I minë-eny Rōma
16 Hòṅ vënyö inlahen öp kanānö hī chin Fōpi öich in yīö ngam töla-evṙen nö el ngam māṅ Kenkörai, 2 hòṅ yīö öi ha-öiny tö yīhi ò im Mā öi sā inlahenre in yip töhet tarik ngaich yēḵ ò nö hòṅ lōnu tö inyöökenre tö yīö nö in nup la-en ngaich hayööken ò yī-ö, pò ò nö tö kôten nö hayööken yip tö pōyen hēk hamôlṙen* chu inrē.
3 Sinlāmö in nā Priska nā Akula minā hamôlṙen chu öich in Kristū Yēsū, 4 höng öt afēkö ngam nômöre cha-a* tökūö linaklö ngam nômö chu ngaich höng rö-ö öich höng chū-ö maha-öiny tī cha, pön yip tahëng mihëṅṙö nö ṙòkhöre aṅ el minë māṅ. 5 Sinlāmö inrē in ngam māṅ tö mūlhakṙen nö i patī cha. Sinlāmö in ngam hanangenlōn chu Epenetös, ngam lanòh ṙòng aṅ Ēsiā nö in Kristū. 6 Sinlāmö in Mariā, ngam tö pōyen la-en nö chö-öinyten yīö. 7 Sinlāmö in minā mak alaha chu nā Anrōnikös, nā Chunīas minā hol chu sin nö el chēl hēk tökirööngö minë-eny inrē nö elhôi yip tanīnöṙô ngaich tö urēhěten tö chu nö tamömrit* Kristū.
8 Sinlāmö in ngam hanangenlōn chu Ampiliatös nö im Mā. 9 Sinlāmö nö in Urpanös ngam hamôlṙen chu nö in Kristū hēk ngam hanangenlōn chu Istachis. 10 Sinlāmö in Apěles ngam tö hō-ov nö in Kristū. Sinlāmö in cha yip aṅ patī Aristöpulös. 11 Sinlāmö in ngam mak alaha chu Herōtīön. Sinlāmö in cha yip aṅ patī Narsisu yip mi-in ngam Mā. 12 Sinlāmö in nā Rifāna, nā Rifôsa minā tö pōyen la-en nö im Mā. Sinlāmö in ngam hanangenlōn hī Pörsis ngam tö pōyen la-en nö im Mā. 13 Sinlāmö in Rufös öp tö katöllöng nö im Mā hēk in öp yöng ò inrē kikānö öp tö sā yöng chu. 14 Sinlāmö in hē Asinkritös, Falakan, Hörmīs, Patrōpas, Hörmās hēk yip mi-in cha inrē prötör. 15 Sinlāmö in nā Filōlokus hēk Chulīa inrē, in nā Narsu tö öp kanānö ò Olimpas hēk in cha inrē nö ṙòkhöre yip töhet tarik. 16 Kö salāmö höö yin tö töhet hināmökūö. Ṙòkhöre minë māṅ Kristū nö söömtö sinlāmö yīö.
17 Kahōlö, vë-ekūö yīö chin, tö yip tarik lama-al nup taneūngen yīö inköphöti, vī tinṙōlen nö el minë māṅ ngaich lāinyngen yip tahëng nö ṙāngen ngam talöökö ṙinatö-ellōn,* havööngökūöre yin tö cha hēk ṙūöhöngre inrē tö cha. 18 Pò yip tarik tö ngatī inlahen nö öt mahalanṙen ngam Mā hī Kristū, pön höng kamëngö ngam neūköre* cha-a nö ngatī inlahen ngaich löktö in nup tövai cha-a ṙôre hēk nup inchīlö ṙô cha nö halō-ongkūö yip tarik töchīpö ellōn. 19 Ṙòkhöre ngaich yip tarik nö akahalōn tö yīö öi hamang chööngö, lökten chin öich ṙamölōn tö tī yīö. Lōnu pöri chū-ö tö yīö öi akaha in minë tölöök ṙô, ui akaha pöri i tötlöök ṙô. 20 Veutten an min ngam Tēv kamëtö lanāmö nö paṙôköti tö ngam Satān nö löktö im kalröön yīö. Köp ön yēḵ nö in yīö ngam tökiröng miṙēḵlōn ngam Mā hī Yēsū.
21 Sinlāmö in ngam hamòlṙen chu Timôtī hēk in yīö inrē mak alaha chu Lukīös, Yāsön hēk Sosipitör inrē.
22 Sinlāmö ngö ṙô chin in yīö mi-im Mā. Chū-ö Tatīös ngam kamūich ngih chitri.
23 Sinlāmö ngö ṙô chin in Kai-ös ngòh anahtökūö chu hēk anahtökūö minë māṅ inrē nö ṙòkhöre. Sinlāmö in Erāstös ngòh mahayōmken minë chehen ngam panam hēk in ngam kahëm ò inrē Kūatös. 24* ——
25 Ngam tölöök inhānga ahangkö chu hēk ngam ahangkö chu inlahen Yēsū Kristū, löktö in e mihôiṅ ngam Tēv nö hangönken yīö, sā nup töhayūni töhet ön ngih tölöök inhānga, ngam tö hameuknyu nö ngaich, ngih töhayūni töhet töt mikahkūö nö in yik mā misī. 26 Ngaich pöri angū-ö nö hameuknyu töngamuh. Löktö i chööngö ngam Tēv tö örheūheu nö aṅ ngih töt mikahkūö, ngaich löktö in minë tökūichi tö-eūka imat ngam līpöre nö vënyu nang minë taṙòkhöre panam hòṅ cha nö ṙatö-ellōnre hēk hang chööngö. 27 Örheūheu hapōilen ngam töng hěngtak tö akaha Tēv löktö in Yēsū Kristū. Āmen.