Innëtö Chitri Timôtī
2 Lökten më-eṅ kūön chu, iṙūöhen taneūngen man yēḵ tö ngam kumlēḵ öm löktö im tökiröng miṙēḵlōn, yip mi-im hinëngö nö in Kristū Yēsū, 2 ngaich nup ṙô ahang meh öm löktö in chu hēk nup tö vënyu inrē tö yip töpōyen mameuk, kēten në ṙô më-eṅ in cha, yip tarik chūök ṙinatö-ellōn, hòṅ cha nö heuveū-en nö haköpten yip tahëng nö asā öp tölngöre. 3 Sā ṙēngen öp tö hěngtak ayī-ö kumyunglen Kristū Yēsū, öp hamīnöre nö la-al nup kanihngen. 4 Öt hěngtak kumyung kamëtöre* nö in minë la-en* inhāṅha nômö ing panam, hòṅ ò nö ṙamölōn tī* tö ngam kamëhöt ò nö im kinyūngö. 5 Hēk yěn ōt kamëtöre nö im minnyāmö, yēḵ ò pöri nö öt asā minë inlēnöre nö nyamtô ngaich öthō min anga-aṅ nö teūngen tö ngam sapīöv. 6 Ngòh tö hěngtak yōm panô-òṅ, tökalēḵ alaha nö la-evṙen ngaich hòṅ anga-aṅ tö urěh nö teūngen tö nup ṙòng taneūichre. 7 Örheūheu chumkūöṙen tö minë ṙô Chu, kētö mikah elmat* meh an min ngam Mā i tökeuheūttöre.
8 Köplōn tö Yēsū Kristū nö tö hachohlöng nö ṙā-ang in yik tökapah ngaich kūön* Tāvit anga-aṅ, angū-ö ngih tölöök inhānga tö ahangka tö Chu, 9 chö-öinyten ngih tölöök inhānga Chin öich la-al në miṙivlōnre hēk hachēli öich sā öp tö fāluṙen, hö-ö pöri ngam ṙô ngam Tēv nö haköövö. 10 Angū-ö ön chö-öiny chu öich la-al në taṙòkhöre kanihngen töpòkūö yip tökatöllöng, hòṅ cha inrē cha-a nö löktö in Kristū Yēsū nö hayöökaṙen hēk teūngen inrē tö ngam töt chanuhuvṙen ineū-eure. 11 Mihôiṅ in ṙatö-ellōnre in ngih ṙô: Yēḵ hī öi hol ò öi kapah ngaich kô-en min ayī-ö öi aṅ öi hol ò, 12 yēḵ hī köp öi möi ngaich hol ò min ayī-ö nö rācha öi hayöng, yēḵ hī min öi mahngen ò ngaich mahngen hī inrē min ang-aṅ, 13 pòrô ayī-ö öt teungten in nup ṙô ngam Tēv la-en, örheūheu pöri anga-aṅ nö teungten nö inup la-enre hēk ṙôre.
14 Fēḵlen cha hēk kētö inlēnö* öi in cha tö në ṙô öi ikūö ngam Tēv, tö cha nö un la-alkūöre nö chö-öinyten nup ṙô, pò hī öt yanööluṙen öi löktö in u, höng pala-aiṙen* tī pöri tö yip hamang. 15 Haṙēmngenre man, hòṅ meh öm hameuktöre ikūö ngam Tēv öm töhō-ov öm tarik ò ngaich öt sirōngkūö öm löktö in minë la-enre hēk tölöngö tī inrē öm yūs ngam ṙô ngam kanô-en. 16 Sō-en minë töng yanëḵngen inköphöti pöri, nup töng lama-al minë töhet ṙô, pò minë tö ngatī inköphöti* nö kū-ötö in minë la-en tī tö hī nup töt maha-öiny ngam Tēv, 17 ngaich minë haköptö cha nö sā ṙēngen öp töchahū-ui vah nö tūölngöre. Aṅ in yip tö ngatī inlahen nan nā Himenīös nā Filetös. 18 Ṙamāngenre nan nā tarik nö lök el ngam talöökö kanô-en, pò cha nö ngö ṙô tö inlahen yip tökapah nö ngaich nö hachohlöng ngaich rīkre yip tarik tö pala-aiṙen ṙinatö-ellōn tö tī cha. 19 Sön pöri ngam rööntö machööḵlö vahītö ngam Tēv nö köp ngaich kūichtu minkahngö në ṙô nö in e, “Akahakūö an Yāvē* tö yip tarikre,” hēk, “Yip töng mahavëkö minë-eny Yāvē,* hökngen cha nö ṙāngen nup ötlanöökö.”
20 Rö-ö nup ṙung nöng sunna hēk chāntī tanīöyö tö ōt nö el nup tökiröng patī, ōt pöri nup tanīöyö chōn hēk tilin inrē, rīkre nup tö yūsö nö in nup tö milēḵkaṙen la-en ngaich rīkre nup tö yūsö nö in nup töng öt uroh minlēḵken. 21 Yěn ōt ṙamūöhöngre tö minë töt urohō yinūsö tanīöyö ngaich vītöre min anga-aṅ nö tanīöyö nö tö yūsö nö in nup tö milēḵkaṙen töhet la-en, yöölen tī anga-aṅ töp yöngṙenre nö in nup la-en hēk halēnlöng inrē nö chö-öinyten nup taṙòkhöre tölöök la-en. 22 Lökten, ṙūöhöngre tö nup yinikhānga lōn ṙālö, iṙūöhen pöri hol yip tarik töhëtö ellōn nö kēḵ minë-eny ngam Mā hēk holtö ellōnre öi lök im lanöökö, ṙinatö-ellōn, hanangenlōn hēk lanāmö.
23 Sō-en nup ṙô töng tööḵlö tö kumlō-ov hēk töng yanëḵngen, pò meh akahakūö tö u nöng löktö lina-alkūö. 24 Pò ngam mahalanṙen ngam Mā nö ötkô nö lama-alkūö, hòṅ töṙēmen* pöri anga-aṅ nö ikūö yip taṙòkhöre tarik, tö hòṅ heuveū-en nö haköphöti ngaich ṙāpöre anga-aṅ yēḵ ò nö ötlēkaṙen, 25 hēk holtö ṙanëmenre nö mikahtö elnang yip töt lööngö mufē, pò ngam Tēv lohten min nö kētö ṙētak cha nö halööktitre* ngam lökten cha mihôiṅ nö teūngen tö ngam tölöng mikah elmatre töm kanô-en, 26 ngaich fē-ěre cha-a ngaich ṙā-anyre nö in minë tinngöp tī ngam Satān,* hòṅ cha nö hateungngö minë kuilōn ò.