Innëtö Chitri Yik Aṅ Kòrin
10 Hakôtòre chin chū-ö Pôl öich löktö i ṙanëmen hēk miṙēḵlōn Kristū öich mikahtö elnang yīö, pòrô yī-ö öi ngölōn tö chu öich sā yip töng öt tinrīkuṙen öich elhôi yīö, ngaich yēḵ chu öich öt elhôi yīö ngaich sā yip töt pinhë-evkūö chū-ö. 2 Meūka chin töre öich öt hameuktö pinhë-eṅkūöre min yēḵ chu öich ihôi yīö, sā inlahen chu lohten öich hòṅ hameuktö öt pinhë-eṅkūöre öich in yip tarik, yip tö ngölōn tö hī öi lök in minë tinrīken ngih panam. 3 Iyöng kūö ngih panam in ayī-ö, hö-ö pöri öi sā inlahen ngih panam öi kiyung. 4 Pön öt aṅ ngih panam minë chehetī hī öi kiyung, mihôiṅ pöri në chëhetī kahëtö ngam Tēv nö in hī, hòṅ hī öi teuklen minë ṙô tö aṙū-uti nö söl lātaṙeū. 5 Tiṙōlngö nup chanöh ellōn nup töhapōilöng inrē ṙô, nup lama-al minë mikah elmat ngam Tēv ngaich mihôiṅ tö minë töng mufē elkuilōn ngaich kēhöt u nö el inköövö, hòṅ chu öich vīten u nö hamang chööngö nö in Kristū. 6 Lēntöhëichṙen in öi kētö sācha yip töng tarik yip töt hamang chööngö, urēhěkūö e pöri yī-ö öi hameuktöre öi keuheūttö inlahenre hang chööngö.
7 Höng ngamëichkö arëkūö tarik yin öi vī ṙô ellōnre, yěn ōt takô ṙamatö-ellōnre tö ò nö aṅ in Kristū, ngaich hökngen ò hēk nö fēken ngih kanô-en. Tö sā ò anga-aṅ nö aṅ in Kristū, ngatī inrē ayī-ö öi aṅ in Kristū. 8 Kētu chööngö in īhö tö ngam Mā öi mahangönkö alaha yīö, rö-ö öi ma-afukngen yīö, yēḵ chu chū-ö min öich yahlö ineū-eu tökūö ngih chööngö ngaich öthō min chū-ö öich sirōngkūö. 9 Öt lōnu chin tö yīö öi ngölōn tö chu öich pinhë-elkūö yīö öich löktö in minë chitri re. 10 Ngö ṙô cha-a: “Keūngö ṙô nup chitri kahūich ò hēk tö lökngöre tī inrē, ngaich höng sā mineūkö töng ötkalē-en hēk töt heuveū-eu ṙô anga-aṅ yěn yih nö el ṙôngö hī.” 11 Yip tö ngatī ṙô, akahalōn yēḵ cha-a tö nup ṙô ih öi marôvat el minë chitri re, ngatī inlahen min īhö öi hameuktöre elhôi yīö. 12 Lökten in īhö öt lōnu töre öi kaheukhötre öi in yip tarik hēk haṙongtöre inrē öi in yip töng ameū-eure. Yēḵ cha pöri nö kahngenre nö kalahare hēk haṙongtöre nö in re, ngaich hameuktöre cha-a nöng öt aṅhavin tö mikah.
13 Hö-ö pöri īhö öi eū-eure öi hatôngöröönre tö ngam tö halēniṙen tölngökūö ih, ngam kamngö ih pöri ahānga, ngam kahëtö ngam Tēv nö in ih, ngatī yin yī-ö inrē alaha ngih la-en, tölngö in e īhö inrē eū-eure. 14 Öthō in īhö vāngngö röönre tö ngam tölngöre öi sā töng öt sölta im kamngö yīö, pò ih öi īhö mu-urěh öi mahateungtö ngam tölöök inhānga Kristū öi in yīö. 15 Kô-en, hö-ö in īhö vāngngö röönre tö ngam tö halēniṙen tölngöre, ngaich öt eū-eure öi löktö i la-en yip tahëng, maheūṅkku pöri īhö nö asā ngam ṙinatö-ellōn ih nö kū-ö urěh, ngatī inrē minë la-en ih nö kū-ö urěh nö in minë kamngö kinë-ekūö ih ngaich. Unôichrit e min minë la-en ih nöng kū-ö urěh, 16 hòṅ ih öi ahangkö ngam tölöök inhānga öi in nup panam tö havāngngöre tö yīö ngaich öt eū-eure īhö öi löktö in nup la-en yip tahëng, nup tö ngaichngen in nup kamngö cha. 17 “Ngòh ameū-eure pöri, hökngen ò nö eūkö inlahen Yāvē.”* 18 Lökten nö öt ngòh ameū-eure, pön ngòh tö eū-eu tö Yāvē,* anga-aṅ min tö hō-ov tö ò.