Inlahen La-en Yik Tanīnöṙô
6 Höng iṙūöhöröön ṙôken sanīöpö yik mahaköp hē u anū-ö sakāmö, ngaich yik Yahūti mahaköp ṙamô ëlô Krīk nö uyëḵkö inlahen yik Yahūti mahaköp ṙamô ëlô Hiprū, pön örheūheu yik tafīösī ṙamô ëlô Krīk nö öt chumkūökaṙen tö ngam nyinā-aṅ. 2 Havëten yik tahëng mahaköp nö ṙòkhöre ngaich yik tö Nëtsīön tak tanīnöṙô ngaich ngö ṙô nö in cha: “Hö-ö ön ngih nö la-en hī öi tanīnöṙô öi ṙāngen ngam inköptö ṙô ngam Tēv ngaich la-en tö ngam kintöllö minë nyā-aṅkūö. 3 Lökten yin kahōlö öi katöllö yip tö sat tak kikōnyö öi elhôire yip tövāyö minë-eny nö elhôi yīö yip tö tööḵlö tö ngam töhet kumlēḵ hēk mikah, hòṅ ih öi vīlen cha nö ngamëichkö minë tötṙanāngen la-en, 4 hēk iṙūöhen im vinë-ekūötēv ngaich in ngam la-en inköptö ngam ṙô inrē.” 5 Ṙòkhöre ngaich cha-a nö ṙamlōn, ngaich vē ngaich tarik tö katöllöng tö cha: Istěfen, ngam tö tööḵlö misī tö ngam töhet kumlēḵ hēk ṙinatö-ellōn, Filip, Pròkòrös, Nikānôr, Tīmōn, Parmenas hēk Nikòlös inrē ök aṅ Anti-òk vamītöre ngaich nö im tinlööken Yahūti. 6 Kumten më tö sat tak ngaich cha-a nö chuh in yik tanīnöṙô, vë-ekūötēv cha-a ngaich ṙāḵtö eltīre nö in cha.
7 Lökten ngaich ngam ṙô ngam Tēv nö tūölngöre nö keuheūtngöre chūök hēk iṙūöhöröön sanīöplö ṙôken inrē më mahaköp nö i Yērūsalem pōyen inrē ngaich yik kūönṙô ṙamatö-ellōnre.
8 Kirööngen ngam miṙēḵlōn ngam Tēv nö ikui Istěfen hēk tööḵlö inrē anga-aṅ tö ngam kumlēḵ ò, lökten nö kiröng minë pinngangkūö la-en hameuktö ò nö elhôi më tarik. 9 Ōt pöri yik tarik aṅ ngam mupākö alaha ngam chūök vinë-ekūötēv, yik tö ṙānyu tarik invëka, chamòhòlre nö holṙen yik aṅ Kurēnī, Aleksentriā, rēvre yik aṅ Kilikī hēk aṅ Ēsiā inrē nö choholre ngaich holṙenre nö la-alṙô Istěfen. 10 Holtö ngam tökiröng mikahre pöri ang Istěfen hēk löktö i inyöökenre inrē tö ngam töhet kumlēḵ nö sapṙô cha, lökten cha-a nö ötkô nö sökhak nö ikūö ò. 11 Ulāikenre ngaich cha-a nö vëhöt ellōn yik rīkre tarik nö tūölngen ngih ṙô: “Hang ṙô ò in nö ötlēkö elnang Môsös hēk ötlēkö elnang ngam Tēv inrē.” 12 Ṙūöhöl alaha yik tarik ngaich cha-a hēk tö yik mākūö tarik hēk tö yik kamūich inrē, tainy ngaich cha-a nö in Istěfen ngaich timlö alaha ò nö chuh kūö kamhôka. 13 Kumtö yik töminyônyaṅ ngaich cha-a vamë-eny yik tö ngö ṙô: “Hang ṙô ngòh tarik in nö ötlēköṙôre tö ngam töhet chūök hī öi vë-ekūötēv hēk ötlēköṙôre inrē tö minë Chööngö ngam Tēv. 14 Tö sā ih öi hang ṙô ò nö ngö ṙô, tö Yēsū ngam aṅ Nāsaröt nö tiṙōlngö ngam chūök vinë-ekūötēv min ngaich harīkngö minë inlahen hī minë lamöktö in Môsös.”
15 Hē yik tarik töng amūichhaka nö el ngam chūök kamhôka nöng haköpmatre nö ngëichken Istěfen ngaich meūkö ò cha-a nö sā mineūkö arëkūö ök tö hěngtak ma-ahānga.