Innëtö Chitri Timôtī
1 Chū-ö Pôl, löktö in ngam kuilōn ngam Tēv öich tö hěngtak tanīnöṙô Kristū Yēsū, kaheūkö Chin öich ma-ahangkö ngam kinlēḵngô aṅ im nômö lamöktö in Kristū Yēsū, 2 kūichtö ngih chitri Chin öich i minë-eny Timôtī ngam hanangenlōn chu nö kūön chu.
In meh an yēḵ ngam tökiröng miṙēḵlōn, neūkölōn hēk lanāmö ngam Tēv ngam Yöng hī hēk ngam Mā hī Kristū Yēsū.
3 Ha-öiny tī ngam Tēv Chin ngam lahöklōn Chu tö minë töhet la-en öich sā yik muvöhngöre öich holtö ngam töhet elkuilōnre inrē öich fēken meh tö hatööm sakāmö öich in nup ṙô re öich vë-ekūötēv. 4 Fēken nup mak mat meh chū-ö, öich hòṅ kapahare meukkūö meh, pò chu tööḵlö tö ṙanamlōnre yēḵ chu min meukkūö meh. 5 Örheūheu Chin fēkö ngam ṙinatö-ellōn meh ngam töt īnu tö innyatkö elmat, ngatī ṙinatö-ellōn ök yōm meh Lois hēk tö ök yöng meh kikānö Yūnisi, ṙatö-ellōnre Chin tö meh öm īnu tö ngam tö ngatī ṙinatö-ellōn.
6 Angū-ö ngih lāinyngen chu fēḵlen meh, tö ngam taneūngen meh inlōnti aṅ im Tēv tökūö chu ṙāḵtö eltīre in meh, hökngen e man nöng örheūheu nö hūkūö nö sā öp tameūiyö. 7 Pò ngam töhet kumlēḵ kahëtö ngam Tēv nö in hī, hö-ö angū-ö nö vī-i hī öi pa-ekūö, kētö ngam kumlēḵ, hanangenlōn hēk tölöng mufē pöri nö in hī. 8 Lökten man um sirōngkūö öm ahangkö inlahen ngam Mā hī, um rēhěn töpòkūö chu, chū-ö töhaköövö öich chö-öinyten ò, ṙatö-ellōnre pöri öm in ngam kumlēḵ ngam Tēv, öm hīnöre la-al minë kanihngen öm chö-öinytö ngam tölöök inhānga. 9 Laklöng ayī-ö tö ò hēk havëtu öi im hanëtö, rö-ö pöri öi kūö minë la-enre öi havëtu, pöi kūö ngam kuilōn ngam Tēv öi teūngen tö ngih invëtöre ngaich hameuktö ngam tökiröng miṙēḵlōnre anga-aṅ nö in hī, urěhngöre tī anga-aṅ nö löktö in Kristū Yēsū nö kētö ngih tökiröng miṙēḵlōnre nö in hī, 10 kūö inmeuknyö ngam Mahayööken hī pöri töngamuh ang Kristū Yēsū öi lööknyi mikah elmat tö inlahen ngih tökiröng miṙēḵlōn, ahetngen ngam kinpaha anga-aṅ ngaich löktö in ngam tölöök inhānga nö hayangtö mat hī öi sitih inlahen öi teūngen tö ngam nômö hēk töm töt kinpahavö alaha, 11 angū-ö lökten chu öich vīlöng öich tö hěngtak öich pöplisöör, tanīnöṙô hēk mahaköphöti öich chö-öinytö ngih tölöök inhānga.
12 Angū-ö ön lāinyngen chu öich keun në taṙòkhöre kanihngen, öt sirōngkūö pöri chū-ö, pöich akahakūö tö ngam chūökre öich ṙatö-ellōnre ngaich kirööngen ṙinatö-ellōn chū-ö tö ngam amin ò tökētu tö chu ngaich heuveū-en min anga-aṅ nö laklen e söl ip sakāmö. 13 Minë tö yöölen* tī inköphöti ahang meh öm löktö in chu, holtö hanangenlōnre hēk ṙinatö-ellōnre um vaichngö tö minë inchöngten,* tökūö ngam hinëngö hī öi in Kristū Yēsū. 14 Löktö in ngam töhet kumlēḵ ngam mi-iyöng in hī öm laklö ngih töpōiṙāi amin.
15 Akahalōn man tö yip taṙòkhöre tarik aṅ Ēsiā tistrik nö havööngökūöre tö chu, in cha inrē ang Finchelös hēk Hermòchinis. 16 Örheūheu an yēḵ ngam neūkölōn ngam Mā nö ikui yip aṅ patī Ònīsifòres, kūö ò nö ṙōlheuh nö hareuskö alaha chu hēk öt sirōngkūö inrē anga-aṅ tökūö inlahen chu öich halöki. 17 Rö-ö nöng angū-ö, pön hē ò inrē nö i Rōm ngaich holtö kumlēḵ alahare anga-aṅ nö chöhö chu ngaich kôtökūö anga-aṅ tö chu. 18 Ngih ön havëkö chu tö ngam Mā Yāvē* nö hameuktö ngam neūkölōnre nö ikui ò ip sakāmö, akahakūö takô më-eṅ tö inlahen ò nö meukṙen chu nö i Efisös.