Innëtö Chitri Timôtī
4 Ikūö ngam Tēv hēk ikūö Kristū Yēsū ngam tö Pūlngu hēk ngam yamih min nö kahòkken tö aṅ hēk tökapah inrē öich kētö ngih chööngö in yīö: 2 Ahangkö ngam ṙô më-eṅ öm ngëichken ngam ṙētak ngaich iṙūöhen öm in e, pòrô nö ötlöng ngam ṙētak hēk vai inrē, holtö manööyöre öm la-evṙen ngaich holtö heuneū-enre öm haköphöti öm halööktö inlahen öp tö vaichköre inlahen öm vëken ò hēk mikahtö elnang ò. 3 Pön yih min öp ṙētak hē yip tarik min nö ötkô nö hang nup tö yöölen* tī inköphöti, hamūl yip mahaköphöti pöri min cha-a yip ma-asīnkö minë kuilōn cha hēk yip kamëngen minë kinteūnyö elnang cha inrē.* 4 Havööngökūö elnangre min cha-a tö nup ṙô ngam kanô-en ngaich hangihtöre nö hang nup tö minyôiny istōri. 5 Haköptīre pöri më-eṅ tö ngam mikah elmatre i tökeuheūttöre, möi in nup taṙòkhöre kanihngen, la-evṙen töm la-en inhānga,* iṙūöhen vāyö inlahen öm hateungngö ngam la-enre.
6 Ngaich Chin öich höng sā ṙēngen öp tö ôkö töng ṙöstu ngaich inrē nö röhta takô ngam ṙētak ṙinānyö chu. 7 Vāyö inlahen chin ngaich öich kiyung im tölöök kinyūngö ngaich chin keuheūtröön im finālö, köptī chū-ö töm ṙinatö-ellōn. 8 Ngaich öp sapīöv lanöökö nö halēnkaṙen nö chö-öinyten chu, ngam raneushö chu min ip ṙētak öp kahëtö ngam Mā min ngam tökô-en kamhôkka, rö-ö ngih raneushö nöng taneūngen chu pön taneūngen cha inrē min nö ṙòkhöre yip hamökken ò ip ṙētak ò min nö hameuktöre.
9 Kalah man pītnyöre öm veūten chuh in chu. 10 Tön ngaich an Tēmas nöng ṙāngen chu kūö hanangenlōnre töng panam* ngaich kiröönngöre anga-aṅ nö chuh Tösalònikē ngaich kiröönngöre Krisen nö chuh Kalātiya ngaich kiröönngöre ang Taitös nö chuh Talamatiā. 11 Höng Lūkös pöri ngòh tö höngngöh nö in chu, kumten Mākös öm pöich nö holre tön kirööngen yanöölen chin tö tī ò öich in minë la-en. 12 Tīni ök Tikikös tö chu nö chuh Efisös. 13 Yēḵ meh min öm yih ngaich kumtö öp inyut chu öp tö ṙā-ayö tö chu nö i Trô-as in Karpös, holre inrē tö nup tölöömö līpöre, möthë tö nup līpöre uk töṙeūla.*
14 Pōyen tī öp Aleksantör nö hakihten chu ngam töla-evṙen töm la-en rinöömö mās. Öthō an min Yāvē* nö öt havahalvah minë tötlöng inlahen ò. 15 Laklöre më-eṅ tö ò tön tökalēḵ alaha öp nö la-al hī öi im inhānga.
16 Ök raneh ṙētak chu öich laklöre öt hěngtak lamā in chu, ngih ön havëkö chu tö cha min nö un havëkakūö tö kinröötöre. 17 Sökhak pöri ngam Mā nö in chu ngaich hatööḵlen chu tö ngam kumlēḵ, hòn löktö in chu ngam inhānga nö vāyö inlahen hēk ṙòkhöre inrē nö hang yip pumnāmö tarik. Ṙānyu chin öich ṙā-ang elvāng lāyön. 18 Laklen chu min ngam Mā tö nup taṙòkhöre tī ngam tötlöök hēk laklen Chu inrē min anga-aṅ nö chö-öinyten ngam inyööngöre el halīöngö, köp an yēḵ ngam nööinyö ò nöng örheūheu. Āmen.
19 Sinlāmu ṙô yēḵ nö in Priska nā Akula hēk in yip aṅ patī Ònīsifòres inrē.
20 Höngngöh ang Erāstös nö i Kòrin ngaich ṙā-ayö ang Tròfimös tö chu nö i Milětös, pò ò nö vāhavö. 21 Pītnyöre yin chuh in chu urēhěkūö öp laneūichö.
Sinlāmu ṙô yin nö ṙòkhöre vē prötör nö in Yupalös, Pūten, Līnös hēk Klòtiā.
22 Kētu inkôlò man yēḵ tö ngam Mā tökūö ngam hameuktö meh kumlēḵ alaha meh. Örheūheu an yēḵ nö köp ngam tökiröng miṙēḵlōn ò nö in yīö.