I minë-eny Heprāi

4 Lökten, yěn ṙömöng köp ngam kinlēḵngô tö inlahen hī öi kuhēthötre im haneūheu ngam Tēv, ta-a töi haṙēmngenre, hòn öt hěngtak tö sō-ovö in hī nö kuhēthötre nö in ngih haneūheu. 2 Pò hī ayī-ö öi tö vënyu nang tö ngam tölöök inhānga, sā inlahen cha nö vënyu nang, ngam ṙô pöri ahang cha, öt yanööluṙen cha-a nö in e, pön öt sā ṙinatö-ellōn yik tarik cha-a yik hamāngö e misī. 3 Ṙatö-ellōnre pöri ayī-ö ngaich kuhēthötre öi el ngam haneūheu, yěi ṙôtö inlahen cha pöri, ngö ṙô anga-aṅ tö inlahen cha: “Lökten Chin öich holtö lanīnöre kilēḵngôre ngö ṙô: ‘Hö-ö yin min nö kuhēthötre nö el ngam haneūheu chu,’” pòrô anga-aṅ nö keuheūten tö minë la-enre ngaich unôichrit e nö heūheure nö löktökūö ranehlö ngih panam. 4 Ōt öp kamngö chūök ṙô ò nö ṙôtö inlahen ngam sinātö sakāmö nö ngö ṙô: “Heūheure ngam Tēv in nup taṙòkhöre la-enre im sinat sumkam,” 5 ngaich ngö ṙô hēk anga-aṅ nö in ngih: “Hö-ö yin min nö kuhēthötre nö el ngam haneūheu chu.”

6 Pön ōttit lohten yip tarik tö hòṅ kuhēthötre nö el ngih haneūheu ngaich yip tö urěhngöre tarik tö vënyu nang tö ngih tölöök inhānga ngaich öt kuhēthötre cha-a kūöre nö öt hang chööngö, 7 lökten anga-aṅ nö unôichrit ngam tömarô-angen ṙētak nö im kahūich Tāvit salmai nö, “ing sakāmö” ngö ṙô, sā kinakkö e nö in ngih chitri ik raneh nö ngö, “Yēḵ yīö töngamuh öi hangṙô ò ngaich ui hangëḵngö ellōnre.” 8 Yēḵ Yôsuā öre nö kēhöt cha nö el ngam chūök haneūheu ngaich öthō öre ngam Tēv hēk nö unôichngöre nö ṙôtö inlahen ngam tahëng sakāmö. 9 Tö ngö manah chěi angū-ö nö ōttit ngam sakāmö haneūheu yip tarik ngam Tēv. 10 Pò yip tarik kumhēthötre nö el ngam haneūheu ngam Tēv, ngatī cha-a nö heūheure tö nup la-enre nö sā inlahen ngam Tēv.

11 Lökten, ta-a töi hakūötenre öi kuhēthötre öi el e angū-ö haneūheu, hòn öt hěngtak in hī tö fukta nö sā inlahen yip tarik fumlal chööngö. 12 Pò ngam ṙô ngam Tēv nö tö aṅ, īnu inrē tö kumlēḵre, mötlö kaneūtö an tö nup tö-āṅngöre la-a kaneūtö sanët, mihôiṅ inrē nö lök hôi ngam tarik* töm unhômö* nö harēvngen u tö höö hēk mihôiṅ nö lök el minë töhayunngöre aṅ el tangëḵ* hī nö chöh nup tötkô nö meūkö mufē elkuilōn hī. 13 Öt hěnghang chehen in në tövīlöng töhayunngöre nö imat ngam Tēv, ngam chūök hī pöri kētö kinröötöre, höng ṙòkhöre anū-ö nö lingālhakṙen nö imat ò hēk öt hanyunngen inrē.

14 Lökten, yēḵ ngam tökiröng mākūö kūönṙô hī, ngam kūön ngam Tēv ang Yēsū, ngam chamuh el halīöngö nö kuhēthötre, ta-a töi iṙūöhen eūkö inlahen ò ikūö tömaṙôngö. 15 Pön rö-ö ngam mākūö kūönṙô hī nö töt akahaiṙen tö nup öt kumlē-en hī, sā inlahen hī pöri anga-aṅ nö kalaha nö inup tökeuheūttöre, sön pöri anga-aṅ nö öt tököölu. 16 Lökten, ta-a töi holtö nganöönöre öi öt pinyū-uvṙô ṙò-òvö öi chuhkūö ngam tökiröng miṙēḵlōn kantēra ngam Tēv, hòṅ hī lööngö ṙētak teūngen tö inyöökenre tö ngam neūkölōn hēk tö ngam tökiröng miṙēḵlōn ò.