I minë-eny Taitös
1 Chū-ö Pôl öich mahalanṙen ngam Tēv hēk tanīnöṙô Yēsū Kristū, ngam ṙinatö-ellōn chu hēk ngam inlahen chu öich la-evṙen tö sāḵta an nö in ngam ṙinatö-ellōn yip tökatöllöng hēk tö yip tölöngö mikah elmat tö ngam kanô-en, yip tö sā kuilōn ngam Tēv nö ha-öinyö ò 2 ngaich lökngörit in ngam mineūkkö ngam nômö tö örheūheu-aṅ ngam ṙô ngam Tēv misī nö kilēḵngôre ngam töthō nö minyôiny-aṅ, 3 ngaich im töhalēniṙen ṙētakre anga-aṅ nö vënyen ngam ṙôre nö löktö im tölöök inhānga, kē-ěvkūö chin tö ngih la-en inhānga öich löktö i chööngö ngam Tēv hī ngam Mahayööken. 4 Kūich ngih chitri chin nö lamöö in ngam tökô-en kūön chu Taitös öich löktö in ngam ṙinatö-ellōn hī ngam chūök hī ṙòkhöre öi nôlhöt:
Ngih ön havëkö chu tö meh öm teūngen tö ngam tökiröng miṙēḵlōn hēk lanāmö öm löktö in ngam Tēv hī ngam Yöng hēk löktö in ngam Mahayööken hī ang Kristū Yēsū.
5 Ṙën Chin öich ṙāngen meh i Krētě, hòṅ meh öm halööktö nup tötlöng inlahen* nö in e ngaich sā nuk ṙô chu kētö inlēnö öich in meh öm hěng-hēngö chahūhu tö nup el panam öm vīlen yip minṙöinylen. 6 Katöllö yip prötör yip töt hēngö sinūöchlö fālen, töng hòṅ hěngtak pīhö tö kikānö, hòṅ ṙamatö-ellōnre yip kūön cha hēk un sinūöichkuvö nö in nup töng inṙamngölōnre* hēk lama-al inrē. 7 Töhalēnlöng yin më minṙöinylen prötör nö mahayōmken tö ngam Tēv, lökten anga-aṅ nö tötkô nö fāluṙen, ötkô anga-aṅ nöng kamnahanglōnre, tö tainy, mihiyōi-aṅ, famël hēk ötkô nö yal tö nup töng lömöktö i michūṙen taneūngen, 8 tö hòṅ kū-ö urěh pöri nö in minë mineukṙen, tö hangenlōn tö lanöökö, tölööngö mufē,* tölöök, töchiplö hēk tö hòṅ ṙamāpöre inrē, 9 hòṅ köptī anga-aṅ tö ngam tökô-en ṙô nö im inköphöti, hòṅ ò nö rö-ö nöng löktö in minë tö yöölen* tī inköphöti nö kētö inreushkö alaha, pön halēn yip lama-al ngih inköphöti inrē.
10 Pōyen yip tarik in e lama-al, kamhôkken nup töng öt yöölen tī hēk mahalō-ongkūö yip tahëng, mötlö nö in yip töng köp nö im ṙô tunnyinyngö. 11 Tö hòṅ urööṙen yip cha-a tarik nö hòṅ tilūpi elvāng, pò cha nö kētö në inköphöti nö löktö in minë michūṙen taneūngenre, minë tötkô öre nö inlahen cha ngaich pisūngö ṙinatö-ellōn yip töhěng mikūönnö cha-a. 12 Ngatī ṙô ön ngòh tö hěngtak pròfět cha nö ngö ṙô: “Tö minyôiny yin vē tarik aṅ Krētě, tö tainy nö sā inlahen nup töṙeūla aṅ elinchōn, töṙahata hēk töpōivat nö in nup töng.”
13 Tökô-en ön ngih ineūkö cha lökten man sā mumṙēngen cha tö nup ṙô re öm halööktö inlahen cha, hòṅ cha nö köp nö ngön* nö im ṙinatö-ellōn, 14 ngaich um lōmngö tö nup istōri yip Yahūti hēk tö nup chööngö yip tarik yip ṙamāngö ngam kanô-en. 15 Ṙòkhöre nun nö het nö in yip taṙòkhöre töhet tarik yip töchōich pöri hēk töt aṅhavin tö ngam ṙinatö-ellōn, öt hěng nup töhet nö in cha, pò ngam mufē cha hēk tö ngam lamātuhēt elkuilōn cha nö nëtre anū-ö nöng chōich. 16 Höng eūköre cha-a nö ikūö tömaṙôngö nö akahakūö tö ngam Tēv, höng hameuktöre pöri cha-a nö mahngen ngam Tēv nö löktö in nup la-enre, pò cha nö samô-en nup taṙòkhöre tölöök la-en hēk töt hamang chööngö, töthō-ovö inrē nö in nup töng sitih tölöök la-en.