I minë-eny Efisös
6 Yī-ö nyīö, harūnöre yin öi hang chööngö më yöngre aṅ im Mā, tön tölöng an angū-ö nö imat ngam Tēv. 2 “Milēḵṙen man tö ngam yöngre kikōnyö hēk tö ngam yöngre kikānö,” raneh ön ngih nö chööngö nö holtö ngih kinlēḵngô: 3 “Hòṅ meh öm lööken* ngaich marô-òtö samyeūheu öm aṅ ing panam.” 4 Hēk yī-ö inyöngö kikōnyö, uh yin öi harunnyö lanīnö më kūönre, haruklen cha pöri öi asā kuilōn Yāvē* öi haköpten cha hēk mikahtö elnang* cha.
5 Yī-ö mahalanṙen, yip yöngṙen yīö öi ing panam, holtö pinhë-eṅkūöre hēk kinchëiyöre öi holtö chaniplö ellōnre öi hang chööngö cha, sā inlahen yīö öi hang chööngö Kristū. 6 Öt höng hē e yēḵ cha nö meūkö yīö, öi sā tö hòṅ haṙamlōn tarik, sā inlahen yip mahalanṙen Kristū pöri öi keuheūttö ellōnre öi hateungngö ngam kuilōn ngam Tēv. 7 Holtö tölöök inlahenre öm la-evṙen öm chö-öinyten Yāvē,* rö-ö öm chö-öinytö yip tarik, 8 pò yīö öi akahalōn tö yip taṙòkhöre, pòrô nö mahalanṙen hēk töt haköövö, yip töng löökö la-en min, teūngen min anga-aṅ tö raneushöre nö löktö in Yāvē.* 9 Hēk yī-ö yöngṙen, ngatī yin yī-ö inrē öi löökö inlahen öi in yip mahalanṙenre ngaich ui pinhë-elkūö cha, pò yīö öi akahalōn töm yöngṙen nā an nëttak nö el halīöngö ngaich töt atöltuṙen anga-aṅ.
10 Im manā-aṅ chin öich kētö ṙinūöhöl alaha yīö öi teūngen tö ngam minhôiyö im tökiröng kumlēḵ ngam Mā. 11 Kēḵ minë taṙòkhöre yin aṅhtīre aṅ im Tēv, hòṅ yīö öi la-al nup tinngöp tī ngam Satān. 12 Tön rö-ö in ayī-ö öi la-al* yip tarik tö alahavö,* pöi la-al yip mahayöng, tö chööngu, mahayöng ngam sinngūlö ngih panam hēk la-al yip tökalēḵ tötlöök ma-ahānga yip më-el halīöngö. 13 Lökten yin nyëklen minë taṙòkhöre aṅhtīre aṅ im Tēv, hòṅ yīö öi la-al nup tötlöök sakāmö ngaich yěi keuheūten töp tö hòṅ inlahenre ngaich haköpöre yī-ö.
14 Lökten yin nyëklö ṙatre tö ngam kanô-en hēk chumhënöre tö ngam lanak elngòh ngam lanöökö öi haköpöre, 15 hēk kunröplöre tö ngam lanënen aṅ im tölöök inhānga ngam lanāmö öi haköpöre. 16 Hěnghöre kēḵ ngam tökiröng lanaklöre ngam ṙinatö-ellōn ngam lökten yīö mihôiṅ hanyangngökūö minë taṙòkhöre töhūkūö vöi tī ngam Satān.* 17 Ngaich sumpīövlöre tö ngam sapīöv inyööken ngaich kēḵ sanët ngam töhet kumlēḵ ngam tö ngö, eltīre tī tö ngam ṙô ngam Tēv, 18 örheūheu asā inlahen ngam töhet kumlēḵ öi vë-ekūötēv hēk örheūheu peuinyhökūö ò, ngatī inlahen öi hīnöre hēk chö-öinyten yip töhet tarik öi iṙūöhen peuinyhökūö ò. 19 Vë-elkui chu inrē, hòṅ chu öich kētu heuneū-euṙô yēḵ chu öich ṙò-òvö ngaich öt pinhë-eṅvkūö chū-ö yēḵ chu öich vënyö inlahen ngam tölöök inhānga inlahen ngam töhet töt mikahkūö sin, 20 ngam chö-öiny Chu öich halöki tö minë inlök öich Chū-ö tanīnöṙô, vë-elkui Chu hòṅ chu holtö öt pinhë-eṅkūöre öich ṙò-òvö, sā ngam hinôtö chu öich ṙò-òvö.
21 Ngam hanangenlōn hī prötör Tikikös hēk töt michūṙen nö mahalaṙen ngam Mā, anga-aṅ min vamë-eny nang yīö tö minë taṙòkhöre inlahen chu, hòṅ yīö öi akahalōn tö inlahen Chu hēk töp la-en chu inrē. 22 Angū-ö ön chö-öiny Chu öich tīnten ò nö chuh in yīö, hòṅ yīö öi akahalōn tö inlahen chu öich ihih, hòṅ ò inrē nö kētö inreuskö alaha yīö.
23 Teūngen yin më prötör tö ngam ṙinatö-ellōn nö holtö ngam lanāmö hēk tö ngam hanangenlōn nö löktö in ngam Tēv hī, ngam Yöng hēk ngam Mā Yēsū Kristū. 24 In cha inrē nö ṙòkhöre ngam tökiröng miṙēḵlōn yip töt chuhngöre hanangenlōn tö ngam Mā hī Yēsū Kristū.