Raneh Chitri Tösalònikē
2 Kahōlö, akahalōn yin tö inlahen ih, hē ih öi chöhken yīö öi ihih ngaich rö-ö angū-ö nöng yanëḵngen. 2 Sā mikahlōn yīö tö inkihten ih hēk minṙēḵngö ih öi i Filipī, sön pöri īhö öi löktö im inyöökenre tö ngam Tēvre öi hangöönöre, hòṅ ih öi la-al minë taṙòkhöre kanihngenre ngaich vë-eny nang yīö tö ngam tölöök inhānga ò. 3 Minë ṙô ih öi haköpten yīö, öt lamökngörit in nup ṙô anū-ö tö minyôiny, öt lökngö in minë tötlöng kuilōn, ötrēhěn nun nö aṅhavin tö inchīlö, 4 hō-olōn pöri ngam Tēv tö ih öi kē-ěvkūö tö ngam tölöök inhānga, lökten īhö öt haṙamlōn tarik, haṙamlōn ngam Tēv pöri öi ahānga, ngam mameuk ellōn hī.
5 Akahakūö yin tö ih öi öt hěngheuh öi hayahlö nup ṙôre öi in yīö, rö-ö inrē öi yikngö nup chehen aṅ in yīö lökten öi havaikö elmat yīö tö nup inlahenre öi höng hanyatkö elmat, höng ngam Tēv an vamënyen ih! 6 Ötrēhěn īhö lōn tö ineū-eure ikūö tarik, ötrēhěn ikūö yīö hēk ikūö tahëng, yěi lōnu pöri öre ngaich mihôiṅ īhö öi lumngantö elkui yīö pò ih öi tanīnöṙô Kristū. 7 Holtö ṙanëmenre pöri īhö öi in yīö, öi sā inlahen öp yöngnyīö mahapō kūönre nö holtö hanangenlōnre nö meukṙen* ò. 8 Kirööngen hanangenlōn pöri īhö tö yīö lökten rö-ö īhö öi höng vë-eny nang yīö tö ngam tölöök inhānga ngam Tēv, pöi hööngöre inrē öi kēngö nômöre töpòkūö yīö, pò yīö öi hanangenlōn ih.
9 Kahōlö, öthō yin lohten öi öt köplōn tö nup kumlēḵ alaha ih öi la-evṙen hēk kanihngen ih inrē ik sā ih öi vë-eny nang yīö tö ngam tölöök inhānga ngam Tēv ngaich sakāmö hatööm īhö öi la-evṙen hòṅ ih öi öt lumngantö elkui yīö in nup töng sitih. 10 Yī-ö yin mameuk inlahen ih hēk ngam Tēv inrē, tö ih öi holtö chanipöre hēk lanöökö hēk öt fāluṙen öi in yīö öi ṙamatö-ellōnre. 11 Akahalōn takô yī-ö tö inlahen ih öi sā inlahen öp inyööngö nö in öp kūönre ngatī inlahen īhö öi kētö inlēnö öi in yīö öi kö hěngtak, hareushkö alaha yīö hēk mikahtö elnang yīö inrē, 12 hòṅ ngam tinrīken yīö nö örheūheu nö tölöök nö imat ngam Tēv, ngam mahavëten yīö nö im ineū-eu ò hēk ngam Pūlngö ò inrē.
13 Lökten in öt ṙākenre öi kētö nööinyö ngam Tēv, pön ik sā yīö öi hang ngam ṙô ngam Tēv öi löktö in ih ngaich hō-en e yī-ö nö ṙô ngam Tēv, rö-ö nö ṙô tarik ngaich kô-en angū-ö nö ngatī ngaich kô-en ngih ṙô nö la-evṙen nö ikui yīö öi ṙamatö-ellōnre. 14 Kahōlö, asīnköröön minë māṅ ngam Tēv yī-ö yip mi-im hinëngö nö in Kristū Yēsū nö i Yūta, pò yīö inrē ngatī kanihngen tö tī më aṅ panamre öi sā minë kanihngen cha tö tī më Yahūti. 15 Cha-a yin vē Yahūti famëlngen ngam Mā Yēsū hēk tö yik pròfět inrē hēk hakihten ih inrē cha-a, öt haṙamlōn ngam Tēv cha-a, la-al minë taṙòkhöre pöri la-en tarik, 16 pò cha nö asökngöröön ih öi vënyen ngam inhānga öi in yip tahëng mihëṅrö tarik, hòṅ cha nö öt teūngen tö ngam inyööken, ngatī inlahen cha-a nö ṙūöhlö ṙôken minë tököölre, yih pöri min ngaich ngam ṙētak lanīnö ngam Tēv nö ikui cha.
17 Kahōlö, hē ih öi rahëichhangkūö öi köhngen tö yīö (pòrô yī-ö öi marôvat tö ih sön yī-ö öi höng röhta öi im ellōn ih), ngaich hòṅ kapahare īhö öi hòṅ meukkūö yīö,* lökten īhö öi chöhtö inlahenre öi chuh in yīö. 18 Īhö, heūṅ, Chū-ö Pôl öich nëtvan lang öich hòṅ chöhtö inlahenre öich hòṅ chuh in yīö ngaich pöri īhö öi asökiröön tö ngam Satān. 19 Achīö öp min tö meūkka tö hī ṙanamölōn hēk sapīöv minhôinyö hī ip ṙētak yanīhi ngam Mā hī Yēsū? Hö-ö öi min öi yī-ö? 20 Kô-en! Yī-ö yin ineū-eu ih hēk ṙanamlōn ih inrē.