Innëtö chitri Yôhan
1 Lamöktö in ngòh tököiny* ön ngih chitri nö lamöö in öp tökatöllöng yöngnyīö hēk in yip kūön ò inrē, ngam hanangenlōn Chu takô ngaich rö-ö öich höng Chū-ö, ṙòkhöre pöri vē tö akahakūö tö ngam kanô-en nö hangenlōn tö ò, 2 ṙën īhö öi hangenlōn tö yīö pò ngam kanô-en nö ellōn ih hēk höng örheūheu inrē nö in ih. 3 Iṙūöhen taneūngen in yēḵ tö ngam tökiröng miṙēḵlōn, neūkölōn hēk lanāmö öi löktö in ngam Tēv ngam Yöng hī hēk löktö in ngam Kūön ngam Yöng ang Yēsū Kristū hēk iṙūöhen inrē öi teūngen tö ngam kanô-en hēk hanangenlōn.
4 Pōyen ṙanamölōn Chin pöich akahalōn tö yip rīkre kūön meh nö lök el talöökö ngam kanô-en, sā taneūngen ih tö ngam chööngö öi löktö in ngam Yöng. 5 Lökten më-eṅ yöngnyīö, hòṅ aṙēḵtu ṙô Chin tö meh öm hang ngih chööngö tö hī öi kö hangenlōn tö höö. (Hö-ö Chin kūichtö tufömngöre chööngö höng angū-ö pöri ngih chööngö kahūichtö chu ngam lamöktökūö raneh nö in hī.) 6 Ngih ön manah ngam hanangenlōn tö hī öi hòṅ iṙūöhen öi lök in minë chööngö ngam Yöng. Sā inlahen ahang yīö öi löktökūö raneh, angū-ö ngih chööngö ò tö yīö iṙūöhen lök el talöökö ngam hanangenlōn. 7 Tön pōyen yin nö ngaich vē mahachīl lamöknyö in minë panam, öthō-en Yēsū Kristū cha-a nö alaha tö alaha tarik nö yih, ngòh töt hamô-en ngih ṙô anga-aṅ ön mahachīl hēk lama-al Kristū.
8 Ngëichköre yin hòṅ yīö öt löhlö tī tö nup chehen nup tö hameuknyu nö löktö i kumlēḵ alaha ih, teūngen pöri yī-ö tö ngam raneushö. 9 Ngòh vamāngnyö röönre tö minë inköphöti aṅ in Kristū hēk ṙāngenre nö hāngö u, öthō-en ò ngam Tēv, ngòh tö iṙūöhen pöri nö hang minë inköphöti aṅ in ò, anga-aṅ tö hō-ovö tö ngam Yöng hēk tö ngam Kūön. 10 Yěn ōt yamihtöre nö in yīö ngaich öt kēten ngih inköphöti ngaich ui halöngten öp tarik nö chuh patīre, uh rēhěn öi salāmö ò. 11 Ngòh kamëtö sinlāmö ò hamòlṙen ò anga-aṅ nö in minë tötlöök la-en ò.
12 Rö-ö pön pōyen nup kahūichtö Chu, hö-ö pöri Chū-ö öich lōnu töre öich löktö kinsum kūö kanūich öich kūichhöti öich imat līpöre, maheūṅkku pöri Chū-ö töre öich chuh in yīö hēk hòṅ kôta ṙô inrē öich vë-ekūö yīö, hòṅ yīö öi ṙūöhölre ṙanamölōn.
13 Sinlāmu ṙô yin nö in meh, më kūön ngam tökatöllöng kanānö meh.