Inlahen La-en Yik Tanīnöṙô

20 Hē ngam tinṙōlen nö ṙāḵtöre, havëten yik mahaköp ngaich ang Pôl, ngaich havëngö chanūhure anga-aṅ unôichrit inlahen ò nö hareuskö alaha cha ngaich kiröönngöre nö chuh Maketònī. 2 Pōyen nuk ṙô ò nö hareuskö alaha yik aṅ in e mahaköp hē ò chöhken minë kamngö, yih ngaich anga-aṅ nö i Krīs. 3 Lūöi chumngëṅtö rò-òten anga-aṅ nö in e, hē ò ngaich nö yôklö nö el chōng nö hòṅ kiröönngöre lang nö chuh Siriā, ngaich chöhnyö inlahenre yik Yahūti nö hòṅ sūöichkö fālen ò, lökten anga-aṅ nö kēḵ fëslare nö lökngö Maketònī nö havan. 4 Cha-a yin vē hamòlröön ò nö kiröönngöre, Sôpatör ök Kūön Purhös mi-iyöng Pīriā, nā Aristorkös nā Sekuntös mi-iyöng Tösalònikē hēk nā Kai-ös nā Timôtī mi-iyöng Törpī ngaich nā Tikikös nā Tròfimös lamöktö Ēsiā tistrik. 5 Urěhngö chanūhu ngaich cha-a nö kiröönngöre ngaich hökken ih nö i Trô-as; 6 unôichrit sakāmö ngam Paratīn töt aföhlöng ròtī pöri īhö öi lökngö Filipī öi lök el mai, ngaich unôichrit tö taneui sumkam öi teung öi in cha öi i Trô-as, sat sumkam rò-òten īhö öi in e.

7 Im raneh sakāmö ngam afta hē ih öi mūl öi nyā ngaich kētö inlēnö yik tarik ang Pôl, yik tö mūlhakṙen pò ò nö hòṅ kiröönngöre im tahëng sakāmö nö ṙā-ang umuh lökten anga-aṅ nö söl im chūöl hatööm nö kētö minkahten. 8 Ṙōl nuk ëānvö tö hū nö el ök lātulöng uròhò i chūök ih öi hamūlöre. 9 Hěngtak ök ṙālö amūichhak nö ikūö kirki tö Yutikös minënyi, hē Pôl nö marò-òtö ṙô nö ṙò-òvö, lapat ngaich anga-aṅ nö haṙòh ngaich suktöre nö löktö in ök linūöiköl chap uròhò, ngaich hē ò nö hachohlöng ngaich anga-aṅ nöng kapah. 10 Yòhti pöri ang Pôl nö löktö in ök tayòhō nö chuh lātaṙeū ngaich sulngöre nö fūölö ò ngaich ngö ṙô nö in yik prötör: “Uh yin ayôṙa tön ngaich ön nö aṅhlö.” 11 Unôichrit e ngaich anga-aṅ nö yòhlö nö chuh lātulöng ngaich nyā,* höng iṙūöhö ṙô anga-aṅ nö vë-ekūö cha hanöng sā minlīlö ngam peuheū nö öl, havëngö chanūhure ngaich anga-aṅ nö kiröönngöre tö cha. 12 Keunngen ök ṙālö kikōnyö ngaich cha-a, öt heuveū-euṙô cha-a tö ṙôken ngam taneūngenre töm inreushkö alahare nö meūkö ò nö aṅ.

13 Unôichrit e ngaich īhö öi yôklö öi el chōng ngaich kiröönngöre öi chuh Asòs, höng kiröön pöri ang Pôl nö chuh in e, hòṅ kē-ě Pôl īhö nö in ih nö el chōng öi sā ṙô ò. 14 Hē Pôl ngaich nö teung nö i Asòs ngaich hayôklen ò ngaich īhö nö el chōng nö in ih ngaich kiröönngöre öi chuh Mitulēnë. 15 Im tahëng sakāmö hēk īhö öi lökngö muh öi kiröönngöre öi el chōng ngaich teung öi i Kī-òs, im innët sumkam ngaich ngam chōng ih nö sökngöre nö i Samòs, ngaich teung öi i Milĕtös im linūöi sumkam. 16 Halēnngö ellōnre ngaich ang Pôl nö öt hòṅ sökngöre nö i Efisös hòṅ ò nö öt yaha ṙôken ṙētak nö i Ēsiā tistrik. Lökten anga-aṅ nö haveutṙenre hòṅ ò nö teungtökūö nö in ngam sakāmö ngam Paratīn Pentĕkòstē nö i Yērūsalem.

17 Söömtö ṙô ngaich anga-aṅ nö löktö Milĕtös nö chuh Efisös nö havëten yik minṙöinylen aṅ el ngam māṅ. 18 Hē cha ngaich nö teung nö in ò, ngö ṙô ngaich anga-aṅ: “Akahakūö yin tö inlahen chu hēten tö chu öich vānghöt röönre im panam Ēsiā tistrik ngaich meuk minë tinrīken chu yī-ö öich elhôi yīö. 19 vītöre chū-ö öich mameukṙen ngam Mā öich holtö inyāichngöre öich iṙūöhen öich meukṙen ò ngaich holtö mak matre chū-ö tö kūö inlahen më Yahūti nö hòṅ lökṙen chu hēk pōyen inrē nup lākūö chu kinlaha chu, 20 ngaich öt heūlngöre chū-ö öich vënyen nup ṙô nup tö yöölen* tī tö yīö, ötrēhěn inrē öich asökngö inlahen yīö öi haköphöti ikūö tö maṙôngö hēk chuh kūö patī inrē. 21 Vë-eny nang më Yahūti chū-ö hēk Krīk tö cha nö havöötö ellōnre nö ikūö ngam Tēv hēk hōten cha nö ṙatö-ellōnre nö in ngam Mā hī Yēsū. 22 Yěh meuk! ngaich chin öich hachō-okūö tö ngam töhet kumlēḵ öich chuh Yērūsalem ngaich öt man-inngen chū-ö öich chuh in e. Hö-ö pöri öich akahakūö tö nup inlankenre min öich in e. 23 Höng ngamuh pöri mikahlōn chu tö ngam töhet kumlēḵ nö örheūheu nö vë-eny nang chu nö ikūö minë panam tö minë kanihngen hēk inchēlhöt chu nöng hökken chu. 24 Sön pöri chū-ö öt pōiṙāi mat tö ngam nômöre höng ngamuh pöri kuilōn chu öich hateungngö röönre in ngam finālö hòṅ chu öich keuheūtngen ngam la-enre, kahëtö ngam Mā Yēsū ön ngih la-en nö in chu hòṅ chu öich ahangken ngam tökiröng miṙēḵlōn ngam Tēv.

25 Yěh meuk! akahakūö pöri chū-ö tö yīö taṙòkhöre öi tö vënyu nang tö chu tö ngam inhangkö ngam Pūlngö öt hēk yin min öi meukkūö chu. 26 Lökten ingih sakāmö yī-ö yin vamënyen chu ngaich öich öt aṅhav kui tö mahām vē tarik, 27 pò chu öich keuheūtnyö ṙôre öich vë-eny nang yīö tö ngam kuilōn ngam Tēv. 28 Aṅhtöre yin hēk aṅtö minë taṙòkhöre kiteūm pò yīö öi tö vīlöng öi mameukṙen cha öi löktö in ngam töhet kumlēḵ, hòṅ yīö öi sā ṙēngen yōm sīṅp öi chumkūöṙen tö minë māṅ ngam Tēv, minë tö havaha tö ò nö ṙāitö mahām ngam kūön ò. 29 Akahalōn chin unôichrit kinröönngö chu min nup tötainy am nö kuhēthötre nö elhôi yīö ngaich öt hameuktö ṙānëmënre min cha-a nö in minë kiteūm chu. 30 Ngaich ōt min yip tarik samöklöre nö elhôi yīö yip tamūökngen më mahaköp nö lā in re nö löktö in minë tövaich ṙô.

31 Lökten yin höng aṅhaṅti hēk haköplōnre tö chu öich ṙōl samyeūheu öich peuheū hatööm öich peuiny öich mikahtö elnang yīö öi kö hěngtak. 32 Hēk kēten yīö chin öi eltī ngam Tēv hēk in ngam tökiröng miṙēḵlōn ngam ṙô ò, ngih ṙô ò min tö mihôiṅ nö ngönö tī tö yīö, teūngen min yī-ö tö aminre öi elhôi yip tölöök tarik. 33 Öt hěngheuh chin chū-ö öich yikngö chāntī, sunna hēk chehen holre. 34 Akahakūö yin tö chu öich hakôtenre öich meukṙenre, rö-ö öich meukṙenre pöich meukṙen yip holre inrē tö hāṅten. 35 Ngaich chin hameukhömat yīö in nup taṙòkhöre tö hī öi ngatī inlahen öi hòṅ kalēḵ alaha ngaich hayööken yip holre yip töt kalē-en ngaich örheūheu öi köplōn tö ngih ṙô ngam Mā ang Yēsū nö ngö ṙô: ‘Mööḵlö ṙanamlōn an ngam kinë-eṅti tö ngam kinë-eṅ.’”

36 Unôichrit ṙô Pôl nö ṙò-òvö tö në ṙô sulngöre ngaich anga-aṅ nö vë-ekūötēv nö holṙô cha nö ṙòkhöre. 37 Ṙòkhöre ṙô ngaich cha-a nö peuiny ngaich holtö hanangenlōnre nö fūölö Pôl ngaich hāmkūö ò. 38 Angū-ö ngih tökiröng miṙivlōn cha pò cha min hēk nö öt meukkūö Pôl. Unôichrit e ngaich cha-a nö söömngen ò nö el chōng.