Innëtö Chitri Tösalònikē
1 Pôl, Silvanös* hēk Timôtī inrē, kūichtö chitri ngam māṅ in i Tösalònikē yip mi-im hinëngö nö in ngam Tēv ngam Yöng hī hēk ngam Mā Yēsū Kristū:
2 Teūngen yin yēḵ tö ngam tökiröng miṙēḵlōn hēk lanāmö lamöktö in ngam Tēv, ngam Yöng hī hēk lamöktö in ngam Mā Yēsū Kristū.
3 Kahōlö, la-en ih ön ngih tö ih öi örheūheu öi kētö nööinyö ngam Tēv öi chö-öinyten tö yīö. Tölöng inrē angū-ö yěi ngatī inlahen, pön kô-en nö iṙūöhöröön sanīöpö ngam ṙinatö-ellōn yīö hēk iṙūöhöröön sanīöpö inrē ngam hanangenlōn yīö tö höö öi ṙòkhöre. 4 Angū-ö lāinyngen ih öi eū-eu yīö öi el minë māṅ ngam Tēv, pöi pòrô öi pōyen kanihngen hēk inkihten, sön yī-ö öi möi hēk köp inrē öi im ṙinatö-ellōn. 5 Pön angū-ö ngih inmeuktö ngam tökô-en kinṙôka tö ngam Tēv hēk löktö in e min yī-ö öi hō-ovö öi el ngam Pūlngö ngam Tēv, ngam lāinyngen yīö öi keun nup kanihngen.
6 Kô-en, tölöng angū-ö nö imat ngam Tēv nö havahalvah nup kanihngen yīö nö in cha, yip mahakihten yīö. 7 Yī-ö pöri lama-al minë inkihtenre, teūngen yin min tö ngam hanöhlö öi holten ih ip yamih ṙētak, hē ngam Mā Yēsū nö holtö yip tökalēḵ ma-ahāngare nö hameuktöre nö el ngam töhūkūö tameūiyö nö löktö el halīöngö, 8 havahalvah min anga-aṅ nö in yip tarik töt akahakūö tö ngam Tēv hēk yip töt ma-asīnköröön ngam tölöök inhānga inlahen ngam Mā hī Yēsū. 9 Ṙūöhöyö min cha-a nö lākūö ngam Mā hēk ṙūöhöyö inrē tö ngam yanāngö ngam kumlēḵ ò ngaich kētu sācha min cha-a nö örheūheu nö ahetiyö, 10 ip hē e min angū-ö ṙētak, hē ò min nö yih nö holtö yip töhet tarikre nö hapōilöng ngaich hē e min cha-a nö ṙòkhöre nö ha-öinyö ò yip ṙamatö-ellōnre nö in ò, pò yīö öi ṙatö-ellōnre öi in ngam tö vënyu tö ih.
11 Angū-ö ön ngih lāinyngen ih örheūheu öi vë-elkui yīö, hòṅ yīö öi hō-ovö tö ngam Tēv hī öi im invëtöre ngaich hateungngö nup taṙòkhöre anga-aṅ lōnre tölöök la-en nö löktö in ngam kumlēḵre ngaich nup taṙòkhöre la-en yīö öi löktö im ṙinatö-ellōnre, ṙòkhöre anū-ö nö hateūngi tö ò. 12 Ṙën angū-ö nö ngatī inlahen, hòṅ e nö asā ngam tökiröng miṙēḵlōn ngam Tēv hī hēk ngam minë-eny ngam Mā hī Yēsū Kristū nö teūngen tö ineū-eure nö löktö in yīö hēk teūngen inrē min yī-ö tö ineū-eure öi im hinëngö öi in ò.