I minë-eny Yāköp

4 Kūö yòh ön minë linā-alkūö hēk kinyūngö nö elhôi yīö? Röh ön nö kūö nup kuilōn ngam alaha yīö minë ṙamāpö yīö* nöng la-al yīö? 2 Höng lōnu yī-ö, hö-ö pöri öi teūngen. Fëlhang yī-ö hēk yikhang, sön pöri öi höng öt taneūnguṙen. Höng iṙūöhen yī-ö im linā-alkūö hēk kinyūngö. Öt aṅhavin yī-ö, pò yīö öt havë-a. 3 Hēk yēḵ yīö öi havë-a ngaich öt teūngen yī-ö, pò yīö ötlöökö ellōn öi havë-a, kūöre öi höng hòṅ kumchikngenre öi hateungngö kuilōn ngam alaha.

4 Ō yī-ö ma-asěha,* öt akahalōn öi tö manah ngam innôlö ngih panam nö vamī-ilre nö lama-al ngam Tēv? Lökten ngòh tö lōnu töre nö hanôl ngih panam, vamītöre anga-aṅ nö lama-al ngam Tēv. 5 Hēk ngölōn hòng më-eṅ tö ngam līpöre nö öt chööinyu nö ngö ṙô: “Ngam tinrīken tö ōt nö in hī, vīlö ngam ranāinyngö angū-ö nö in hī, hòṅ hī öi hateungngö minë kuilōnre”? 6 Ngam tökiröng miṙēḵlōn pöri kahëtö ngam Tēv nö in hī, mötlö angū-ö tö ngam tinrīken hī. Lökten nö ngö ṙô ngam līpöre: “La-al yip tö tāilölōn an ngam Tēv, hameuktö ngam tökiröng miṙēḵlōn pöri nö in yip tö yāichö ellōn tarik.”

7 Lökten yin öi tumṙeūtöre tö ngam Tēv, la-al ngam Satān* pöri ngaich falngöre min anga-aṅ nö ṙā-ang in yīö. 8 Haröhtöre in ngam Tēv ngaich haröhtöre min anga-aṅ nö in yīö. Ō yī-ö tököölö fālen, söichlö eltīre yin, ō yī-ö tökatööngalōn, ha-etlö ellōnre yin. 9 Haṙivlōn yin hēk peuiny ngam inlahenre. Hökngen ngam nīölö hēk ṙanamölōn yīö nö vī-ingre nö miṙivlōn. 10 Hayāichngöre yin öi ikūö Yāvē* ngaich hapōilen yīö min anga-aṅ.

11 Kahōlö, ṙāngenre yin ui chōichö ṙô tö inlahen höö. Ngòh töchōichö ṙô tö inlahen öp tö hěngtak prötör hēk kaheūkö ò nö tö fāluṙen ngaich lama-al ṙô ngam chööngö ngam Tēv min anga-aṅ ngaich kaheūkö min anga-aṅ nö tö fāluṙen nö im chööngö. Yēḵ meh sūöichken ngam chööngö nö tö fāluṙen ngaich hö-ö më-eṅ öm lamök in e, pò meh öm vī-ilre öm kamhôkken e. 12 Höng hěngtak an ngam Kamëtö Chööngö hēk Kamhôka inrē, ngam tö mihôiṅ nö laklen hī hēk ha-ethanga. Ngaich achīö öm më-eṅ kamheuk ngam holre nö tö fāluṙen?

13 Ōt yip ṙung in yīö tö ngö ṙô: “Töngamuh hēk huṙöich in öi chuh elpanam ngaich hěng samyeūheu öi in e, inyīha hēk hamūl töpōyen rupīö inrē,” 14 öi höng öt akahakūö tö inlahen ngam nômö ip huṙöich. Pò yīö öi höng sā ṙēngen nup lul tacham töng rahëichtakūö nö meūkö ngaich chaṙēviyö. 15 Hòṅ ngö ṙô pöri öre yī-ö: “Yēḵ e nö lōn Yāvē* ngaich meuk ngam sakāmö ayī-ö huṙöich öi la-evṙen tö ngih hēk tö ngī-aṅ.” 16 Tāilölōn pöri yī-ö hēk eū-eure inrē. Tötlöng ön angū-ö tö ngatī inlahen tanāilölōn. 17 Lökten yěn ōt tö akahakūö tö nup tölöök la-en, sön pöri nö öt kētöre ngaich tököölö fālen anga-aṅ.