Kahūich Yôhan
20 Im ranehtökūö minë tö sat sumkam, ṙömöng sangūla angū-ö ik peuheū hē Mëri Mektelīn nö chuh in ök anūlö ngaich meuk ök ihong anga-aṅ nöng ha-ehangen nö kē-ěyö nö ṙā-ang kūö ök anūlö. 2 Fal ngaich anga-aṅ nö chuh in Sīmōn Pītör ngaich chuh in ök mahaköp ök hanangenlōn Yēsū takô ngaich ngö ṙô: “Kē-ěyö ök Mā nö ṙā-ang el ök anūlö ngaich öt akahakūö īhö töp chūök tī cha nö ṙāḵten ò.”
3 Kiröönngöre ngaich ang Pītör tök tahëng mahaköp nö kū-ötö in ök anūlö. 4 Ṙong ngaich cha-a nö fal, veut pöri ök tahëng mahaköp nö fal tö Pītör ngaich urěhti nö teung nö in ök anūlö. 5 Sōntökūöre ngaich anga-aṅ nö ngëichkö ök anūlö ngaich höng meuk ök tövai hilā, hö-ö pöri anga-aṅ nö kuhēthötre. 6 Teung ngaich ang Sīmōn Pītör nö unôichrit ò, kuhēthötre ngaich anga-aṅ nö el ök anūlö ngaich höng meuk ök tövai hilā nöng ṙā-akṙen nö umuh. 7 Meuk ök hilā ngaich anga-aṅ ök mi-ikui Yēsū nö öt in nuk tahëng hilā, höng löömi pöri nö tahëngö chūök. 8 Ngaich ök tahëng mahaköp ök tö urěhti nö teung nö in ök anūlö kuhēthötre ngaich anga-aṅ ngaich meuk ngaich möl nö ṙatö-ellōnre. 9 Öl cha-a hē e nö akahakūö tö ṙô ngam līpöre, tö ò nö hòṅ hachohlöng nö ṙā-ang in yip tökapah. 10 Lökten ngaich cha-a nö havan nö chuh patīre.
11 Höng sökhak pöri ang Mëri nö elkahôyö nö la-uk ök anūlö nöng peuiny, hē ò nö peuiny nöng sōntökūöre nö ngëichkö el ök anūlö, 12 meuk nak tö nët tak ngaich anga-aṅ ma-ahānga tö isōho inyut hěngtak ök lāmā kui Yēsū nö ūichhaka ngaich hěngtak ök lāmā röön ò. 13 Ngö ṙô ngaich cha-a nö in Mëri: “Kūö yòh öm peuiny?” Ngaich ngö ṙô anga-aṅ nö in cha: “Kē-ěyö ök kòl Mā chu tö cha ngaich öt akahakūö Chū-ö tö chūök tī cha nö ṙāḵten ò.” 14 Unôichrit ṙô ò nö ṙò-òvö, havöölökūöre ngaich anga-aṅ ngaich sökhak ang Yēsū nö umuh, hö-ö pöri anga-aṅ nö akahakūö tö ò pòrô nöng meūkö ò. 15 Ngö ṙô ngaich Yēsū nö in ò: “Kūö yòh öm peuiny? Achīö öp chahöh meh?” Yōm panô-òṅ anga-aṅ tölōn Mëri lökten anga-aṅ nö ngö ṙô nö in ò: “Kanônyö, yēḵ meh öm keunngen ò ngaich vë-eny nang chu më-eṅ töp chūök tīre öm ṙāḵten ò hòṅ chu min öich keunngen ò.” 16 Ngö ṙô ngaich ang Yēsū nö in ò: “Mëri!” Havöölökūöre ngaich ang Mëri ngaich ngö ṙô nö ṙô Hiprū: “Rappōni!” (ngam tö ngö manah “Mahaköphöti!”) 17 Ngö ṙô ngaich ang Yēsū nö in ò: “Uh man haköpngöre in chu, tön öl chin kiröönngöre öich chuh in ngam Yöng öich chuh lātulöng. Kiröönngöre pöri öm vë-eny nang yip kahëm chu öm ngö ṙô, ‘Chuh in ngam Yöngre hēk chuh in ngam Yöng yīö, chuh in ngam Tēv re hēk chuh in ngam Tēv yīö chin öich chuh lātulöng.’” 18 Chuh in yik mahaköp ngaich ang Mëri Mektelīn ngaich ngö ṙô nö in cha: “Meuk öp Mā chin!” Ngaich vë-eny nang cha ngaich anga-aṅ tö nuk ṙô Yēsū nö in ò.
19 Im hē e angū-ö sakāmö im ranehtökūö ngam afta, im lā harap yik mahaköp nö öpngökūöre nö el patī tö kūö vanööṙöre tö yik Yahūti, pòrô pöri ngam inkūp nö öphakkūö sön ang Yēsū nö söktöhëichṙen nö elhôi cha ngaich ngö ṙô: “Lanāmö yēḵ nö in yīö.” 20 Hē ò ngaich nö keuheūt ṙô nö ṙò-òvö hameuktö eltīre hēk ranūmöre ngaich anga-aṅ nö in cha ngaich ṙamlōn yik mahaköp hē cha nö meuk ngam Mā. 21 Ngaich hēk ang Yēsū nö ngö ṙô nö in cha: “Lanāmö yēḵ nö in yīö. Sā ngam Yöng nö tīnten chu, ngatī Chin chū-ö tīnngen yīö.” 22 Hē kinheūt ṙô ò ngaich nö ṙò-òvö, föötö unhômöre ngaich anga-aṅ nö in cha ngaich ngö ṙô: “Teūngen yin yēḵ tö ngam töhet kumlēḵ ngam Tēv. 23 Yēḵ meh min öm aṙēlö tökööl yip holre ngaich aṙēlöng min nup tökööl cha, ngaich yip töt aṙēlöng tökööl tö meh; haköpiyö min nup tökööl cha.”
24 Hē Yēsū pöri nö yih ngaich ang Tômas ngam tö hěngtak nö aṅ in yik tö nëtsīön tak ök tö tumnëtö invëka, öt in yik mahaköp hē e anga-aṅ. 25 Lökten yik tahëng mahaköp nö vë-eny nang ò nö ngö ṙô: “Meuk öp Mā in!” Ngö ṙô ngaich ang Tômas nö in cha: “Hanöng sā chu öl öich meuk nup mikahngö kuntī ò tö nup tinôkngö ò hēk yěich öl öich lūöltö tīre öich in öp kūö ranūmö ò öich ngëicha ngaich hö-ö chū-ö hòṅ ṙatö-ellōnre.”
26 Unôichrit tö hëvhöre sumkam hēk yik mahaköp nö ngatī inlahen nö öpngökūöre nö el patī in cha inrē ang Tômas, pòrô ök patī nö öphakkūö inkūp sön ang Yēsū nöng söktöhëichṙen nö elhôi cha ngaich ngö ṙô nö in cha: “Lanāmö yēḵ nö in yīö.” 27 Unôichrit e ngaich anga-aṅ nö ngö ṙô nö in Tômas: “Lūöltö tīre man öm ing eltī chu hēk lūöltö tīre inrē öm elranūmö chu ngaich ngëicha, ṙāngen ngam kintööḵngö lōnre man ṙatö-ellōnre pöri.” 28 Ngö ṙô ngaich Tômas nö in ò: “Ō më-eṅ Mā chu Tēv chu inrē!” 29 Ngö ṙô ngaich Yēsū nö in ò: “Ṙatö-ellōnre öm kūö meh öm meūkö chu? Töṙamölōn öp anga-aṅ öp töt mameuk ngaich höng ṙatö-ellōre.”
30 Kô-en nö pōyen nuk pinngangkūö hameuktö Yēsū nö in yik haköptö ò, nup töt kūichhötvö nö imat ngih tölöömö līpöre. 31 Minë tö kūichi pöri ṙën anū-ö nö kūichi hòṅ yīö öi ṙatö-ellōnre tö Yēsū nö Kristū ngam Kūön ngam Tēv, kūö ngam ṙinatö-ellōnre min yī-ö öi i minë-eny ò öi teūngen tö ngam nômö.