Raneh chitri Pītör
3 Ngatī yī-ö inrē inpīhö kikānö, iṙūöhen yin öi tumṙeūtöre tö më pīhöre, hòn yěn ōt min in yip inpīhö kikōnyö töt hòṅ hang ngam ṙô ngam Tēv 2 ngaich yěn höng meuk nup töhet tinrīken ngam inpīhö kikānö min anga-aṅ hēk ngam tökiröng minlēḵṙen ò pòrô anga-aṅ nöng öt ṙò-òvö. 3 Uh nup yēḵ inlahen tī yīö hanyöötöre nöng lamā-uk ngam alaha yīö, tö sā ngam vinī-i keūyöre, hanyöötöre tö sunna hēk chumhënöre tö nup tövai hilā, 4 hanyööt ngam lamātuhēt pöri tarik yī-ö tö ngam lanāmö hēk ṙanëmen, anū-ö në innyööt töthō nö hötṙehngöre hēk töpōiṙāi inrē nö imat ngam Tēv. 5 Ngatī inlahen tī yik misī töhet yöngnyīö in nuk urěh ṙētak nö hanyöötöre yik tö maheūṅkku nö in ngam Tēv ngaich tumṙeūtöre cha-a tö yik pīhöre kikōnyö, 6 sā Sëra nö hang chööngö Aprahām ngaich mā ngö ṙô nö havëken ò. Yēḵ meh min höng iṙūöhen öm la-evṙen tö tölöök la-en hēk um hökngen ngam pinhë-eṅkūö nö iyööngö meh ngaich kaheūkö min më-eṅ öm kūön ò.
7 Ngatī yī-ö inrē inpīhö kikōnyö öi holtö mikah elmatre* öi in më pīhöre kikānö ngaich hameuktö minlēḵṙenre öi akahalōn tö më kikānö nö mötlö töt nganë-eṅ tö yīö, pò cha inrē cha-a nö hol yīö nö amīnu tö ngam nômö ngam lamöktö in ngam tökiröng miṙēḵlōn, hòn öt sökngöre ngam inlahen yīö öi im vinë-ekūötēv.
8 Manā-aṅ ṙô chu in yīö, hēngö mufē yin öi ṙòkhöre,* akahaiṙen tö nup miṙivlōn höö, sā hanangenlōn më prötör tö höö, hameuktö ngam ṙanëmenre, aṅhavin tö ngam inyāichngö. 9 Yēn ōt tö chökhuti tö yīö ngaich ui havahalvahre öi chökhuti tö ò hēk yěn ōt mumṙēḵngen yīö ngaich ui havahalvahre öi miṙēḵngen ò, anë pöri la-evṙen tö tölöök öi in ò* pò yīö öi angū-ö invëti öi lök el ngih talöökö, hòṅ yīö amīnu tö ngam inkòlô.
10 Pò ngòh “tö hangenlōn tö ngam nômö hēk ngòh tö hòṅ meuk ngam tölöök sakāmö, hòṅ ṙap ngam litākre anga-aṅ tö minë tötlöök hēk lak ngam minuhre tö nup töchōich ṙô. 11 Ṙūöhöngre pöri anga-aṅ tö ngam ötlanöökö ngaich la-evṙen tö tölöök, chöh inlahenre nö vī ngam lanāmö ngaich iṙūöhen nö in e. 12 Pò minë mat Yāvē* nö ikui yip tölöök tarik ngaich minë nang ò nö hang nup ṙô yip mahavëkökūö ò. La-al yip tötlöökö la-en pöri ang Yāvē.”*
13 Yēḵ yīö öi hameuktö nganötöre öi la-evṙen tö nup tölöök la-en ngaich achīö min mahakihten yīö? 14 Hēk yēḵ yīö öi chö-öinytö ngam lanöökö öi kihngen ngaich ṙamölōn yī-ö. Ui pa-ekūö* yěn pinhëṅ-elkūö yīö yip tarik. 15 Mā revö lōn pöri yī-ö tö Kristū nö töhet nö ellōn yīö ngaich yěn ōt tö hòṅ mikahtökūöre tö lāinyngen ngam maheūṅkkö yīö ngaich örheūheu yī-ö hīnöre öi vë-eny nang cha tö ngam maheūṅkköre, holtö ṙanëmenre pöri, minlēḵṙenre inrē.
16 Köptī töm hanëtö ngam lamātuhēt elkuilōnre, hòṅ nup töng sitih ṙô cha yěn ötlēkôre tö yīö ngaich yēḵ cha min nö meuk nup tövai tinrīken yīö öi tamömrit Kristū ngaich sirōngkūö min cha-a. 17 Yēḵ yīö öi kihngen tökūö nup tölöök la-enre hēk yěn kuilōn ngam Tēv inrē angū-ö nö ngatī ngaich tölöök angū-ö nö in yīö yēḵ yīö öi kihngen, ěhten töm inlahen yīö öi keun kanihngen töpòkūö minë tötlöök la-enre. 18 Pön ngatī ang Kristū nöng hěng heuh nö kapah töpòkūö në tökööl hī nöng örheūheu, pòrô anga-aṅ nö tölöök sön nö kapah töpòkūö hī öi tököölö fālen, hòṅ yīö öi kētu öi in ngam Tēv. Hē ò nö fëli ngaich alaha tö alaha tarik anga-aṅ, hē ò pöri nö hachohlöng ngaich kē-ěvkūö anga-aṅ tö ngam alaha töt meūkö. 19 Angū-ö ngih inlahngen ò nö kiröönngöre nö ahānga nö in më tötlöök ma-ahānga më më-el chēl, 20 më tö la-evṙen nö la-al minë chööngö ngam Tēv in nuk sakāmö Nō-a, hē ngam Tēv nö holtö manööyöre nö hööka ngaich ṙònghöichṙen vinī-i hē e ök chōng Nō-a, haroh tumtak tarik yamôklö nö el ò ngam tö ngö, hëvhöre tak yik tarik* tö laklöng tö ngam ṙanööingö.
21 Minkahngö ngam vinôkö ön ngih inlahngen töngamuh ngam lamaklen meh töngamuh nö löktö in ngam inchohlö Yēsū Kristū (öt tö ngö manah ön ngam vinôkö tö e nö sinöichngö nup mum ngam alaha, inṙēḵtö ṙô hī pöri öi in ngam Tēv öi hòṅ teūngen tö ngam töhet lamātuhēt elkuilōn). 22 Ngaich an Yēsū nö havanlöre nö chuh el halīöngö ngaich lāhāmö ngam Tēv. Ngaich yip ma-ahānga, tö chööngu hēk yip tö minhôiṅyu nö tumṙeūtu tö ò.