Raneh Chitri Tösalònikē

1 Pôl, Silvanös* hēk Timôtī inrē, kūichtö chitri ngam māṅ in i Tösalònikē, yip mi-im hinëngö nö in ngam Tēv ngam Yöng hī hēk ngam Mā Yēsū Kristū:

Teūngen yin yēḵ tö ngam tökiröng miṙēḵlōn hēk lanāmö ngam Tēv.

2 Yēḵ ih öi fēken yīö im vinë-ekūötēv ngaich örheūheu īhö kētö nööinyö ngam Tēv, 3 kaheuk ṙētak īhö öi fēken yīö öi ikūö ngam Yöngre, ngam Tēv, tö yīö öi holtö kanô-enre öi la-evṙen, holtö hanangenlōnre öi ma-āinyre la-evṙen hēk köp öi hamööyöre tökūö ngam mineūka aṅ im Mā hī Yēsū Kristū. 4 Lökten kahōlö, yī-ö hanangenlōn ngam Tēv, akahalōn in tö yīö öi tökatöllöng tö ò, 5 pò ngam tölöök inhānga kum ih öi chuh in yīö nö rö-ö nö yih nö in yīö nöng sā nup ṙô töt kumuṙen, holtö minhôiṅyö, töhet kumlēḵ hēk kanô-enre pöri angū-ö nö söömtu tö ih nö in yīö, akahalōn takô yin inrē tö inlahen ih la-evṙen töpòkūö yīö. 6 Pōyen nup kanihngen yīö öi holtö ṙanamlōnre öi hō-en ngam ṙô lamöktö in ngam töhet kumlēḵ ngaich vītöre yī-ö öi ma-asīnköröön ih hēk ma-asīnköröön ngam Mā, 7 lökten yī-ö öi inchō-okūö yip taṙòkhöre ṙamatö-ellōnre aṅ Maketònī hēk aṅ Akāya inrē.

8 Ngih pöri tökô-en, tö ngam ṙô Yāvē* nö rö-ö nö in yīö nö hāngö hēk rö-ö inrē nöng in më aṅ Maketònī hēk aṅ Akāya, pön keuheūtngöre chūök hināngö ngam ṙinatö-ellōn yīö öi in ngam Tēv, lökten in hēk öt ṙahônyu tö nup tahëng. 9 Pò yip tarik nöng kônyi ṙô nö ṙò-òv hē ranehten ih öi meukkūö yīö hēk sitih inlahen inrē yī-ö öi ṙāngen minë insātēv re ngaich havöötökūöre öi in ngam tö aṅ hēk tökô-en Tēv öi löklōn ò, 10 ngaich hökkö yanīhi ngam Kūön ò Yēsū nö löktö el halīöngö, ngam tö hachohlöng tö ò nö ṙā-ang in yip tökapah hēk ngam lamaklen hī min tö öp yamih tanāinyö ngam Tēv.