Raneh Chitri Yik Aṅ Kòrin
11 Asīnkö talöökö chu yin, sā chu chū-ö asīnkö talöökö Kristū.
2 Eu-eū yīö chin pò yīö öi fēken chu in nup tökeuheūttöre ṙô hēk minë inlēnö* kahëtö Chu öich in yīö ngaich hāngö u yī-ö i tökeuheūttöre. 3 Lōnu pöri chū-ö tö yīö öi akahakūö tö ngam kui ngòh kikōnyö nö Kristū, ngaich ngam kikōnyö kui ngòh kikānö, ngaich ngam Tēv nö kui Kristū. 4 Ngòh kikōnyö kamṙul kuire nö vë-ekūötēv hēk eūkö nup yamih, öt tö milēḵṙen anga-aṅ tö ngam kuire, 5 ngòh kikānö pöri töt kamṙul kuire nö vë-ekūötēv hēk eūkö nup yamih, töt milēḵṙen anga-aṅ tö ngam kuire, pò ò nö sā ṙēngen öp kikānö tö kuhāki keūyö. 6 Lökten yēḵ ngòh kikānö nö öt kaṙul kuire ngaich hòṅ kamöpngö keūyöre anga-aṅ, yēḵ ngòh tö hěngtak kikānö pöri nö aṙē-ěvö nö kamöpi keūyö hēk kuhāki keūyö ngaich hòṅ kaṙul kuire anga-aṅ.
7 Ötkô ön ngòh tö hěngtak kikōnyö nö kaṙul kuire, pò ò nö nyat ngam Tēv hēk nööinyö ò, ngòh kikānö pöri löktö nööinyö ngam kikōnyö. 8 Pò ngòh kikōnyö nö öt lamöknyö in ngam kikānö, ngòh kikānö pöri lamöknyö im kikōnyö. 9 Hěnghöre öt vīlöng ngòh kikōnyö nö chö-öinyten ngam kikānö, ngòh kikānö pöri tö vīlöng nö chö-öinyten ngam kikōnyö. 10 Lökten ön ngòh tö hěngtak kikānö nö hòṅ lōnu töre nö vītö minkahngö nö ikuire tö ngam inlahenre nö tumṙeūtöre nö chö-öinyten më ma-ahānga.
11 Sön pöri, ngam töhalēnlöng tö ngam Mā nö ötkô ngam kikānö nö öt īnu töm kikōnyö ngaich ötkô ngam kikōnyö nö öt īnu töm kikānö. 12 Lökten sā ngòh kikānö nö lamöknyö im kikōnyö, ngatī ngòh kikōnyö nö lamöknyö im kikānö nö yih, ṙòkhöre pöri anū-ö nöng lamöknyö in ngam Tēv. 13 Kahngenre yin yī-ö katöllö lōnre: Tölöng öng angū-ö yēḵ ngòh kikānö nö öt kaṙul kuire nö vë-ekūö ngam Tēv nö vë-ekūötēv? 14 Röh öng nö nehngenre yēḵ ngòh tö hěngtak kikōnyö nö maròtòng keūyö ngaich töt minlēḵken ò angū-ö? 15 Yěn maròtòng keūyö pöri ngòh tö hěngtak kikānö ngaich öt ineū-eu ò hòng angū-ö? Pò ngam keūyö ò nö kētu nö sā ṙēngen kinṙul kui ò. 16 Yěn ōt pöri lama-alkūöre nö chö-öinyten minë tahëng kui panam tökūöre nö hòṅ hang minë tahëng chööngö kui panam ngaich akahalōn cha-a nö öt ōtngöre kui panam nö ihôi hī hēk ihôi minë māṅ ngam Tēv inrē.
17 Hē chu pöri öich kētö në inlēnö ngaich öt ameū-eu yīö Chū-ö, pò ngam ötlanöökö nö ṙūöhölre nö mötlö tö ngam lanöökö nö ihôi yīö yěi hamūlöre. 18 Urěh Chin hang inlahen yīö, yēḵ yīö öi mūlhakṙen öi el ngam māṅ ngaich ōt ngam inrēvöre nö ihôi yīö, ngaich rahëichyen chū-ö inrē öich ṙinatu-ellōn öich in u. 19 Öthō lohten inrē nö öt ōt nup krup nö elhôi yīö, ngaich lööknyi mineūkö yip tarik nö elhôi yīö, yip tö hō-ovö tö ngam Tēv.
20 Yēḵ yīö hamūlöre hěngkang chūök öi chö-öinytö ngam Inmūlkūö ngam Mā, ngaich rö-ö yī-ö öi hamūlöre öi nyamā.. 21 Pön ōt yip in yīö töng urěhtikūö nö nyā tö harap, nö urēhěkūö ngam Inmūlkūö ngam Mā, lökten nö ōt yip töng ha-euk hēk ōt yip töng hiyōi kūöre nö òk. 22 Öt patī-ivö öyih tö chūökre öi nyā, òk inrē? Hēk kūöṅn elmat hòng yī-ö tö ngam māṅ ngam Tēv hēk miṙēḵngen yip töt hēngö aṅ in? Sitih ṙô öich min in yīö? Eū-eu yīö hòng chū-ö? Hö-ö Chin hòṅ eū-eu yīö in ngih inlahen yīö.
23 Nup ṙô ngam Mā nö vë-eny nang Chu, anū-ö haköptö Chu öich in yīö hē ngam Mā Yēsū nö hachīlivah tö hatööm nö kē-ě ngaich kēḵ ök tö hěng anga-aṅ ròtī, 24 hē kinheūtṙô ò ngaich nö vë-ekūötēv nö ha-öiny ngam Tēv, liköölö e anga-aṅ ngaich ngö ṙô: “Minkahngö ngih alaha chu ön ngih tökētu töpòkūö yīö. Ngatī tī pöichö haköpkölōnre tö chu.” 25 Hē kinheūtkūö cha nö nyā tö lā harap, ngatī inlahen hēk anga-aṅ nö kēḵ ök kulah ngaich ngö ṙô: “Ngih kulah ön minkahngö ngih tufömngöre kinlēḵngô lamökngörit in ngih mahām chu. Ngatī tī pöichö i tum heuh yīö ôkö e, inköpkölōn yīö tö chu.” 26 I tum heuh yīö nyā ngih ròtī hēk òk ngih kulah, ngaich vamënyö ngam kinpaha ò yī-ö ngaich höng iṙūöhen min yī-ö ngatī inlahen, hanöng saha yanīhi ngam Mā.
27 Lökten yēḵ yip töt hō-ovö nö nyā ngam ròtī hēk òk kūö ngam kulah ngam Mā, ngaich fāluṙen anga-aṅ nö im alaha ngam Mā hēk in ngam mahām ò inrē. 28 Lökten ngòh tö hěngtak tarik nö hòṅ urěh nö ngëichköre, yēḵ ò nö mihôiṅ nö ngatī inlahen hēk yěn hö-ö ngaich möl mihôiṅ anga-aṅ nö nyā ngam ròtī hēk òk kūö ngam kulah. 29 Lökten ngòh töng öt akaha elmat tö manah ngam alaha ngam Mā ngaich höng nyā hēk òk inrē, töng kamëtö sācha re anga-aṅ. 30 Angū-ö lökngen yip tö pōyen tarik elhôi yīö nö ötkalē-en hēk vahāvö hēk pōyen inrē yip tökapah.* 31 Lökten yēḵ hī öi kahngenre ngëichköre öi tö sitih inlahen öi tarik ngaich öt kaheūkö min ayī-ö öi töfāluṙen. 32 Ngaich yēḵ hī kaheūkö töfāluṙen ngaich halööktit hī ang Yāvē,* hòṅ hī öt teūngen tö sācha re öi anòngngövah ngih panam. 33 Lökten kahōlö, yēḵ yīö öi hamūlöre öi nyā-aṅ e ngaich kö hökken höö yī-ö. 34 Yěn ōt tö ha-euk ngaich nyā anga-aṅ nö i patī, hòṅ ngam manūlö yīö nö öt lāinyngen yīö kētu sācha. Unôich Chin min halööktit nup tahëng ṙô, yēḵ Chu min öich yih umuh.